صديقتي المخدوعة الله يكون بعونها

السلام عليكم
هذا انا اكتب واختي معايه على الجوال وتعطيني تفاصيل قصة بنت جيران اهلي او بالاحرى صديقتي اللي دخلنل المدرسة انا وياها سوى .
هذي الله يسلمكم تزوجت وعمرها 19 سنه وزوجها كان في الكليه وسكنت اول زواجها بيت اهلها كم سنه لحد ماتخرج وتوظف زوجها وعمرها ماشكت الحال مع انه معروف الوضع كيف صاير لابيت ولادخل ولا اي شي .
صديقتي قمة في الجمال وكل شي فيها حلو والاحلى من كل هذا مرحه وفرفوشه وجلستها حلوه وزوجها مو لاني مقهوره لكن الحقيقه مافيه اي مقارنه بينهم . المهم زوجها جلس فتره وبعد كذا توظف في الهيئه وهو على مايقولون ملتزم .
وعلى طول استأجر بيت وخلته قصر من حلاوته لانها ذووووووووووووووق في كل شي . طبعا زوجها يصير ولد خالها .الاسبوع اللي راح اختها الصغيرة تنومت في المستشفى وجلست عندها يومين علشان امها ترتاح في البيت حنونه الله يرضى عليها .وتعرفت على وحده مرافقه مع بنتها ولمدة يومين وهم سوالف وضحك واخذوا ارقام بعض ولما رجعت البيت اتصلت عليها اللي كانت معاها في المستشفى يوم الاربعاء اللي فات تعزمها على زواج لبنت جيرانهم وقالت والله مااقدر احضر . وهذا الحوار اللي صار
المرافقه الثانيه . انتوا ماعندكم زواج بكره الخميس ؟
صديقتي : لا والله
المرافقه : انت متأكده ؟
صديقتي : اكيد والا كان سمعت
المرافقه : غريبه والله
صديقتي : وش اسمه ؟
المرافقه : فلان بن فلان ال ...........
وصديقتي من منطقة في الجنوب ولقبهم مو كثير تسمعوه يعني لو اسمعه انا كمان بيجيني شك وبسأل
صديقتي : تأكدي من الاسم
المرافقه : والله الكرت بيدي
صديقتي : بأي قصر ؟
المرافقه : قصر 0........)
وتتصل زميلتي على القصر وتتأكد من الاسم ويطلع فعلا زوجها
لكن لازال عندها امل واتصلت على اخوها - هذا يوم الخميس - وطلبت منه يروح القصر ويتأكد وفعلا اخوها راح وصور كل شي بالجوال والعريس حضرته يتمختر بين المعازيم وقام اخوها واعطاه كف وقال باعلى الصوت هذا التعبان تارك حرمته وعياله وجاي هنا يتزوج وقاموا زملاء العريس وطلعوا اخوها برا واخذ زوجها الميكرفون وقال هذا بزر وانا حرمتي عندها علم وموافقه .... وصديقتي ياغافلين لكم الله قالها بروح حايل كم يوم وراجع .
نسيت اقولكم الصدمه الكبيره اكتشفت انه اساسا متزوج من سنه مسيار تخيلوا :angry2:................. واشهر الزواج لانها حملت . واللي يقهر حتى ابوه مايدري مافيه الا خواته هم اللي راحوا معاه وهذا اكثر شي صدمها لانهم زي الاخوات
سألت عنها وقالوا نفسيتها تعبانه . الله يكون بعونها انا والله ماقدرت اكلمها
ادعوا ان الله يفرج همها ويطفي النار اللي في صدرها .