صديقتي تغيرت !! 💔

مرحباً بنات انا جديده بالمنتدى بس كنت زائره واستفدت منكم كثير🥺
موضوع صديقتي عادي جدا ولا هوه مشكله لكن للامانه ماعندي اخوات افضفضلهم واول شي فكرت فيه انتم ابغى كلام منكم يبرد قلبي😭🤎🤎
الكلام ممكن يكون طويل اعذروني🤎🤎

# انا انسانيه مش انطوائيه ولا اجتماعيه يعني وسط اسولف مع الكل لكن ما اصاحب الا اللي اشوفها مثلي وارتاح لها يعني تقدروا تقولو معي صديقاتي حقين الدراسه ..
حكايتي تبدأ من لما توظفت تعرفت ع صديقه صارت اختي وصديقتي وكل شي نسولف مع بعض ونطلع اسواق مطاعم كوفيهات صالون حتى المستشفى احيانا لو وحده فينا تتعب نروح مع بعض هيه عندها اخوات لكن بينهم مشاكل ف صارت تفضفض لي كل شي عن حياتها اسرارنا لبعض ف اي وقت احتاجها الاقيها موجوده وهيه كذلك لو تحتاجني تلاقيني موجوده حتى اهالينا خلاص سارو عارفينا اننا زي الاخوات لدرجه كان عندي زواج قريب لي بمنطقه ثانيه راحت معانا ، كان عندها صديقات لكن ماتتواصل معاهم هيه من النوع اللي اذا معاها صديقه بدوامها يعني قريبه منها في نفس المكان ب تضل معاها وتنسى الباقي وكمان من النوع اللي ماتمسك الجوال كثير ولاتهتم فيه كانت تقول لي صديقاتي يرسلولي واتس مافيني ارد عليهم ، لما انا انخطبت قالت لي لاتطلعي زي البنات اللي بعد الزواج يتغيرون ويسحبون ع صديقاتهم قلتلها انتي عارفه طبعي ومستحيل اتغير ع الناس كلها ، دوامي تركته لما تزوجت المهم بزواجي وقفت معايا ولا قصرت ابدا وبعد زواجي زارتني كذا مرا وكنت اتواصل معاها طبعي مثل ماهوه ماتغير لا عليها ولا على باقي البنات .. بعد زواجي بشهور بدأت اشوفها تتغير سحبت نفسها ماسارت تتواصل وانا عارفه طبعها مش حقت جوال انا ماقصرت كنت انا اللي اقولها يلا نطلع، بعد زواجي هالكلام💔 واشوفها ماتبادلني هالشي ماعمرها رسلت قالت يلا نطلع او بزورك ما ادري لاني تزوجت؟ 😓 طيب انا مثل ما انا وزوجي الحمدلله عادي عنده الطلعات، وكذا مرا عزمتها في بيتي و عزمتها برا وهيه لحد الحين مافكرت تقوللي يلا نطلع تغيرت مليون درجه واشوفها بسنابها تصور طلعاتها مع البنات حتى رساله ماترسل تتطمن وتسال وارجع احط لها اعذار واقول هيه مش حقت جوال لكن معقوله جحدت الايام اللي بينا ي بنات لو اتكلم من الحين لبكرا ماوصفلكم قد ايش كنا مع بعض صح اني عرفتها سنه وحده وبعدها تركت الدوام وتزوجت لكنها مليانه مواقف كثيره اثبتتلي انها صديقه عنجد وحقيقي بس مدري ليه سارت ماتكلمني بعد زواجي ، انا ع طول جاء في بالي حركاتها مع صحباتها لما كانو يرسلولها ماترد قلت يمكن الحين هذا دوري لاني اللي استنتجته من طبعها الصديقه اللي معاها بالدوام تكون معاها وتسحب ع اللي ع الجوال .. ايش تشوفون طبعها مصلحه ولا مالها خلق تتواصل يكفونها اللي معاها بالدوام ولا ايش ؟؟؟؟
المشكله ماعندي اخوات وهيه عوضتني عن الاخت وفجاه بدون مقدمات سحبت احس اني ضايعه وحيده ودي صديقه تكون معايا زي اختي انا عندي صديقات وفيه صديقه مقربه من ايام الدراسه بس عادي نتواصل وزيارات رسميه لما ترتب وضعها ولازم قبلها بكم يوم تقول بجيك انا ماحب كذا ابغى ناس خفيفه بدون رسميه ..