صارو الابناء يفرضون عضلاتهم على امهاتهم للاسف

مرحبا
السالفه وما فيها ان امي حرمه كبيره ابوي متوفي وما عندها شي يوسع صدرها يعني ما تعرف تستعمل النت واتويتر وها لاشكال المهم صارت تتابع قناة بدايه تحب المحاظرات والمسابقات واشوف نفسيتها تحسنت كثير واستانست وملت فراغها بشي مفيد بتقولون وين المشكله المشكله اننا عندنا اخواني شباب الواحد اذا دخل لصاله وامي جالسه عند بدايه او المجد او اي قناة اسلاميه بدا ينافخ ويعصب ويقول حامت كبودنا من ها البدايه وها المجد الي 24 ساعه شغاله في ها الصاله تخيلو يوجهون ها الكلام للوالده وهم ما يشوفون غلطهم الواحد لو يجلس عندها حتى لو خمس دقائق ما يترك الجوال من يده ولا يعطيها اي وجه واربع وعشرين ساعه في الاستراحات واصدقائهم وكل واحد في غرفته تلفزيون فيه كل القنوات ومع ذالك ينتقدون امهم من برامجها الي تحبها وينافخون عليها بعد وياليتهم يجلسون معها لا ابدا واذا جلسو ولو خمس دقائق ما غير في ها الجوال يطقطقون يعني بختصار ودهم امي تقابل اربع جدران وتكسر الحصى من الطفش وهو في المقابل يخرجون ويستانسون وييشاهدون القنوات الي يبون يعني يبون يفرضون شخصيتهم عليها وهي يا عمري ضعيفه تخاف منهم لانها ما تحب الجه والهواش والمشاكل الى درجه احياناً تجلس تشاهد وتكون مستانسه ومنسجمه واذا سمعت احد داخل من برى على طول غيرت القناة واذا احد دخل عليها قال لها وهو مكشر كنه داخل على كفار غيري ها القناة الي حومت كبودنا