صار عندي نفسية من الاسرية وانا ادور العكس قلبي محروووووق !!!

احاول اقنع نفسي ان الانكار بالقلب
بيكون حجتي عند الله بس فكرت
اني استطيع انكر بلساني ويدي
وعندها وش يكون عذري يوم القيامة .. !!


انتسبت لهذا المنتدى الرائع المتنوع وهدفي استفيد وافيد
لكن ماكنت اتوقع اني بشوف شي غلط واطنش احس اني
مجاملة ومنافقة قلت والله ماتنفعني هذه يوم الحساب
عزمت اني اكتب الي في خاطري بادب وبدون تجاوز
وان شاء الله اسلم من بعض ردات الفعل المتعجلة !!
لكن فيها راحت ضمير والله يعيني على التوضيح....


الي مزعجني ومكدر خاطري انه كل ما ادخل الاسرية
احصل مشاكل بالهبل !! المواضيع الي تتحدث عن بناء
الاسرة وكيف تكون سعيدة وانجاح العلاقة وووووو.....
ما تكاد تذكر بمواضيع الشكاوى .. اكتئاب وحزن وهم ...
صار بدل ما يكون منتدى اسرية سعيدة احس اسميه
منتدى حياة اسرية تعيسة !!!


اغلب المواضيع زوجي قال .. زوجي سوا .. زوجي راح..
زوجي ... الين كرهت هذا المسمى !!
والظاهر ببدلها بعلي بعد اليوم هههههه
والله اضحك من القهر مليت من الاسطوانة هذه..


وكله كوم والكلام عن العلاقات الزوجية الخاصة بجرأة
عجيبة وصراحة فاضحة كوم ثاني ...
والله لو امك وابوك ومن يحترمك من اسرتك يعرفون معرفك
في المنتدى ما كتبت بهذه الصراحة حياء منهم !!
فالله احق ان يستحيى منه اذا كان معرفك مجهول فانت
باقوالك وافعال مكشوفة امام الله !!!
والله الي قاعد يصير عيب وممجوج احس الحياء ماخذ اجازة
في بعض المواضيع والله المستعان ،،،


والي تعرض مشكلتها اذا كانت صحيحة ايش يضمن ان الحلول
المطروحة صواب او تناسب مشكلتك بالذات !!
وبعدين كل وحدة بتعطيك حل من وجهة نظرها هي ويمكن تغلب
عليه العاطفة اكثر من العقل وهذا يشتتك كثير ويعمق المشكلة اكثر !!


ويمكن يعجبك واحد من الحلول وتسويه بدون استشارة اهل العلم
واستشاريين اسريين ويهدم بيتك وبعدها ما ينفع البكاء على اللبن المسكوب !!
وبعدين تجين تولولين وتصحين خربتوا بيتي يا عالم حواء !!!!!


لا تجي وحدة وتقول اكيد ما عندك مشاكل وجالسة تتفلسفين علينا
والله عندي مشاكل ويمكن صعبة بعد لكن احكم عقلي وادور طريقة صح
ما ايجي المنتدى وانشر غسيلي على الفاضي والمليان البيوت لها حرمات
وخصوصيات هذا الي تعلمناه من ديننا فما يخلوا بيت زوجية من مشاكل ...


وغير كذا في بعض المواضيع تصدير ثقافة التخريب والتخبيب
ودعوات وحقد على بعض واحيانا شتم وعدم احترام
خالي خروف !! اتقرف من امي !! والله سوء ادب !!


يشهد ربي اني ناصحة لكم الي عندها مشكلة اتخذي خطوات :


الجأي اولا واخرا الى الله في دعواتك في سجودك تضرعي بصدق ..
فتشي عن نفسك ايش عندك من خطأ يمكن ربي يحل امرك
عالجي قدر ماتستطيعين مشاكلك مع زوجك بدون ما تخرج برى ..
اذا ما نفع اعرضي مشكلتك على مراكز متخصصة اذا ما نفعوك ما يضروك..
اكثري من الصدقة والدعاء وامسكي لسانك عن الاخرين يمكن اكثر مشاكلنا

• عقاب من الله لشماتتنا بالاخرين وتدخلنا في شؤونهم ...

واتمنى من الاداريات والمشرفات يضعون منتدى خاص للمشاكل الزوجية
الدخول فيه بخصوصية ويكون فيه مركز استشارات تشرف عليه مختصات
ويكون فيه تعاون بين المشرفات والعضوات نخفف من هذه المواضيع
جابتلنا نفسية والله وشككت حريم في ازواجهم وبصراحة طفشنا حيييييل..


سامحووووووووووني والله ما قصدت الا النصيحة وابراء ذمتي عند الله
ويارب يصلح حالي وحالكم واحوال المسلمات في كل العالم
وسلاااااااااااااااااااااااااااااااااااااامتكم ،،،،،