صدق اللي قال ذيل الكلب مايتعدل.........شوفوا سي السيد ايش عمل؟؟؟

والله العظيم امنت بهذا المثل .......وماعاد عندي شك في صدقه... والحقيقة اللي صار كان اقوى

من اني اصدقه...

مع ان الموضوع كان واضح وضوح الشمس...بس يمكن انا غبية ..ويمكن لكل جواد كبوة...ويمكن...

ويمكن...

تعالوا احكي لكم حكاية النهاااااااااااية...

طبعا كالعادة ...مشكلة...

كنا رايحيين مشوار..وامي جاءت مخصوص عندي عشان تروح معايا وعشان لاتتعب سي السيد

ويمر عليها...

واول ماشافها..اتغير وجهه وصار الوان...مايبغى يوديها معايا...

هي عرفت على طول..قالت انا اجلس مع اولادك..وانتي روحي خلاص...

ويوم ماركبنا السيارة..ماقفل فمه دقيقة وحدة....وقال ليش امك مانزلت؟؟؟

قلت له:ماشفت كيف وجهك صار اول ماشفتها...؟؟هي عرفت الموضوع واحترمت نفسها..

طبعا جلس يتكلم ويعيد ويزيد..ويهدد ويتوعد ويسب ويشتم....ويقول :ايش تقول عني عشان مااخذتها معانا؟؟

قلت له ماراح تقول شيء...مارضي يسكت..واتكلم كلام كثير ...بصراحة ماسمعت نصه...

لاني متعودة على كذا....

مارديت عليه..وشوية يبغى يصدمنا ...قلت له ..نزلني هنا اذا ماتبغى تأخذني معاك...واتفاجأت

انه وقف فعلا ونزلني.وقال :طيب انزلي..وجلس يدف فيا حتى نزلت ومشي..قلت له حسبي الله عليك ياظالم

لف بالسيارة ورجع يلاحقنا في الحارة...قال هاتي الولد...وانا اوريكي ايش هو الظلم...

ورجعت البيت مشي...

ويوم شافتني امي ..عرفت اننا اتخاصمنا...جلست تقرأ قران وتستغفر الله ...وقالت ياريتني ماجيت

انا سبب المشاكل...

المهم ..بعد نص ساعة جاء ومعاه الولد ودخل نام....وامي راحت بيتها ..وانا اتعشيت مع ولدي

وجلسنا سهرانيين سواااااااااااا

وعلى الساعة 2 صحي زوجي...قلت له ترى عشاءك جاهز اذا تبغى تتعشى...لبس ثوبه وخرج

طنشني ومارد عليا.......

جاءت الساعة 3 ومارجع من بره...بصراحة انا قلقت عليه ...رحت لغرفة النوم...لقيته ناسي جواله

فتحت على الرسايل المرسلة وقلت اكيد فاضحني عند احد من اهله...

لقيت هذا المسج في جواله...يجنن رقصك ياكلبة..ذوبتيني..احبك والله احبك..مااستغنى عنك...

بالله ارسلي الان رسالة تواسيني ......انا في انتظارك...

والله يابنات انهرت تماما..ماتتخيلوا وضعي ..خصوصا ان المسج مرسل لبنت اخته ....والله ماصدقت

رحت راجعت الرقم..لقيته فعلا رقمها...

ولما جاء كنت ابكي ومنهارة...فوق ماتتخيلوا...وصارحته باللي شفته...قال ليش تفتشي جوالي؟؟

قلت ربي فضحك...انا خايفة عليك وكنت ابغى اكلم اختك عشان اسألها عنك...وشفت المسج

قال :انا حر ومالك دخل فيا...وجيبي لي فراشي..انام بره..

قلت له:اخرج من الغرفة..لك عين تتكلم..ماتخاف من ربك تعاكس بنت اختك....طيب روح دور اي

بنت..مو بنت اختك...ومتى رقصت لك بسلامتها؟؟؟ قال يوم الاستراحة هزت لي هز بسيط وبشرشف

الصلاة.....تخيلوا الواطي...قلت له:طيب انا ارقص لك...ليش تروح لبنت اختك؟؟؟ ولا انا مثل امك

ماينفع ارقص لك..

جلس يصرخ ويرمي الاشياء اللي قدامه في وجهي...

قلت له:اطلع من الغرفة وبكرة انا رايحة لاهلي...مالك حكم عليا..والله مو رجال اللي يمد يده على زوجته

ثاني يوم رجع من صلاة الظهر وصحاني وهو يضحك...ويقول جبت لك غداء من بره..طبعا عشان

لااقول لاخواته..لاني هددته اني قبل مااخرج من البيت افضحه عند كل اهله....عشان يعرفوا ايش

بيصير من وراهم....

طنشته يوم قال جبت الغداءومارديت عليه...واتغدينا..قال انتي ايش تبغي الان؟؟؟

قلت له :اروح بيت اهلي...قال تتضيعي اطفالك.....قلت له :وصلت للمحارم...مااتوقعتها ابدا...هذا

المسج مايترسل الا لزوجتك او بنت حرام...ويا عيني عليا عمرك ماقلت لي ذوبتيني....ولا سمعتها

منك...المسج اللي ترسله ليا بارد وباين انه من وراء قلبك...

والله كرهته كره العمى...وماصرت قادرة اطالع في وجهه...شعرت انه حرام يكون ادمي...

رسلت مسج لبنت اخته ثاني يوم.....قلت لها مااتوقعت هالشيء منك....وانصدمت جدا فيك وفي خالك

قالت والله......حتى انا اتفاجأت من المسج...والله مابيني وبينه شيء...

احتقرته اشد الاحتقار....ولاعاد له مكان بقلبي.....

رسلت المسج لأم البنت((اخته)) وبعدين اتصلت عليها..قلت لها لو لقيتي هذا المسج في جوال زوجك..كيف تتصرفي؟؟

قالت حسب اللي مرسله المسج؟؟...قلت لها :لو كان هذا المسج من اخوك لبنتك ..كيف تتصرفي؟؟

قالت :لاتأخذيه بالمعنى الحرفي...ويمكن هي بسطته ...وعجبته وعشان كذا رسل لها هالمسج

وانا اعرف ان بينهم علاقة فوق الحد من زمان...لكن اعرف ان اخويا ضعيف ..وتفكيره سطحي

وهو يحبها مثل اخته...بس يحب يحكي لها كل اسراره...صدقيني مابينهم شيء

وانتي قولي له:انا مستعدة اعيش مع اولادي وانت روح اتزوج عليا لو منقصة عليك شيء

تراه اهون من الحرام...قلت لها:زمان كنتي تقولي اني اغار على اخوك..واهو استغفلني ..وشوفي

ايش النهاية...

والحمد لله مانقصت عليه شيء...ولو مايبغاني اقنعوه يطلقني...ماعاد له مكان بقلبي بعد هالمسج..

قالت لي:انا راح امنع بنتي تروح معاه لوحدها..وانت انتبهي له..وقفلي سيرة الموضوع نهائي..تراه يحبك

ويموت فيكي...خخخخخخخخخخخخ

وقالت انا راح اهددها لو عملت شيء ثاني..اشتكيها لخالها الكبير وهو يتصرف معاها ومع اخوه

قلت يصير خير وقفلت وانا دمي محروق..كيف اقفل الموضوع وهو يحرقني بقلبي كل دقيقة.......

وما قلت له اني كلمت اخته...لانه هددني لو قلت لها..بيصير شيء مو طيب...

بعدها بيومين جاءت بنت اخته بعندنا...وقالت ابغاكم سوا...عشان يسمع الكلام اللي يقوله..

قالت له :انت خالي وعلى رأسي ...بس زوجتك لها حق تزعل المسج شوية قوي...قلت لها: مو يقول

خالك دائما ان مابينكم شيء وانك زي بنته...احد يرسل لبنته هالمسج...بس من جد كنت مغفلة..

قالت :لاتفهمي غلط..هو ماقصده شيء...قلت :يافلانة المسج واضح جدا...قالت :انا زعلانة منك..

قلتي لماما...طبعا هنا انفجر الاخ وقال ليش قلتي لامها ..انتي تبغي تفضحيني والسلام..

قلت لها:عشان توقفك عند حدك..مو كل شوي رايحة معاه مشاوير ولحالكم...

قالت:والله دائما يرسل مسجات جريئة واوريها لماما عشان تكون على علم..طبعا تبغى تبريء نفسها

قالت لي:اهم شيء لاتقولي لاهلك...عشان لايظنوا بيا السوء..وياخالي انا بنت واخاف الفضيحة

قال لها:ياما شحنت لك جوالك ووديتك وجبتك...وماقصرت معاكي..والان انا الغلطان..اللي صرت

اجري وراك..يصير خير...وقال لها:معليش من غير مطرود....زعشان لاتتطلع كل البلاوي اللي

تعرفها...

عمل نفسه زعلان وخرج من الغرفة وتركنا لوحدنا...قالت لي اشياء..خلتني اموت مليون مرة

منها: ان خالها قال لها ناديني باسمي يافلان وبلاش كلمة خالي...

وقال لها :اخص اسراري اللي ماتوقعتها..

وقال لها:انا ابغى احبك وبس...وانتي حلوة وتجنني..

وهي لو تشوفوها...اقل من عادية....

وكيف الرجال ماخطبوكي للان...

قالت له:ليش ماتحب زوجتك؟قال :ماعندها اسلوب ولا تعطيني وجهه..

ولما سألته بالله العظيم ..كيف قال عني مااعطيه وجهه وهل فعلا ماعندي اسلوب..انكر انه قال هالكلام...وقال عنها كذابة....

ويوم تلبس لبس كتوفه عارية...يقول الله على هذي الكتوف اللي تجنن

وربي عمره مامدحني الا اذا سالته ايش رايك وغصب

عنه يقولها وهو مكشر في وجهي...

تخيلوا عرفت ان زوجي مريض ويجري وراء البنت ويعطيها بطاقات شحن عشان يحببها فيه..والبنت

اعطته وجهه عشان البطاقات..وعملت له كم حركة عشان تخليه سواق عندها..

وبعد ماخرجت,..قال والله تشوفي كيف التعامل راح يكون معاكي ..طالما فضحتيني عند اختي وقلتي لها

مالك شيء عندي الا الرسميات ودخل وقفل الباب عليه.....

لو حصلكم هالموقف ايش تعملوا........بالله عليكم ردوا

لاني ماراح اتصرف الا بعد مااقرأ ردودكم..............

___________________________________________

هذه قصتي كاملة لمن ارادت قراءتها قبل الرد علي

http://forum.hawaaworld.com/showthread.php?t=966809#Scene_1