صدمتي في زوجي

بنات انا مصدووومه وتعبانه وماقادره  استوعب اللي صار 
انا ام لاربع اطفال صغار حياتي كانت على مايرام الى فتره قبل خمس شهور بدا زوجي بقفل جواله الخاص برقم طنشت الموضوع الى قبل فتره كان يفتح معي مواضيع عن الزواج والتعدد وكذا 
خفت من كلامه وخفت ليكون فعلا سواها وبديت اتحرى للموضوع 
بالصدفه في يوم نسي جواله مفتوح رغم انه حاط للواتس كمان رمز فتحت المكالمات لقيت رقم بأسم رجال وكان الرقم الوحيد اللي قدرت اكتبه لان رجع بسرعه واخذ جواله دقيت على الرقم مايرد ابدا من كذا جوال دقيت صرت اراقب جوال زوجي وهذا الجوال غالبا تكون مشغوله مع بعض اوقات مايخرج من البيت 
اخذت الرقم وقلت لزوجي افتح لي جوالك وشف لي من ذا الرقم مزعجني واول مادق ثلاث ارقام تغير وجهه وقفل الجوال وبدا يغير السالفه انا اصريت يفتحه وهو رافض وعصب سكرت السالفه وجاء اليوم الثاني وقال هات الجوال ادق عليه اعطيته وانا عارفه انه مسح الاسم على اساس يثبت لي انه مو عنده ولايعرفه سكت ورجعنا لحياتنا لين قبل يومين دق نفس الرقم على جوال زوجي طبعا دايم جواله صامت وكان بالحمام رديت واول ماسمعت صوتي سكرت الخط ولاتكلمت ولاتاكدت اذا هي رجال او مره كلمت زوجي 
انت ملزوم تبين لي من هذا الرقم وايش علاقتك به وهو التزم الصمت تكلمت تكلمت لين تعبت وهو ساكت عصبت وماعاد دريت ايش اقول وكنت اتكلم عن صاحبه الرقم وكان يدافع ويتنرفز اذا سبيتها واضح بوجهه ودعيت عليه وعليها من كل قلبي 
لين قال طيب لو قلت لك انها زوجتي ايش بيصير قلت مابيصير شيء كل واحد يشوف حياته والله يستر عليك وخذ عيالك معك قلت احلف انها زوجتك حلف انا هنا كن ماصب عليه مويه بارده حتى انه سكت ماقدرت اتكلم قلت تكذب كيف تزوجت وانت عندي طول الوقت بس مستحي تقول انك تعاكس 
قال لاتسئلين عن التفاصيل قلت طيب هات جوالي لانه كان معه بدق على اهلي بعدها قال ياخبله كيف اتزوج وانا بوجهك طول الوقت انتي تكبرين السالفه ومدري ايش وكلام كثير وبعدين حلف انه مو متزوج بس يبي يقهرني وعشان يرتاح من غيرتي ومراقبتي 
والرقم ماجاوبني لمن لايزال ينكر وانا تعبت جدا ابغى اعرف علاقته ذي بالحلال والا حرام علما انه في كلا الحالتين ماراح اسامحه بس ابغى اتاكد 
ابغى رايكم بنات شسوي لاني تعبت من ذا الحال 
علما هو طيب ومصلي ويخاف الله فينا ومايقصر علي 
وبالنسبه لصاحبه الرقم دقيت من كذا رقم وكانها عارفه انه انا ماترد ومره دقيت من جوال زوجي وفتح الخط بس ماتكلمت تكفووون ساعدوني لاتقلون اتركيه اخاف اطنش وتتطور العلاقه بينهم واذا تكلمت معه صارت مشاكل 
اختصرت الموضوع قد ماقدر سامحوني على الاطاله 
انا سجلت بالموقع عشان استفيد من خبرتكم