صديقتي داخله على الله ثم عليكم ساعدوها

السلام عليكم ورحمه الله وبركاته

اخواتي اعضاء منتدى عالم حواء.
والله ثم والله اني احبكم في الله، انا استفدت وايد وايد من خبراتكم ونصايحكم وكل الي تكتبونه من مواضيع عسى الله ان يجعل هذا كله في ميزان حسناتكم يارب.

وانا اليوم ييت انقل لكم مشكله وكلتني صاحبتها بالكتابه( الله يستر عليها) وحابه تستفيد من خبراتكم ورايكم ونصايحكم كنساء و كبنات مسلمات.

اممممممممممم ماعرف من وين ابتدي بس اتمنى انكم تاخذون الموضوع برحابه صدر واسعه, كلنا نغلط ولكن خير الخطائون التوابون، ولا شرايكم.

بس انا بانقل لكم الي شفته والي توكلت اني انقله لكم, صديقتي او صاحبه الموضوع الي اتكلم عنها في عمري, عمرها 24 سنه, وفي مراهقتها كانت مستقيمه جدا جدا, وتحب ربها وشخصيتها قويه, وملتزمه اخر التزام, لغايه مادخلت الجامعه.............
وفي الجامعه لان في البحرين عندنا اختلاط فكانت هناك علاقتها مع الشباب بحكم الدراسه والمحاظرات والبحوث, وماجذب عليكم انها في اخر سنه من سنوات الجامعه ارتبطت بعلاقه حب مع شاب كان يبي يتزوجها وكان نيته الزواج واول ماكلمها قالها انه حاب يتزوجها وعلشان جذي اهي كلمته واقنعها الخبيث انه حاب يتعرف عليها بالاول وتتعرف عليه وتالي تم مراسم الخطبه لانه يبيها, وكانت بينهم مكالمات هاتفيه وتشوفه ويشوفها في الجامعه مده 6 شهور وعقبها لما قالت له يا تتقدم او انهي كل شي بيني وبينك لان المده طالت تركها, وانصدمت بعد ما تعلقت فيه وماعرف اذا حبته او لا بس الي قالت لي انها كانت على حافه الجنون من الصدمه الي شافتها لانها انسانه شفافه وفي بالها ان الناس كلهم طيبين, ولانها على نياتها وايد وتحسب ان الناس مايجذبون او مافي الدنيا ذياب الله يكفينا ويكفي خواتي المسلمين والمسلمات منهم يارب, وتمت منصدمه وحالتها حاله ( يعني حالتها صعبه) وكرهت الشباب, وكانت دايما تصيح( تبكي) وتدعي في صلاتها يوميا ان الله يهدي سر هالانسان ويتقدم لها لان اهو الانسان الوحيد الي صار فريب منها, بس الله ماكتب وسبحانه اكيد في خير وصلاح لها.
المهم بعدها تخرجت وشوي شوي نفسيتها صلحت وصار كلشي اوكي, وكان ماعندها الا صلاتها واهتماماتها وشوي وربي وفقها بشغل.
وبعد الشغل تقدم لها واحد سالو عنه اهلها وكان مناسب وفوق انه يكون مناسب, وايامها كانت تقولي هل انا استحق فعلا هالانسان مع اني من قبل كنت مكلمه شخص غيره ( يعني كان فيها نظره سلبيه لنفسها لانها شفافه زايده عن الزوم) ولان الشفافيه الي فيها راحت يوم ارتبطت بعلاقه مع انسان.
وهذي الي تقدم لها حجزها لسنتين لانه رايح دورة واهلها يبونه, وسمحوا لها مدام صارت العلاقه رسميه، انها تكلمه بالتلفون علشان يتعرفون عليه اكثر, واحين وصلنا صلب الموضوع.

كان خطيبها اول الايام يتصل فيها دايما ويتهم فيها لي غايه مابدت تميل له, وعقب حوالي سنه اقتنعت انه مناسب لها من حيث التفاهم الثقافه و المستوايات الثانيه, وبعد هالسنه، هو دخل فتره امتحانات وبدا ينشغل عنها وهي متعوده عليه وعلى اتصلاته, وعلى سواله الدائم عنها, ولما ناقشته حول هالامر وبخها وقالها ان لازم تحاسب له لان عنده امتحانات( في نظري انا من حقه لان داخل بفتره امتحانات) المهم بدت الاخت تدش مواقع شات وتضيف الناس على ايميلها وبدت تسولف مع شباب بالمسنجر لين ماوصل فيها الحال ان واحد منهم عطته رقم موبايلها وبعد اول مكالمه صارت وعت للي تسوي وغيرت رقم الجوال ثاني يوم على طول, ولما قالت لي وسالتها ليش سويتي هلون؟ قالت لي انها كانت خايفه انها تتعلق في خطيبها وتحبه ويطير مثل الحبيب الاولي, وهي تخاف من الالم الي شافته اول مره, وطبعا هي بدت تبعد المسافه الي بينها وبين خطيبها, وكانت تقولي احس فيه بعيد من الي انا سويته, انا ما أخلصت له,ولكن اهي قررت اتوب توبه خالصه لربها تبي تطهر كل شي سوته, وقالت لي انها راغبه فعلا بانها تخلص لخطبيها وانها تصير زينه وهي تحاول جاهده, بس هل الله بيسامحها, او بيعاقبها وبيبعد عندها الخطيب ولد الحلال هذا, ولم اكانت تكلمني كانت تتكلم وتصيح وتبكي حرقه, وتقول انا بنت زينه واحب ربي وايد, لكن الشيطان قص علي اكثر من مره, وانا احاول جاهده اني استقيم من جد علشان نفسي وعلشان هالانسان الي بارتبط معاه, وهي فعلا ماتبي تخسره من حياتها, وانا قتلها مدامج فاهمه ظروفه لازم تقدرين اكثر, وتفهمين اكثر وتصبرين, والصبر زين لج وله.
واهي توسلتني ان اكتب لكم القصه وتقول لكم انها بدت انسانه جديده ماعندها احد غير ربها وعبادتها لكن خايفه ان الي سوته يخرب عليها بموضوع الخطبه, والله يجازيها ويبعد عنها الخطيب الطيب, وسالتني اقولكم شنو لازم تسوي احين, وهي ماتبي خطيبها هذا يروح عنها لانها تحبه, والريال شاريها وايد, طبعا انا قتلها ان رحمه الله محد في الدنيا ييأس منها الا الكافر, لكن هي قالت لي بس لاتنسين ان القاعده تقول الطيبون للطيبات والخبيثون للخبيثات. وهي خايفه لان حاسه ان الي سوته خبثت نفسها, وتبي تصير طيبه وتيبي ربي يوفقها بخطيبها ويتمم عليهم لغايه مايرجع وتم الملجه باذن الله.
فيا خواتي قولوا لي شنو رايكن بالموضوع, وشنو دوري كصديقه لها, وانا اعرف ان هالانسانه شفافه, وتحب ربها ونفسها لوامه وايد فلاتبخلون علي بنصيحكم جزاكم الله الف خير.
وبعد هي داخله عليكم بالله وتقولكم ادعو لها بالهدايه الي لا ظلال بعدها وان الله يتقبل توبتها ويوفقها بالخطيب هذا ويصلح بينهم.
اتمنى اسمع رايكم في هالموضوع وانكم تتقبلونه برحابه صدر واسعه.
اسفه على التطويل في الكلام بس ان شاء الله يكون مفهوم و واضح.
والله يجزاكم الف الف خير.