صدمت عندما عرفت .....!!!!!!

السلام عليكم ورحمة الله وبركاته

مرحبا بنات..
والله ما أدري وش أقولكم بس ماعندي أحد غيركم أشكي له همي بعد الله سبحانه....
مشكلتي بصراحة مزعجتني لي يومين...وأنا دموع وقلة نوم من التفكير ما أدري وش أسوي...
المشكلة إن لي ثلاث سنين متزوجة....وبعد أول سنة بدينا نفكر بشكل جدي في موضوع تأخر الحمل...
وكنت أعاني من إلتهابات بسيطة عالجتها والحمد لله... وأنا قالت الدكتورة إني سليمة مبدئيا ...
راح زوجي يكشف عند مستوصف وجاب نتيجة التحاليل وهو يقول إنه سليم والدكتور قاله إنه مافيه أي
شي بالعكس حالته ممتازة وأكثر من ممتازة وخصوصا في العدد...
حمدت ربي وقلت لازم نكتشف المشكلة عندي...وبدت بعدها المشاكل... زوجي سكت عن الموضوع فترة
ثم بدأ يلومني على إني ماعد رحت ولا شفت وش سالفتي وكنت أقوله لازم نروح أنا وإنت ويقولي لا
دبري نفسك روحي مع أخوك وإلا أمك وكنت أقوله هاذي مشكلتنا ولازم تحسسني بوقفتك معي ولكن لا
حياة لمن تنادي..المهم دبر لي أخوي موعد في مستشفى ورحت مع أمي وعملت التحاليل اللازمة وقالت
الدكتورة لازم الزوج يعمل التحليل زوجي رفض وقال مافيني شي أنا خلاص سويت التحليل ولا فيني شي
وخلاص بعدها ماعاد رحت للمستشفى...وسكتنا فترة ولصعوبة المواعيد في هالمستشفى كنت أبي أفتح
لي ملف في مستشفى ثاني وقدر زوج أختي يدبرها ومع إن الموضوع تم بعلم زوجي إلا إنه يوم جا الجد
رفض الذهاب لإكمال الإجراءات وعصب وقال منبي منهم شي ولا نبي لأحد فضل علينا مع أنه في الأول
هو أللي قالي قولي لأختك تقول لزوجها بس الظاهر ما كان متوقع إنهم بيقدرون يدبرون الموضوع...
المهم ست وصبرت بعد ما قال إنه يعرف واحد بيقدر يفتح لنا الملف وهاذا الكلام له تقريبا خمسة شهور
ولا صار شي وداني بعد هالسالفة وقبل 3 شهور وبعد المشاكل وداني لدكتورة قالت لي إن عندي ضعف
بسيط ولازم أعالجه وكتبت لي الكلوميد وأنا من وقتها ما إرتحت إني أخذها وقبل موعد أخذها بخمسة
أيام صارت مشكلة بيننا ورحت عند أهلي لمدة عشرين يوم وراح موعد الدورة ولا أخذت الحبوب
مع العلم إنه هو اللي تركني عند أهلي كل هالفترة بعدين رجعنا وكل ما قلت له لازم أراجع الدكتورة
عشان الحبوب قعد يلومني وإنتي السبب أنا وديتك وصرفت عليك وإنتي ماأخذتي الحبوب أقوله وشلون أخذها وأنا عند أهلي يقولي أنتي السبب ونرجع لنفس المشاكل ...
المهم قلت له عشان المصاريف خلنا نروح للحكومي إللي إنا تابعين له ونبدا معهم رفض رفضا قاطعا
وفي الأخيرقال لي والله مانيب فاضي للمستشفيات والمواعيد بصراحة شكيت في الموضوع بعد كلامه
هذا وقلت أكيد فيه مشكلة وفعلا عرضت تحاليله على دكتورة وكان الرد كالصاعقة علي





((زوجي عنده مشكلة وهي قلة عدد الحيوانات))

من بعد ماعرفت وأنا ماني مصدقة كل هالفرة يحملني المسؤولية ويشوفني أتعب نفسيا وأدور علاجات
ويلومني إني ماكلت الحبوب ويقولي إنتي السبب وهو عنده مشكلة...

والله دموعي على خدي من الصدمة لو قالي وصارحني كان صار همي هو همه وساعدنا بعض والله ماأدري وش أقول أفكاري مشتته وداخلي مشاعر مختلطة من وقت ماعرفت وأنا ساكتة معه أجاوبه على قد سؤاله وأقوم بواجباته بس ماقلت له شي هو يشوفني ساكتة ويعصب ويقول الجلسة معك مملة
طول الوقت ساكتة كأننا طرمان وأنا بعد أللي عرفته ماعندي كلام أقوله أحس أني مخدوعة ولا أدري وش أسوي كل ماشفته ذكرت إنه ماصان حبي له وتجاهلي لأشياء كثيرة من أجل حبه ولكن مشاعري الآن مختلفة وأخاف أن يتحول حبي له....أدعو لي وساعدوني بآرائكم هل أقول له ماعرفت أم ماذا أفعل؟؟؟؟؟واسفة على الإطالة...