صدمتي فيك يازوجي وش يعوضها

السلام عليكم يا اخواتي الكريمات
راح ادخل على طول في موضوع منتشر بين العامه الا من رحم ربي
كنت دايم ادخل قسم المشاكل الاسريه واتفرج على هموم الحريم وكيف الحرمه تشتكي من زوجهيا وتصرفاته السخيفه
وحده تقول زوجي يخونني
ووحده تقول زوجي ماعمره تكلم معايه ولا طلع من البيت جواله اربعه وعشرين ساعه مشغوول
ياترى مع من يتكلم ؟؟

والثانيه تقول زوجي مقفل جواله برقم سري ويوم عرفت الرقم ليتني ماعرفته لاني اكتشتفت انه خااين
وتجيك وحده ضعيفه متزوجه من شهووور تقول زوجي يعرف وحده ويرسل لها صباح الخير وانا ماعمره قال لي صباح الخير
ووحده تقول سامحت زوجي كثير ورجع نفس الغلط
ووحده تقول ياربي مليت من تصرفات زوجي الغريبه كل مره يحلف ويرجع يغلط
بعد عشره 17 سنه اليوم راح اقول مثلكم
زوجي العزيز يوم انك تبي تدخل معايه حرب الخيانه شايفني غبيه مثلا ؟؟
للاسف هذا اللي حصل معايه
حياتي باختصار ماكان فيها اي بوادر من هذي الاقاويل لاني باختصار كنت عايشه جو اسري عاادي جدا جدا
مافيه من الرومانسيه مافيه من التجديد يعني حياة طبيعي مافيها من التقمص شي

المهم عشره دامت على هذا الحال حوال ال17 سنه يتخللها مشاكل اسريه عاديه ونرجع نتصالح وترجع امورنا تمام

واوقات لا شفت ان الوضع زاد عن حده وشفت ان زوجي بدا يتعامل معايه باسلوب اني امثل او اني مجرد انسانه بدون احساس انجن منه اكره الجلوس معاه في بيت واحد
تعرفون اوقات الحرمه لازعلت تبي احد يسمعها خصوصا زوجها ودها تدخل جو مثل الدول المتقدمه او الغرب في الماشكل لا صارت بينهم لان المشاكل هي ملح الحياه على قولتهم
واقصد الجوا الاجني مثل الغرب متقدمين بشكل ملحوظ الرجال لا تهاوش ولا اختلف مع حرمته عزمها على كوفي وتناقش معها بكل هدوء ورجع البيت وهم عرسان جدد
اذا اختلفو في مضووع في الغرب او الدول المتقدمه يجلس يستمع لحرمته لين تخلص كلامها ويبدا يتناقش معاها بكل هدووء
المهم انا طبعا ماعندي ذا الشي في قاموس حياتي انا اذا صارت بيني وبين زوجي مشكله تجلس المشكله لين هي من لحالها تنحل ومستحيل زوجي يبادر ولا يقول تعالي نتناقش وين اسباب الخلل اللي صار اليوم

هنا انا انفجر خصوصا لا شفت ان مالي اي علاقه في سبب المشكله وبدال ماتكون مشكله عادي تكبر وتصول اني اجلس بالشهور في بيت اهلي لاسباب تافه
المهم
نرجع لموحورحديثنا الاساسي
حصلت معايه مشاكل كثير مثل اي بيت والحمدلله تمر وننسى ونرجع نتخاصم وهكذا الدنيا

طيب وين المشكله
المشكله زوجي من يوم دخلت النت من حوالي شهرين وهو بدا يجلس على البلياردو يلعب يتونس مثل مايقول

يجلس شوي على البال توك شوي يتونس مثل مايقول يبي يسمع وش اخبار الشيعه
المهم من خلال هذي الفتر القصيره تعالو اقولكم وش حصل تغير لزوجي
عشان تعرفون ان الخلل جاي من وين وابيكم تقولولي

لا تجي وحده تقولي حاولي تشوفين وين النقص اللي فيك
انا اقولها زوجي من شهرين بدا يعني من يوم دخلت النت يعني مشكلتي ماهي من 17 سنه
لااااا
من فتره بسيطه
المهم اخونا في الله فاتح بس ذي الموقعين بالرغم اني مره شفته حاذف في سلة المهملات موقع وكله كلام فاضي وتعارف وزواج كنت عند اهلي وهو استغل غيابي وقام ياخذ راحته
الحاصل يا اخواتي زوجي وانا اعرفه ماعنده ذي الخرابيط يعني الحمدلله ماهو راعي سوالف سخيفه او تغضب ربي
الحمدلله محافظ على صلاته قايم معايه بكل مايرضي الله في حقوقي حنون معايه
لكن تفاجاءت انه يرسل لوحده رساله كاتب فيها شيلي الاصفار وابشري مافهمت مضمونها لكن واضحه
ورساله ثانيه مكتوب فيها صباح الخير المهم مازعلت على كثر مااستغربت انه قبل سبوع انا وهو كنا في نقاش حاد بسبب رسائل تجي مثل الاعلانات تعارف لقيته مرسل رساله انه عادي رحب وارسل رقم (1)ليكمل باقي تفاصيل الرسائله يوم سالته قال وحلف انه بس حب فضول يبي بشوف من اللي جالس يرسل وثقت فيه لاني اعرفه
ومازعلت مشينا حياتنا عادي
يجي يجلس على البلياردو يلعب وحاط المايك في اذنه يسمع مره حرمه توسلف ومره رجال ماكنت ازعل كنت اقول دامه محترم حدوده بس يسمع او يلعب دون تعديي الخطوط الحمراء مالي في وجع الراس وليه تدخل وليه تلعب بطبعي ماحب ابتدي مشاكل دامني مبسوطه نفسيا في بيتي اتركه
طبعا ماقلت لكم هو خلاص بطل يدخل روم الشيعه خلاص قنع وكرم منهم
قام يلفلف في كل الاقسام
كنت عادي ما ازعل خاصة انه مايهتم اشوفه بعيني اوقات يقوم ويترك البال توك مفتووح
يعين الوضع عنده عااادي

طيب هو يلعب بلياردو وكل مره يدخل باسمين مسميها نفسه
لقيته راسل على الجوال يعطيها اسمه الثاني (سكران ) وهو الله مرفعه عن ذي الاشياء
كان محتوى الرساله كذا لنتفترض هذا الرقم
94857457845
سكران
94857457845
شيلي الاصفار وابشري
94857457845
صباح الخير
طيب انا هنا وش بتكون ردة فعلي
بعد شفت ذي الرسائل منه ( شيلي الاصفار وابشري , صباح الخير , سكران)
خاصة ان هو بنفسه يستغرب من وضع الناس ويقولي معاد فيه خوف من ربي
امس جالسين انا وياه نتناقش في موضوع الفساد بين الناس وين اهالي البنات مايدرون عنهم اهاليهم

المهم
انا للحين ماناقشته باي شي ولا لاحظ علي لاني بطبعي ماحب المشاكل ولا احب اكون انا السبب فيها بالرغم انه كل ماحصلت مشكله يحط اللوم علي بقولة لو انك سويتي كذا كان انا سويت كذا لو انك صبريتي كان انا بجي اتفاهم لو انك مارحتي كان انا يعني كلها تشير عليه انه انا اللي فيها استعجل وكلها نا اللي فيها ابتدي المشاكل
وكله كووم ويوم يقولي تسوين نفسك زعلانه عشان تبين تروحين لاهلك
تخيلو معايه كلمة( تسوين نفسك) يعني امثل يعني ماعندي احساس
هذي الكلمه بحد ذاتها تشبب مشكله اكبر من المشكله الاساسيه
رميت له كلمه اني زعلانه منك وقلتها بضحكه مع حزن دفيين وقهر من قلبي احسني بصيح
تخيلو سالني وش فيه قوليلي يالله عااد شفيييه قلت بعديين اعلمك
المهم الرجال بعد ذي الكلمه انقلب حاله مسوي ثقيل وزعلان وحتى الشاهي ما طلبني اسويه يوم قلت لها ليه ماتبيني اسوي الشاهي قال لا ابي من بنتي تعرف تحبكه وهي ماعمرها سوته غير مرات معدووده
هذا وش معناته انه يبي يقلب الزعل عليه ويبدا النكد
الحين جالس طفشاان مدري وش عكر مزاجه هل كلمة انا زعلانه منك تسبب ذا الشي
ولا المفروض يجي يجلس جنبي يوقولي تعالي يا ام فلان وغلاتك وماعاش اللي يزعلك خبريني وش الهرجه
لا تفاجاءت ببروود منه ولا كانه في شي مزعلني من جد طيب فرضا لو مافيه شي واني مابينت من من باب الحب والتقدير انه يجي يلزم عليه الااقوله وش فييه
لا طبعا اخونا في الله راح المقلط وجلس وشغل على التلفزيون ولا كانه قدامه حرمه في نفسها شي تبي تقوله
لنفترض اني بعدين راح اعلمه اكيد بيحط الغلط عليه ويقولي طيب سالتك ماجاوبتي وشفتيني مالي مزاج وشايل هم
يعني اختياري للوقت ماكان مناسب متعوده على تبريراته

(والله لو غيره كان حلف يمين الطلاق انه يعرف وش ذا الشي اللي يخصه ويزعلني منه خاصة انه قايله له انا زعلانه منك في موضوع يخصك)

المهم انا عايشه في مكان ماحبيته ابدا في منطقه مغضوب عليها عايشه عشان زوجي حبيبي صاير هذي الفتره ماينزلني لاهلي كثير يتحجج ان ماعنده احد يروح لها ومره يقولي خلاص اعقلي اجلسي في بيتك
طبعا هو نسيت اعلمكم مقطووع من الاهل والزيارات بيتي مثل الاشاباح ماحد يدخله من الاهل والاقارب من الحموله يعني فرحتي باهلي الوحيده بعد ماقدمها لي الا بطلوع الروح كل بعد شهر ولا
بالرغم من قرب السمافه ساعه وانا عند اهلي
اعرف وحده صديقتي كل اسبوع او بالكثير اسبوعينوهي يا عند اهلها ولا عند اهل زوجها والمسافه 6 ساعات
يابختها يمكن زوجها يقدر انها لازم تكسر روتين الحياه
المهم هذي مشكله ثانيه لو بتكلم فيها عن زوجي وهي الانغلاق علىنفسه
لا اهل نسيت اخبركم اني ماشفت اهله من سنه تقريبا او اكثر
يعني لا جيران لا عالم ماغير انا وهووعيالي والبيت والترتيب والتنظيف
مع ذالك قلت معليه دامه معايه طيب وحنون ومايقصر
طبعا لا تغير ربع من اللي وصفته مستحيل استنى دقيقه في بيتي لازم اروح لاهلي لاني نفسيا ماقدر اجلس في بيتي وانا متهاوشه مع واخلاقه صايره متعكره
لاني ببساطه انسانه جيت من بيت كله هدوء ماعرف المشاكل من يوم عرفت ابوي وامي ماعمري سمعتهم يصيحوون الاخوان والاخوات دايم قلبوهم على بعض نشتاق لبعض نتفقد بعض نحب بعض
يالله وربي نخاف على بعض من جد نجلس نبكي لا مرض احد مناهلي
يعني انسانه بطبعي حالي حال نفسي ماحب اسمع صوت الصراخ ماحب اسمع شتم او سب اتضايق اتعب نفسيا اجلس ابكي احس برعب في المكان احس اني في مكان كله اشبااح
ماارتاح الا اذ انتهى الموضوعوحلينا المشكله بتفاهم و بسرعه ولا اروح بيت اهلي باسرعه وقت لين تنتهي المشكله
تقريبا مجتمعي كله اللي تربيت فيه ماكن فيه اي مشاكل او منازعات بين الاخوان والاهل
فلاتلموني يوم اقولكم اني ما اتحمل اي تغير من زوجي او اسلوب جاف
اهم شي عندي اكون عايشه في بيتي نفسيا مرتاحه لاحظو كلمة (نفسيا)
يعني ماطلبن مال ولاتغير كل شوي ولا طلعات ولا خرجات ولا اسواق
اسمع الحريم انا كل اسبوعين لازم في الويك اند اغير جوي
وهذا المفروض
انا تنازلت عن كل شي مقابل اني نفسيا اكون مرتاحه في مكان انا اجلس فيه
بغض النظر عن اي شي ثاني ودام عاجب زوجي خلااص اكون مثل ما انا بس اهم شي الهدووء والادب والاحترام المتبادل بين الطرفين مو مهمعندي التمثيل كيف اكون زوجه تجذي زوجها كيف تدلعين زوجك كيف تكسبين زوجك عايشه معاه بصدق وقلب نظيف احبه بكل ماتعني ذي الكله وهو بعد انسان حنون معايه لو اوزع حنانه على الكل كفاهم وزاد
رساله لك يا زوجي المحترم يا زوجي القدوه اللي نتعلم منك
ليه بعد ذا العمر اكتشف فيك ذي السخافات مابي اقول خيانه وتكبر في راسي واحتقرك
لا لا لا لاني مازلت محترمتك وباقي لك مكان في قلبي
لكن كيف بتكون حياتي معاك وانت قللت من رجولتك ونزلت من قيمتك لحثاله ماتسوى
ليه يوم ارسلت لها مافكرت ان هذا غلط وعيب
ليه يوم جلست على النت ماحطيت حدود بينك وبين ربك انه ماتتعداها
ليه يوم وثقت فيك وعطيتك الامان لعبت من ورايه (ماتقدر تسويها قدامي لانه شي غلط)
ليه تستغفلني
ليه يوم ارسل لها صباح الخير كان سوا اعادة ارسال لزوجته من باب المجامله وفرصه دامه كتبها لانه اول مره يكتبها في جواله ماعمري شفتها ابدا الا ذي المره
ليه ماخفت انه انا اعرف واسبب مشكله تنتهي بخراب بيت كامل
ليه الرجال يستسغر الحرمه في نظره ويشوف اللي يسويه مو عيب ولا حرام
ليه عادي عنده الغلط
ليه ليه ليه ليه
انت رجال تسوي كذا ليه طيب مافيه خوف من ربي مافيه امانه وعهد

ولا يمكن الوضع عادي وانا مكبرته
يمكن هذا الشي عادي بس تربيت في مجتمع يقول عيب وحرام
ليه تسوي الغلط وماتبي احد يغلط؟؟؟؟ هذي قاعدة الرجال
على العموم انا القرار للحين ماصدر مني لاني مازلت محتفظه بالهدوووء ورافعه راسي فوووق وانت حطيتك اسفل السافلين مازلت افكر وش بيصير اذا تواجهت معاك
هل بنتكر ولا بتقول مجرد لعب ووناسه ولا حب استطلاع
اخواتي طولت عليكم وانا معاطيتكم التيجه لكن لي رجعه معاكم

وطبعا هذا الموضوع راح اخليه في المفضله يشوفه زوجي ويقراه وبقولكم وش كانت ردة فعله
ولا ليش اقولكم انتم تابعو بصمت

ملاحظه اذا شفتوا اغلاط املائيه مافحالي اعدل اي غلط بقوم اسوي كاسة شاهي واستكن مع نفسي واشوف نهايتها لين وين بتوصلنا

كل وحده في بيتها نت انتبهي لزوجك حتى لو كان على فراش الموت
ترا مايعرف يستخدم النت الا انسان عنده خوف وضمير واحترام لنفسه قبل غيره


وملاحظه ثانيه انا مشتركه معاكم باسم ثاني لكن ماحبيت اكتب المشكله الا بذا الاسم لان حرام اكتب مشكلتي باسمي القديم :)