صدق اللي قال الدنيا دواره!! رأيكم ؟

مساءكم خير

انا ما كنت أشوف ان هالمقوله صح مدري ما كنت اصدق فيها لاني أشوف الظالم هو اللي مرتاح استغفر الله لين ما شفت حالة بنت جيراننا قدام عيوني كأنها مسلسل وربي نهايته كذا سبحان الله

بنت جيراننا عايشه عند أخوها وزوجته ومعاها امها كبيره ومريضه ولا لها الا هالولدين وأبوها متوفي من زمان من هم صغار المهم البنت وصل عمرها 34 ولا تزوجت وزوجة أخوها مشغلتها شغاله لها قبل ما يجيبون الشغاله كانت تغسل ملابس البيت كله أخوها وأمها حتى زوجة أخوها وعياله ومرات تكون غسالتهم خربانه وكانت تغسل بيدها والطبخ والمسح والكرف كله عليها وزوجة أخوها تتآمر وتنام لين ما تشبع والمسكينه كرف وأمها تخاف من المشاكل وساكتة وحتى بعد ما جابوا الشغاله اذكر كانت مستأنسة انه بترتاح بس زوجة أخوها ما كنت تخليها تسوي لهم ولا شي ولا تخدمهم بأي شي ويا ليت سالمه منها في كل مجلس كانت تدقها بالكلام أنها ما تزوجت وأنها عانس حتى اذكر مره كان عندهم عشى وكانت ام زوجة أخوها وأخواتها موجودين المهم دخلت البنت شاليه شاي والقهوة قالت لها وحده من الحريم الكبار ان شاء يا فلأنه الله يرزقك بولد الحلال اللي يلففك العالم كله والبنت استحت واطلعت اول ما طلعت صارت مرة أخوها تطالع امها وتضحك وتقول ما أظن قدام الحريم وتقول دايم اذا حملت تتمشى قدامي ويدها ورى ظهرها فهمتوا الحركة ؟ وقبل يمكن اقل من ثلاث سنين واحد من أهلنا من بعيد اكبر منها بس بسنتين ولا تزوج قبل و غني غني موبس كلام وعنده خير ما شاء الله جاهم هو وأمه وأخته يبون يشوفون البنت انا ما كنت ادري تفاجءت انه الحرمه عندهم المهم زوجة أخوها هذي حاولت بأي طريقة تأخذ رقم ام الولد والا أخته طبعا هي ما طلعت والا جلست معاهم فوق بغرفتها من درت انه في ناس جاين البنت واللي استقبلهم امها بس ومرة أخوها اتصلت علي تبي رقم ام الولد أو أخته وقلت لها ليه تبينه ؟ قالت نتفاهم على التفاصيل !! وما عطيتها الرقم طبعا وانا نزلت موضوع عنها هنا وأنها طلبت الرقم ..

والحمد لله تم الزواج ع خير وطبعا زوجة أخوها ما حضرت الأهم بالموضوع لان احس اني طولت البنت هذي اللحين عندها بنتين توأم وحامل وزوجها طيب معاها وكريم وما يسوي شي الا يستشيرها فيه وما شاء الله الكل يتكلم عن دلعه لها وزوجة أخوها هذي زوجها بعد ما كان ما يمشي الا بأمرها موريها الويل ولا مصروف ولا طلعات وكل الناس درت عن مشاكلها وسفر شغالتها وكل سنه حامل صار عندها 8 اطفال ورى بعض وغصبن عنها حتى ضرب يضربها اللهم لا شماته واللي ذكرني اكتب قصتها امس كان عندهم عشاء في بيت أخوها وجات البنت لو تشوفون كيف تغير الحال سبحان اللي يغير وما يتغير وربي كانه فيلم بعد ما كانت زوجة الإخو مرتاحه والبنت تكرف انقلب الحال ولا البنت جايبه معاها بناتها وثلاث شغالات ولا قومت ولا وحده تساعدها والبنات يمشون ويوسخون ويكببون وزوجة أخوها بس تدور رضاها سبحان الله ؟ ونسيت اقول لكم امها للحين عند أخوها .... لو انتي كنتي بمكانها ممكن تسامحينها والا لا ؟ لاني احس انه البنت قاصدتها أنها تنتقم منها يعني تشوفون اللي كانت تسويه زوجة أخوها ظلم والا لا ؟