صديقتي تشتكي من زوجها الظالم ،،،

مرحبا بنات ، بدخل للموضوع على طول ، عندي صديقة دائم تشتكي من زوجها وهي عندها 3 أطفال وحامل ، وتزوجت زوجها زواج تقليدي يعني ماشافته ولا شافها ، زوجها انسان عصبي ومو مثقف وماعنده إلا شهادة ابتدائي وصديقتي جامعية ومدرسة وهو أبسط الأمور مايعرفها ، وفي بداية زواجها قالها : انه كانت له علاقات مع بنات وما قالها الكلام إلا بعد فترة من الزواج تقريبا بعد شهرين أو ثلاث ، ومع هذا سامحته وما قالها الكلام هذا إلا لما عرف معدنها الأصيل ، وزوجها مايصلي وبرمضان يصوم ولا يصلي ويدخن وفترة حملها تكره ريحة السقاير وهو ولا همه ، ومعاملته قاسية معاها ، ويلعنها ويسبها ويسب أهلها مع أنها والله ملتزمة وتعرف ربها وابتسامتها دائم على وجهها ، بس الله بلاها بزوج ظالم ، لا دين ولا أخلاق ولا معاملة زينة ، ومرة قالت لي أتمنى أكون مثل باقي الحريم عندي زوج يدلعني ويدللني ، مع أنها تلبس له قمصان نوم وتشكل باللبس بالبيت ، وقالت لي مرة : ان زوجها قالها انتي ماتنفعين تكونين زوجة لأنه ماعندك اللي عند الحريم يقصد صدر وخلفية، لأنها ضعيفة وهي قالت له : ليس ماتزوجت وحدة بالمواصفات اللي تبيها ، قالها : أهلي غصبوني عليك، مع انه يكذب ، لأن مرت أخوه قالت انه خطب بنات واجد ولا وحدة رضت فيه لأنه دائم يسافر وعنده علاقات ، وترى زوجته غريبة مو من أهلهم ، وتقول : كل ما سولفت مع زوجها مايرد عليها أو يسكتها ، وإذا سكتت قالها ليش ماتتكلمين. ، وما عندها صديقة إلا أنا ، وأنا أحبها من كل قلبي لأن نيتها صافي وقلبها أبيض وعمري ماطلبت منها شيء وردتني يعني انسانة بمعنى الكلمة واللي مثلها نادر ، وفي أيام نجلس مع بعض وإخليها تتكلم وتقول اللي بقلبها وأنا أسمع ودي أساعدها بس ماني عارفة شلون ؟ اللهم فرج على صديقتي همها وأشرح صدرها آمين يارب العالمين ،،،