... صديقتي ضيعت مستقبلي !!!!!

السلااام عليكم ورحمة الله وبركاته
راح ادخل بالموضوع على طول :(
قصتي بدأت لما تخرجت من الثانويه وصار الها الحين تقريبا سنتين وشوي لكن آثارها لحد الان موجوده ولحد الان اعاني منها برغم اني تعودت اني اتعايش مع الالام والحزن الي فيني . ألا اني في بعض الاحيان اعلن احتجاجي واصرخ واقاوم الواقع .. (تخرجت من الثانويه العامه وما حالفني الحظ بالنسبه المرجوة وما سمح لي مجموعي اني ادخل الكليه الي ابيها ولكن ابوي ما قصر معاي( الله يحفظه) ودخلني كليه على حسابه (كلية التمريض) برغم انا هذا المجال صعب علي شوي بحكم اللغه تعرفون.. المهم قلت عشان ابوي ماحبيت اكسر خاطرة ورحت.. المهم صرت اقنع صديقتي المقربه لي انها تجي معاي لان نسبتها مثلي تقريبا وكانت ترفض بشدة مجال التمريض.. عاد ما مضى لي اسبوعين هناك الا واهي كل يوم متصله لي وتقول كلام بصراحه انا يضيق خلقي منه وكنت اتأثر مثلاً: التمريض شغله مو زينه_ الممرضات يقولون عنهم كلام غلط _ ما احد يبتزوجج عشان انتي ممرضه _ نظرت الناس للمرضه انهها مستهترة ومنفتحه) وكلام من ذا القبيل وكان ذا الكلام يخليني احس بضيقة خلق مو طبيعيه .. المهم عاد هي في ذيك الفترة كانت بتسجل في دبلوم حاسب.. وش الي صار ؟؟ قالت لي اسمعي كلامي وتعالي معاي وعلى طول بنتوظف وبعد اصرار اقتنعت بكلامها (ادري راح تقولون على كلمه توديني وكلمه تجبني)بس شسوي كنت على نياتي وما توقعتها شذا قلت تبي مصلحتي .. وقلت لابوي وابوي عشانه يحبني وااجد ماعارض اول شئ قال لي المجال ذا احسن قلت له لا ابي اروح مع صديقتي .. المهم رحنا مع بعض الحاسب وما صار النا يوم والا واهي تقول وش ذا المكان بصراحه المجال ما عجبني وواجد صعب ونا ما خبي عليكم ما كنت مرتاحه صحيح للوضع هناك .. صارت تتصل لي وتقول خلنا نطلع ونروح مكان ثاني صرت اقول الها وين انروح تقول في اماكن واااجد لا نتورط عندهم بجي امتحانات قريب .. واتفقنا انا ماراح نجي وودعنا البنات وقلنا الهم اننا ماراح نجي من بكرة وسلمنا عليهم وطلعنا ...
اجا اليوم الثاني الي المفروض انا مانروح المعهد .. ماشوف الا يرن التلفون علي الا وهي بنت معانا في المعهد وتسألني :ليش ما جيتي يافلانه اليوم ترا صديقتج اجت،عاد انا انصدمت وقلت في نفسي مستتتحيل يصير الشئ هذا وهذا احنا متفقين معقوله؟؟؟ قلت لنفسي صبري يا بنت وانتظر لحد ما تتصل صديقتج لج ايه ابيه اعرف منها وش السالفه.. اجا وقت المغرب والا واهي متصله الي ولا كأنه شئ صاير وتتكلم عادي وكنت تاركه الها المجال ابي اعرف منها اهي السالفه.. وش تتوقعون قالت الي ؟؟ قالت : شاقول لج اليوم كان زحمة عندنا (لاحظوا عندهم ) وانا مالي دخل في الموضوع .. ايه ولاسبوع الجاي امتحانات وقلت راح ابدي اذكر من اليوم ‍‍‍‍‍ .. عاد انا ساكته ومتفاجأة من الشئ الي تقوله وكل الي قلت الها الله يساعدج واهي عادي تقول لي جميعا وسلمت علي وسكرت(وربي الى يومكم هذا ما سمعت صوتها وكانت اخر مكالمه) .. صرت ابجي وقول وش فيها والي حز في نفسي انها ماقالت لي ليش ما شفتج ليش ما تجي (بحكم ان احنا مع بعض في السالفه ) .. كلمتني وحده من معارفنا وتقول لي عنها انا فلانه ابوها ضغط عليها وما عرف ايش.. طيب ضغط عليها ليش ما قالت لي ليش ما علمتني .. طبعا انا ماقدرت اروح الايام الي بعدها لانه احنا لما نوينا نطلع رحنا وقلنا الى الادراة هذا الشئ وخلصنا الموضوع مادري اهي شلون راحت يوم ثاني وحتى لو رحت مادري بحس بشئ مو حلو.. تصدقون اني تعذبت واجد وربي ما يجي يوم الا وانا ابجي فيه.. وتوني من اسبوع بس سمعت عنها انها توظفت ومبسوطه وأنا جالسه اضرب كفا بكف واتحسر على الي ضاع من عمري وعلى اني سمعت كلامها وكل ما اذكر اقول ضاع مستقبلي ..كل مكان اقدم فيه ما يأخدوني (برغم اني اخدت دورات) حسافه لو يرجع الزمان للورى كان سويت وسويت بس للاسف .. ادري انا كل ذا مني الي طاوعتها لكن وربي بحسن نيه وكنت افتكرها تبي مصلحتي ..
تدرون اني لحد الحين ماعلمت ابوي وامي وش سبب طلعتي من المكانيين واذا سألوني عنها:ليش ما تكلمج وما تكلميها اقول الهم شئ صاير وما بي اتكلم فيه لاني مابي اتعرض الها بسؤ او اشوهها في نظرهم..
سامحوني على الاطاله بس قلت ابي افضفض لاخواتي بنات المنتدي واكيد راح اخففوا عني..