اختي سفرجل اقري الموضوع عدل انا طلبت دعاء الاخوات لها لانها اتهمني وطلبت حل لمشكلتها ابي اعرف شلون اتصرف معاها لا فضحتها ولا شي انا ماذكرت اسمها ولو ما كنت احبها جان ماطرحت المشكله علشان الاخوات يساعدوني ولا ليش فاتحين قسم المشاكل الاجتماعيه وانا شرحت حالتها علشان البنات يعرفون شنو مشكلتها بالضبط ويساعدوني علشان القالها حل وبعدين مب بس اهي الوحيده اللي تعاني من ها المشكله علشان تقولين اني فضحتها في وايد بنات في مجتمعنا يعانون من نفس ها الامور وعندهم مشاكل اكبر واعظم من مشكلة صديقتي ولازم نبحث لهم عن حلول علشان انطلعهم من اللي اهم فيه كل يوم نقرا مشاكل ياما في ها المجلات وها النت صح ولالا؟

خواتي اذا ما عندكم حل لصديقتي اتمنى انكم تدعولها على الاقل يمكن وحده فيكم يصادف دعاءها ساعة اجابه .

هي لو حطت في بالها فكرة انا النطرة تولد الهموم والغموم والتفكير صدقيني ما بتستمر

مثلا تاخذ الامور بواقعيه اكثر يعني في النهاية هذيله شباب وخير ياطير اليوم بيشوفها بكره يشوف غيرها وهي شو بتستفيد يعني يوم تقعد وتطالع به مضيعة وقت وهم قلب لا اكثر تمشي وما عليها من حد الناس مشغوله في هموها وبلاويها وما عندهم وقت

ومن راقب الناس مات هماً

الله يهديها ويفتح على قلبها..

يااختي لاتيأسين أبد منها..تكلمي معها وناقشيها في حالها ووضعها ..

اقعدي معها جلسة مصارحه مره ومرتين وثلاث..ذكريها بربي..

وان كنت اشك ان هالطريقه تنفع معها لأنها ماتبي أحد ينصحها ويذكرها بربها..

وقولي لها انها ترى ماتسوى شي بنظر الشباب..وانهم مااهتموا أبد ولاعمرهم فكروا فيها..

ذكريها بمكانتها وانها انثى وانها المفروض تحفظ قدرها الغالي..الاغلى من الألماس..

واذا ماارتدعت قولي لها انا مااقدر انزل معك السوق ابد لأنك تفشلين..

وتذكري أخر الدواء الكي..لو مانفع معها شي قاطعيها ايه قاطعيها..خلي علاقتك معها رسميه..

عشان تحس بذنبها وعشانك انتِ ياغاليه لاتاخذين ذنبها..

يااختي وين أهلها شلون وضعهم؟؟

ماعمرك فكرتي تكلمين احد من خواتها ينصحها او ينتبه لها او ينزلون معها للسوق..

ياليت واحد من اخوانها يوصلها مكان ماتبي ومايتركها أبد,,عشان مايخلي لإبليس طريق عليها

والحمدلله رمضان جاي ويارب تكون هدايتها قريب ..

لاعدمناك ياغاليه..

عزيزتي جنان...

بالفعل هذي مشكلة معضمنا نعاني منها.... ولو مانحب الخير لصديقاتنا وحبيباتنا جان خليناهم واهتمينا بأنفسنا..
بس تراه فينا نفس المؤمن الطيبة ... اللي تحب الخير لها ولغيرها...
الله يهدي صديقتج ويهدي صديقاتي الغاليات بعد...

الغالية ... كد مرة سمعتي شريط "قلوب زائغة" لخالد الجبير؟؟؟
سمعيه حبيبتي ... ففيه من الموعضة لمن تجبر على الله وعصاه مايردع السامع عن فعلها بإذن الله...

فمثل حالتها... وبما أنه كان لديها خلفية عن المحاظرات ... فأنصحج انج تعطينها المحاظرات اللي أغلبها تهديد ووعيد وتهويل وتخويف.... لتكون سياطا لقلبها .... فتهتدي بإذن الله,,,, والحلول العملية أفضل لمثل حالتها.... فمن الممكن انج لما تعطينها شريط ... تركنه على جنب وتقول انها عارفه شو فيه وتهمله... أنصحج بأنج تختارين لها وقت مناسب... تعزمينها على بيتكم أو في بيتهم ... ويكون لكم وقت معين اسبوعيا تستمعون فيه لمحاظرة بدل روحة الأسواق اللي ماتزيد الطين إلا بلة.... خذيها لمحاظرات تقام في منطقتكم ... فربما يمس كلام المحاظر قلبها فتهتدي بإذن الله...

كوني بنفسك داعية لها .... كوني داعية لصديقتك.... عظيها باللتي هي أحسن... أرخي لها إن فترت أعصابها ... ارفعي يديك أمامها إلى الله و ادعي لها ولك بالهداية... أبغضي تصرفاتها... وإن تطلب الأمر ابتعدي عنها وراقبيها عن كثب ... انه من المهم ان تعلم أن تصرفاتها لا ترضيك ... وأنه باستمرارها على هذا المنوال ... فإنها ستفقدك وبالتالي تفقد مصدر الخوف عليها... تشجعي وتظاهري بالابتعاد... فإن كنت لها حبيبة فلن ترضى ببعدك... وستضيق وتتخلى عن تصرفاتها اللي أغضبت ربها وترجع اليك ... كان بنو اسرائيل "لايتناهون عن منكر فعلوه" وهذا ماضيعهم وضيع الايمان في قلوبهم... فقد لعنوا بتصرفهم هذا .... "لعن الذين كفروا من بني إسرائيل على لسان داود وعيسى ابن مريم ذلك بما عصوا وكانوا يعتدون ، كانوا لايتناهون عن منكر فعلوه لبئس ما كانوا يفعلون"
خذيها وعرفيها لبنات مشهود عليهن بالخير ... صالحات تقيات.... والله انهن في كل مكان تبارك الرحمن.... خلها تندمج معاهم ... وتخالطهم معاج ... كلمة طيبة من كل اخت ممكن انه تجبر قلبها وتطيب خاطرها وتغير اللي فيها... صدقيني بتستحي تسوي تصرفات حمقاء أمامهم وبتكنلهم الاحترام بإذن الله... وهذا حالنا نحن مع الصالحين...
كلفيها بمهمات خيرية... توزع شرايط ... كتيبات .... وخليها ترد لسابق عهدها....

وثقي انه هيه مالها غيرج... وماتقدر تتخلى عنج ... لأنه مبين انج الوحيدة المهتمة لأمرها... فبإذن الله مابتردج في أي نصيحة أو موعظة ..
ومالج إلا انج تتوكلين على الله.... والله يعينج عليها....

وسمحيلي ...

بنت الشيخة...