صدمني الله يسامحه

السلام عليكم ورحمة الله وبركاته
زوجي اليوم صدمني صدمه عنيفه الا الان ماني قادره استوعبها

انا متزوجه من سنتين واهلي ناس مقتدرين ولله الحمد واهل زوجي بعد وزوجي حاله جدا ممتاز راتبه 8000 ريال وساكنين بشقه تبع فيلا اهله يعني مايدفع ايجار لاحظت خلال السنتين
انه ماسك شوي يستغلي الاشياء يدور الرخيص عادة
وانا ماتعودت كذا بس لما عرفت طبعه صرت اسايره ولا عمري ناقشته وكثير احيانا ابيع من ذهبي وهو مايدري عشان اشتري اللي نفسي فيه لاني مااتجرأ اقوله عطيني فلوس
هوصحيح يشتريلي
الشغله اللي ابيها بس احسه يتضايق اذا الشغله غاليه
المهم قلتله
ابي انزل السوق عشان اقضي للعيد وماحددت له مبلغ هو عطاني الف وماقلت شي حسيت انها ماتكفيني قمت وتركت كل المحلات الغاليه مع انه فيه شغلات كثير عجبتني ورحت لستي ماكس واخذت بلوزتين وقميص نوم وبيجامه
واحزمه
من نيو لوك انا طولت عليكم ادري بس ابيكم تكونون في الصوره اكثر المهم اليوم وانا الف السمبوسه بالصاله فتحنا نقاش عن الحريم والرجال مادري وش جابنا لسيرة المصاريف وقال ان الحياه صارت صعبه والمصاريف كثرت وقال اكيد بيجي اليوم اللي اخوانه يتزوجون ويطلبون انهم ياخون شقتنا واحنا نطلع عشان يكونون انفسهم عاد انا مطفوقه رديت وقلت وناسه بنغير بيتنا رد علي وقال من وين اجيب لك فلوس هذا انتم يالحريم الوحده لاجت تتزوج وهي اخذت دروس مكثفه كيف تنتف الرجال وتخليه على الحديده عشان مايلف ويدور على بالها انه اذا جمع له قرشين خلاص ناوي يتزوج عليها انا عشره الاف ريال على بعضها ماني قادر اجمعها قلتله انا اللي ماني مخليتك تقدر تجمع فلوس قال ايوه انتي من غيرك
عاد انا انهرت وقمت ابكي قلتله انا اللي رضيت البس للعيد من ستي ماكس وطقتها صرت انتفك انا اللي استغنيت عن جامعتي عشان رحمتك من المصاريف صرت انتفك (ادرس بجامعه خاصه خبري فيها وانا عند اهلي )
انا اللي يوم كنا بجده قلت لك ماله داعي نروح فنادق فخمه خلينا بشقه عاديه ورانا مصاريف لرمضان والعيد صرت انتفك
اسألكم بالله يابنات انا غلطت بشي والله هذا اللي صار مازليت عليكم بكلمه من جد ابي احد يريحني احس انه ماخذ عني فكره غلط اني جايه اخليه على الحديده مع انه يدلع نفسه ومايقصر على نفسه بشي يشحن جواله بالخمسين والميه وانا بعشره وعشرين واشتراك الدي اس ال ماينساه ويشتري ريسفرات اخر واحد كان بألف عشان قناه رياضيه ويشترك بالقنوات الرياضيه art والجزيره وطقتها ويهتم بسيارته بس انا لا
هو طلع وماعاد رجع وانا محتاره ارجع الاغراض اللي شريتها واعطيه الالف ولا وش اسوي لانه من جد جرحني