صديقتي غلطانة باللي سوته مع زوجها ولا لا

صديقتي بوضع صعب وطلبت مني اخذ مشورتكم


هي تزوجت لها سنة ونص وعندها طفل وحامل الحين وكانت ارملة قبلها لكن بدون اطفال
من الخطوبة للزواج وهي بمشاكل مع زوجها ومن بداية تعارفهم كل ما تهاوشوا هددها بالفراق وهي تصبر وينصلح الموضوع وحبته
اكتشفت بعد الزواج انه ولد أمه يسمع كلامها بكل شيء لدرجة لو تقول له اسحب على زوجتك وسافر لنا مستعد يتركها لحالها بالديرة ويسافر
للعلم اهلها بعيدين عنها 2000 كيلو ! وماعندها لا سايق ولا خدامة وطفل صغير وفوقها حمل


هي موظفة من تخرجت ويوم حملت تركت وظيفتها على وعد بترجع من طفلها يكبر
من تبي تشتري شيء يقول لها لا مافي فلوس
سريرها مكسر مايصلحه
مطبخها مكسر صحون ماعندها يقول مافي فلوس ويصرفها
للعلم هو راتبه فوق 10 بس يصرف فلوسه على امه وخواته الي مب بحاجته وابوه عايش
هي قالت ماتهم هالاشياء المهم يعاملني زين
بعد ولادتها صار يهاوشها دايما ومايكلمها ووبدا يسبها ويشتمها ويضربها دايما

يجيب اهله وخواته البيت ويجيب لهم اكل ويقفل عليها باب غرفة النوم يقول لها لا اشوفك تطلعين ولا يعطيها اكل
صار يقول لها اشتري اكلك من فلوسك ويشتري اكله ومايعطيها وهي حامل وعندها طفل
ويتركها ويسافر لاهله بالايام والاسبوع ولا يترك لها فلوس ولا اكل يقول لها عندك فلوس والمسكينة تضطر تكلم جيرانها


قبل كم يوم تهاوشوا هوشة كبيرة على سبب تافه وضربها ورم جسمها وتركها بالبيت وطلع
بعدها يدق عليها يقول لها بطلقك وورقتك بتوصلك ويسبها ويعيب عليها ويقول لها انقلعي لبيت اهلك برجع ما القاك


هي يوم شافت كذا اتصلت بالشرطة والاسعاف واشتكت عليه بالمحكمة انه يضربها ويضرب عيالها
ورفعت قضية طلاق للضرر وطالبت بحقها الخاص والحق العام المحكمة بتاخذه من زوجها


يوم سوت كذا واهلها عرفوا صاروا يلومونها ليش كبرت الموضوع واشتكت وقالولها خربتي بيتك كان صبرتي
وأم زوجها اتصلت تهاوشها تقول لها خربتي بيتك ماتستحين تشتكين على ابو عيالك تبين الطلاق ردي مهره ياللي ماتستحين


انهارت عندي امس تقول انا وش سويت غلط صبرت على الي سواه وهذه جزاتي والناس تلومني ماتلومه


تشوفونها غلطانة ؟