صديقتي حيرتني بحركاتها ؟؟؟؟؟

السلام عليكم ورحمة الله وبركاته


بنات انا عندي صديقه لي قديمه من 6 سنوات تقريبا بس مرررره محيرتني وتعاملها معي غريب

انا اقولها كل شي يخصني ولا اجحد عنها ولا شي ومطلعتها على كل اسراري لاني احبها وارتاح لهاا مرررره


وهي بالمقابل كل شي لها تجحده عني بشكل ماتتصورون هي صديقي من ايام ثالث ثانوي واللحين حنا تخرجنا من الجامعه ايام الثانوي كانت تسولف عن اهلها ومشاكلها بالبيت عادي يعني وهي ماشاء الله الله يتمم عليهم بخير وضعهم مستقر وانا كنت ددايم اقصص لها عن وضعي انا واخواني وان امي مطلقه وكذا ومن بعدها خلاص انكتمت ولا عاد تحكي لي ولا شي عنها

وقبل تقريبا سنه سوت عمليه لعيونها ولا علمتني ويوم كلمتها وقلت لها ليه ماقلتي لي قالت فجاءه ولا علمت احد ومن هالكلام وانا مشيتها

وعقبها بكم شهر ارسل برود كاست لكل اللسته ان ملكتها كانت امس وباركت لها وكذا وسكت بعدين جت كلمتني وقالت انها نوت تقولي وانشغلت وموب قصدها تجحد

احس انها قاصده ماتعلمني واضح يعني

ولها متزوجه اللحين حول 9 شهور الله يوفقها ويسعدها تخيلوا عمرها ماطرت رجلها قدامي ولا حتى اسمه ولا شي عنه ماكانه متزوجه اصلا

وانا طبعا ماسالها ابد بس احس جحدتها غريبه ولا شي تقوله وبالمقابل بس تسالني لو احط صوره ولا اغير توبيك بالبي بي وش عندك وش فيكم وراك متضايقه ومن هالاسئله وانا عادي اجاوب ولو متضايقه اقولها وعادي

وهي كل ماسالتها عن حالها ولا حسيت انها ضايق صدرها تقول مافيني الا العافيه

ودااايم تقولي انها تحبني وتعزني وتعدني وحده من خواتها ومن هالكلام اللي تلحس فيه مخي واذا شفت افعالها مافيه ولا شي يثبت مرررره مبعدتني عن حياتها ولا تبيني اشاركها ولا بشي

وللمعلوميه يوم تملكت ولا علمتني من الاول عادي فرحة لها وركضت اجيب لها هديه وافرحها


وش رايكم انتم بتصرافتها ؟؟هل تحسون انها صدق شاريتني ولا بس كلام للعلم والله اني احبها ومتعلقه فيها واكثر صديفاتي افضفض لها وارتاح لها بس اذا تذكرت انها كل شي تجحده عني مررره اتضايق وسبق وسالتها قلت لها ليه انتي مسويه هاله على حياتك الخاصه قالت انا كتومه

بس ماش ماتخش المخ على قولتهم

شورو علي وهل صح اني افضفض لها ولا مايصلح وهل تحسون جحدتها المبالغ فيها تخاف اطقها عين ولا وشو تكفون انا ماعندي خوات انتم خواتي انصحوني

والله يجزاكم خير ويسعدكم