كيف حالكم بنات ..
عندي لكم خلطه من تاليفي و تخبيصي عشان ابي صبغه طبيعيه و تعطي لون لشعري ..
عفست الدنيا لما لقيت شيء عطا شعري لون :42:
بنات يمكن هالخلطه مفعولها من شعر بنت لي بنت يفرق اللون ..
مو يطلع لكم لون ثاني و تجون تحاسبوني انا شعري بني غامج ..
و بعد ماحطيت عليه خلطتي السريه :21: طلع هاللون ..
طبعاً تكررين هالخلطه اسبوعيا لما يبين هاللون عدل :32:
و على فكره بعد تعطي لمعه و نعومه للشعر :27:
طبعاً الحين كل لكم تبون تعرفون شنو مكوناتها :21:
حناء مقدارها على حسب طول شعرج .
نص كوب قرمز (( تلاقينه عند العطار )) .
و نص كوب فيمتو مركز .
عصير ليمونه وحده .
ملعقة كبيره بابونج .
ملعقة كبيره كركديه .
ملعقة كبيره لون طعام (( أحمر )) .
ملعقة كبيرة كركم .
ملعقه كبيره فوه (( تلاقينها عند العطار ))
الطريقة :::
تاخذين البابونج و الكركديه و لون الطعام الاحمر و الكركم و الفوه و تحطينهم بجدر و تصبين عليهم كوبين و نص ماي و تغلينهم .. لما يغلي الماي صفيه و ضيفي له الفيمتو و القرمز .. تلاقينه صار دافي .. خلطيه مع الحنه و غطيها ولا تحطينها الا يوم ثاني الصبح .. يعني سوي خلطتج هذي بالليل و نامي و الصبح قبل لا تحطينها على شعرج ضيفي لها عصير الليمونه و بعدها حطيها على شعرج و غطيه .. و خليها لمدة 6 ساعات .. و بعدها غسلي شعرج و شوفي الفرق .
في شغلات لازم انبهكم عليها ..
لازم تلبسين دس (( قفاز )) لما بتعجنين و لما بتغسلين شعرج .. عشان لا تصبغ ايدج لان من تحوش ايدج تصبغ على طول .
حطي على جبهتج و ارقبتج من ورى و على اذنج وورى اذنج فازلين عشان مايصبغون لو حاشهم شيء من هالصبغه .
و لما تغسلين شعرج و تحسين ان الحناء خفت .. استخدمي مشط عشان اللي باقي منها كله يروح .
ولازم ماتغسلين شعرج بشامبو .. عشان يثبت لون الصبغه .. غسليه ببلسم .
ولازم تكررين هالصبغه لما يبين اللون واضح .. لان مارح يبين لا باول مره و لا ثاني مره يبيلها تكرار و على حسب لون شعرج .. اذا كان غامج راح تاخذ فتره اطول عشان تبين .
و اللي تجربها تقول لي رايها ..
تحياتي ،،
الشيماء
