صار قريبك هو عدوك

السلام للجميع. هذي قصتنا مع بنت خالتي. هي أخلاقها مش ولا بد. المهم عرفت تلعب على أخي وكانت تراسله رسائل حب ويتقابلوا . أخي بعد فتره سافر للخارج وطلب يدها من اهلها بالتلفون. ماكانش في شئ رسمي. بعد ما رجع أخي من السفر ماكانش مرتاح انه يتزوجها. وعرف أنها تكلم شباب. أخي خطب لنفسه واتزوج والحمد لله زوجته مره عسل وتخاف الله. المشكلة ان بنت خالتي وأمها مش مخليين لنا حالنا. دائماً زيارات متواصلة لبيتنا والبنت تلبس لبس خليع وتحاول ان أخي يشوفها. وتضجك على زوجة أخي. معي أخ كبير متزوج وزوجته عايشه معنا في نفس العماره. والله يابنات لو أوصف لكم ألوقاحه وقلة الأدب والحقد والكره اللي بقلبها لنا ما تصدقوا. هي تعتبر عدوه لنا. هي أصحاب مره مع الناس اللي يكرهوننا وتنقل لهم اخبارنا. تخيلو بنت خالتي وامها اصبحين أصحاب الروح بالروح معاها من بعد أخي ما تزوج . واللي يغيض أنهن مايستحين كل يومين وطبين علينا. المصيبة اللي عرفتها اليوم ان أخي اللي بالغربه خطبها. باتقولو كيف. هي مشتركه معه بالفيس بوك والله اعلم كم لها ترسم عليه. المهم أختي بالصدفة سمعت زوجة اخي الخبيثة تتكلم مع بنت خالتي وتقول لها مش قادره استنى لما خالتك تجيلها سكته قلبيه من الخبر. يعني اتخايلو بدل الواحدة صاروا ثنتين. هي فرحانه فينا عشان قدرت تأخذ واحد ثاني من اخواني لانها تحسب احنا اللي خطبنا له. بس والله أخي خطب وكمل وبعدين كلمنا. بالله قولو لي كيف العمل. هو خلاص خطب وكمل. كيف نتعامل معاها هل نبارك لها ولا نبين شئ وكيف نتعامل معاها بعد الزواج. هي لسانها طويل وماتحترمش احد. وأكيد نقل الأخبار والفتن بايكثرين من لما تدخل البيت. والله مهمومه امي مريضه ويكفيها مشاكل وهاذي اللي لازم تكون واحده مننا باين انها باتكون أكبر عدوه لنا. بالله كيف التصرف؟