روض الفل @rod_alfl

محررة برونزية

صديقتي خطبها واحد أكبر منها بـ 15 سنة .. شوروا عليها توافق ولا ترفض ..

السلام عليكم ورحمة الله وبركاته ..

أخواتي .. صديقتي عندها سالفة وتبي تاخذ رايكم فيها ..
أولا خلوني أكلمكم عن وضعها ..

أمها تزوجت أبوها وماجلست معاه الا كم شهر بعدها تطلقوا .. وطلعت حامل بتوأم وجابت صديقتي وأخوها ..
عاشوا عند أمهم وما تزوجت الا لما صار عمرهم 15 سنة .. وخلتهم عند أمها "جدتهم" وسافرت مع زوجها لمقر عمله في الرياض .. بعدها بكم شهر توفت جدتهم وأصر أبوهم انه ياخذهم عنده ..

تدهورت أوضاعهم والولد انحط مستواه الدراسي وأخلاقه بدت تتغير شوي شوي .. مع انه كان ماشاء الله مضرب مثل في الأدب .. ونحفوا وتغيرت صحتهم لكنهم ماشاء الله مره صبورين ..
وأبوهم كان تعامله معاهم سئ جدا .. وكان شكاك مرره لدرجة ان الولد كان ينام لحاله في غرفة كنه سواق وما يرضى له انه يدخل على زوجته أو حتى يشوفها ويغطيها عنه "زوجته من جنسية عربية" .. وكان مقصر عليهم ماديا ما طلع لهم جوالات وماشرا للولد سيارة وكل مره يوعده ويخلف ويعاملهم غير عن عياله الثانيين .. ظلمهم ظلم الله يجازيه عليه .. مع ان ظروفه المادية كانت ممتازة وكان وكيل أعمال لأمير وله نفوذ وأهله سمعتهم طيبة لكن هو غييير عنهم

أما أمهم مثال في الطيبة الله يسعدها ومن بيت علم ودين .. والكل يشهد بأخلاقهم .. ما توفقت مع زوجها الثاني وتطلقت ومابقى لها أحد بعد وفاة أمها غير أخوانها .. وطبعا الأخوان لابد انهم يلهون بحياتهم .. لكنها ربي رحمها انها عندها وظيفة مدرسة في محو الأمية براتب ألفين ريال

زبدة الموضوع .. صديقتي السنة الي راحت تخرجت من الكلية الحمد لله وتو متقدم لها واحد من أهل أمها ..
الرجال عمره 37 وراتبه 3000 .. وشهادته مو أكثر من المتوسطة .. ويشرب شيشة .. لكنه محافظ على صلاته وطيب وأهله أخلاقهم طيبة .. وهو شكله من قبل يحبها وحاط عينه عليها لكن أهلهم مالاحظوا هالشي بحكم فارق السن ..
وهي يا بنات وضعها شرحته لكم .. ومتوسطة الجمال .. وجامعية وطييييبة ماشاء الله عليها ..
وتقول انها لو وافقت بتشرط عليهم شقة .. والرجال مثل ما قلت راتبه قليل .. وتقول ان أهله حالتهم المادية زينة
وأبوها مستحيل يساعدها بشي هذا اذا ما تسبب ورفض يزوجها بأحد من أقارب أمها
وأمها طبعا راتبها ضعيف وعساها تعيش نفسها

طبعا خلال الفترة اللي راحت قليل اللي تقدموا لها ومواصفاتهم مو ذاك الزود .. وهي يا عمري ودها تعرس وترتاح من هم أبوها .. لكن برضو خايفه لايجيها هم أكبر منه ..
غير كذا انها طول عمرها متعودة على الصرف وأمها ماكانت تقصر عنها بشي .. حتى لو تتسلف بس تجيب لها اللي تبيه

لو كنتوا مكانها راح توافقون ..
تكفون شوروا عليها .. حالتها حالة والموضوع شاغلها وخايفه ان سمعة أبوها وكره الناس له تخرب نصيبها .. :(

يلزم عليك تسجيل الدخول أولًا لكتابة تعليق.

تسجيل دخول

ام اتووري • 15 سنة

مادري
بس خليها تستخير 7 مرات وتسال عن اخلاقة واذا في نصيب ربنا كاتبةلها

قلبك الدامي • 15 سنة

خليها تستخير وتتوكل على الله

روض الفل • 15 سنة

أم أتوري .. قلبك الدامي

الله يسعدكم يا رب على سرعة تجاوبكم ..
هي بعد كل صلاة تستخير وتحس انها مرتاحه .. بس برضو تبغى مشورة

رذاذ الرياض • 15 سنة

خليها تستخير وتتوكل على الله

الفقر ماهو عيب ومصير راتبه بيكبر ويعيشون وهي بعد ربي يرزقها بوضيفه ويتساعدون

خفق الجنان • 15 سنة

انا ارى انترفض وبشده ,,
الواضح انه اول واحد يتقدم لها
يعني بصراحه 3000 وش تسوى هذي الايام وبعدين خليها تشوف وش اللي مانعه مايتزوج طول ها اللسنين ...
وشيييييييشه والله بالعقل مايحتاج تستشير ترفض وبدون اي نقاش
تبغى تفتك من آذىابوها تطيح في واحد مايعرفها من قبل (اشلون بيرحمها )والله ابوها احسن

ولا تيأس نصيبها باذن الله راح يجيها

وانصحيهابالاستغفااااااااااااااااااااااااااااااااااااااااااااااااااااااااااااااااااار

والله يوفها وبنات المسلمين اجمعين