صارحت زوجي .. و الحمد لله انتهت السالفة ع خيـــــر

السلام عليكم و رحمة الله و بركاته

أولا" عذرا" ع التأخيــر الغير مقصود ..
و أنا سبق و قلت إني يمكن أتأخر بالرد بسبب ظروف

.

.

أحب اطمنكم إن الموضوع عدا على خير و لله الحمد.. قلت لزوجي و هو اتصرف

و هذا بفضل الله .. ثم بفضل توجيهكم و دعواتكم لي

.

.
تبون التفاصيل ..؟

.
.
جتني فكرة اني اصارحه بطريق غير مباشر

قلت له :دخلت منتدى و لقيت موضوع عن وحده تشتكي من أخو زوجها .. و انه مضايقها
و ماتقدر تصارح زوجها .. تخاف من المشاكل بينهم
أنت وش رايك .. ؟ تصارحه ..؟

قال لي : مهماااا يكووون لازم تصارح زوجها

لانه اذا ماصارحته بيتمادى اخوه .. و اكيد هي دام انها ساكته .. بتكون راضية عن اللي يصير <= عورني قلبي يوم قالها
.
.

بعد يومين

دق علي اخوه 3 مرات

اذا شفت مكالماته .. ابكيييي

دخلت المنتدى .. لقيت موضوعي واصل 10 صفحات

و الاغلبيه يقولون صارحيه

و الله بكيييت

قلت ما فيييهااا .. خلااااص لازم اقول له

و اللي يصير يصير

دقيت عليه

قلت له : تذكر اللي قلت لك عليها .. ان اخو زوجها يدق عليها..؟

قال ايه

قلت : أناا صاحبة المشكلة و اخوك ( ... ) هو اللي ازعجني

عصصب علي

( يمكن تقولون .. ليش ماقابلتيه و قلتي له السالفة وجها لوجه ..؟ أنا بالقصيم وزوجي بالرياض .. مستحيييل اخليه يقطع كل هالمسافة و بعدين يرجع و هو معصب .. و مدري شيصير عليه بالطريق )

المهم قلت له :: و عصب علي :: و على اخوه :: و قال يمكن يكون أخوه غلطان

كنت ابكي و انا اقووله السالفة

قال الحين راح ادق عليه و اسأله ..

و جلس يهاوشني .. ويقول( انتي و مشكلة صغيرة ما عرفتي تتصرفين ..؟ أجل بعدين وش راح تسوين..؟ كان المفروض قلتي لي من البداية )

بجججد خلاني اكررره نفسي

قال ( و هذا اللي صدق طيّر لي عقلي ) : يمكن نفترق <= قالها بيقهررني بس

دق على اخوه .. ( و احمد ربي و اشكره ان اخوه بجدة و الا كان بتصير مذبحة )

و سأله عن كل السالفة .. و قام يحلف و يقسم انه مضيّع و غلطان و ما كان يدري انها انا
يقول على بالي اختها <= عذر اقبح من ذنب

يقول انه شوي و يبكي .. و اعتذر له

أول ما دق علي زوجي .. ( عرفت من صوته ان المشكلة انحلت ) ..

رديت و قلت : هااه .. أرجّع شبكتكم ..؟
قال : اييه
قلت: طيب استخدمت المكياج .!
قال : رجعييه مثل ماهو
قلت : و العطورات و الله استخدمتها !
قال : لا لا .. لازم ترجع جديدة

و بعدييين قال لي على كل السالفة .. و استسمح مني .. لانه عصب علي ..

بس تبوون الجد .. أنا اتحمل الغلط 99% لاني ما تصرفت بسررعة

و استغفر ربي على اني سمحت لنفسي ارسل لواحد غريب عني


و بكذا تكون انتهت السالفة

مع اني مو مقتنعة بكلام أخوه .. بس أحمد ربي و اشكره انها انتهت بدون مشاكل و بدون تدخّل أطراف ثانية

و بالأخييير .. اشكر كل من رد علي و دعى لي .. و نصحني

و جزاكم الله كل خير على كل حرف كتبتوه .. و قريتوه

و لا تلوموني .. على عدم حِكمة تصرفي .. لان خبرتي بالحياااة مرررة قليييلة

و السلام عليكم و رحمة الله و بركاته :26: