صدري صار مطعم..... ساعدوني جزاكم الله خير

السلام
ياليت تساعدوني جزاكم الله خير يالامهات من خبرة او تدلوني على رابط
مشكلتي ولدي الله يهديه يده24ساعه بصدري عمره 3سنوات..وحيدي ماعندي غيره...
بصراحه فطمته وهو بعمر السنه لاني حملت عليه وفطمته فجاة يعني كنت طبيعيه ومن اليوم الثاني نهائيا منعته... وكنت انومه عند خواتي وكانت اول ايام ينام فيها بعيد عني منذ ولادته
بالاول كان بس بالليل والحين طول اليوم وهو ياكل وهو يلعب راح جاي يدخل يده ولما يتضايق او يجي يشتكي يده بصدري..حتى وهو يشوف افلام الكرتون يده بصدري....
تعبت تعبت تعبت تعبتتتتتتتتتتتتتتتتتتتتتتتتتتت
صدري جته حساسية حبوب واحمرار بين الصدرين من كثر مايدخل يده .. لاتقوقون انتبهي يده تكون نظيفة يدخل يده اوقات وانا مشغولة اقرا او اسولف مانتبه الا ويده مشالله ويفرك بعد ...
زوجي يقول: الولد ناقصه حنان دلعيه... الجواب: والله مااقصر معه اضمه وابوسه وادلعه والعب معه واسولف معه ... انا بالبيت ومش موظفه ولا انا راعية زيارات...
امي تقول: عادي طبيعي اتركيه وهو بيهون من نفسه وان واحد من اخواني كان كذا الى عمر 5 سنوات وبطل لحاله..
واانا جربت كل الطررررررررررررررررررررررررق؟؟؟؟
فترة كنت افهمه ان فيني دواء ولا تقرب غلط يعورك الدواء؟ واوقات كان يستسلم واوقات يبكي الين يقطع قلبي يقول غسليه الين مااستسلم واغسل الدوا واتركه؟
وجربت الضرب الله يسامحني وكنت اقول له اذا دخلت يدك اضربك ؟؟ وكنت اضربه خفيف وكان يعاند واذ ضربته يقوة يبكي يقطع قلبي ولا يطلع يده؟؟؟
وجربت بهدوء ان هذا شي غلط وان الكبار مايسوون كذا وانك تحب ماما وهذا الشي يعورني وانت ماتبي تعور ماما لانك تحبني يقول شوي ويجحدني معد يطلع يده؟؟
وجربت بهدوء بدون مااتكلم كل مادخل يده اطلعها بهدوء وكاني مشغولة على طول مشالله عليه حتى وهو مسرح يرجع يدخل يده وعلى هالحال اطلع وهو يدخل 70مرة مشالله هلكني
بديت افهمه خلاص دخل يدك على جنب تحت ملابسي على خفيف يقول طيب وبعدين يحشر يده بالنص ويفرك؟؟ هلكني الله يهلك العدو.
واذا هاوشته وقلت له روح انا تعبانة وصدري يعورني واسوي نفسي ابكي؟؟ يجلس يستهبل ويسوي شغلات تضحكني واذا ضحكت جا ودخل يده ؟؟
عيار وعنيد ولدي الله يهديه...
صدري تشوه من الحساسية.؟؟
العالم ريحة صدورهم عطور وصوابين وانا ريحتي تقول بوفيه
ساعدوني جزاكم الله خير..