صديقتي مشكلتها مشكلة مع خطيبها السابق (ارجوكم الدخول)

بسم الله الرحمن الرحيم

السلام عليكم يابنات حواء الغاليات

انا عندي صديقة عزيزة على قلبي كثير وحيرني حالها زي ماهي نفسها محتارة وحبيت تشوفون لي معها حل الله يجزاكم خير .

القصة ومافيها ان البنت كانت مخطوبة لشخص من 3سنوات تقريبا وماستمرت معه انفصلوا عن بعض قبل لايتملكون حتى بس الظاهر ان الولد تعلق فيها كثير وصديقتي مارتاحت له نفسيا وماحبته وكانت تحاول تنقع نفسها انه شعور طبيعي وانها خايفة من مرحلة جديدة بس اكتشفت لما قرب موعد الملكة انها ابدا ماتقدر تعيش معه حتى البنت مرضت وتعب قولونها من هالموضوع والتفكير فيه
فاللي صار انها بلغت اهلها انها ماتبيه وتبي تلغي الموضوع نهائي بس هو شكله كان متعلق فيها كثير

وصديقتي مارتاحت الا بعد مانفصلت حتى حنا حسينا نفسيتها تحسنت كثير عن اول , بس هو مايأس رجع وخطبها اكثر من مرة وكانت هي ترفض , وهي على كلامها انها ماحبته + انها مارتاحت لتفكيره وعقليته واسلوبه وانهم مستحيل يتفقون من هالناحية .

وبعدها كان يتقدم لها عرسان بس كانت ماترتاح وتقول ماأبي اتزوج الحين وانا توني طالعة من تجربة
صديقتي وقتها كان عمرها 22 والحين 25 سنة والبنت ماشاء الله موناقصها شي جمال ودلال وبنت ناس واخلاقها عالية مره مره ومحبوبة من الجميع والله , وكثير من اقاربها حذروها اول مانفصلت قالوا يمكن تكون عينه فيك وماتتزوجين وماكانت تهتم لهالموضوع , ومره حلمت فيها وحدة من صديقاتنا حلم وفسرته عند شيخ قال لها انتي مطلقة قالت لا كنت مخطوبة وانفصلت قال ايه حصني نفسك بسورة البقرة والاذكار لانه نفسه متعلقه فيك واستمرت تقرا البقرة اظن من شهرين الى ثلاث شهور , حتى هي حلمت حلم تكرر معها اكثر من مره ولما فسرته قال لها الشيخ عيون تطاردك وسألها كم سؤال خاص فيها واخر شي قالها اتوقع خطيبك الاسبق مازال يفكر فيك ويتمناك للآن .

وقبل سنة تقريبا تزوج خطيبها السابق وقالت الحمدلله برتاح لانهم يقولون لما يتزوج تنفك من نفسها ,
وفجأة قبل فترة اكتشفت انه يرسل لها مسجات على الجوال ويقولها انه مانساها وانه يحبها وهو متزوج للأسف :(
وهي طبعا ماردت عليه وبلغت اهلها بالموضوع , على اساس لو كررها بيتفاهمون معه وهو ارسل لها مسج يهنيها برمضان وهذا كان اخر مسج .

الكل أكد لها بعد قصة رسايل الجوال انه احتمال كبير تأخر زواجها للآن بسبب عينه المتعلقه فيها
وناس يقولون لها انتي توسووسين ومابعد جاء نصيبك , بس البنت يجيها عرسان بس سبحان الله ياماترتاح من الاول وترفض كذا ويجيها حالة نفسية مجرد ماتنخطب لحد ماتلغي الموضوع , او يكلمون مثلا ويقولون بنجي او يسأل عنها احد وفجأة معد يكلمون , ومره صارت لها خطبها واحد واقتنعت شوي فيه وشافها الشوفة الشرعية وكلهم اعجبوا في بعض حتى هو قال لابوها انها عاجبتني بس بعدها باسبوع تقريبا اتصل على ابوها واعتذر منه لانه قال حس انه مارتاح مع انه كان غير في الاول .

انا قلت لها هذي ممكن تصير يمكن انه استخار وحس بعدم راحة يعني مو شرط .

بس الحين هي محتارة خاصة انه رجع يرسل لها رسايل بعد 3سنوات من الانفصال
وموضوع تأخر زواجها الى الان مع ان البنت كاملة ماشاء الله وموناقصها شي ابد ابد .
والاحلام اللي فسرتها وقالوا لها هالكلام .

فهل تتوقعون فعلا ان اللي صاير لها عين وان نفسه فيها للحين ؟
هل هي توسوس وتأثرت بكلام اللي يقولونه الناس من حولها ؟
وايش الحل بنظركم ؟ انا شخصيا قلت لها كلمي شيخ ثقة وقولي له القصة وشوفي وش يقولك .

مادري يابنات انتم وش رايكم الله يعطيكم العافية والله هي عزيزة على قلبي كثير ويعز علي اشوفها بهالوضع وماني قادرة اساعدها .

البنت وش تتوقعون فيها ووش ممكن تسوي كحل هالمشكلة او انا كيف ممكن اقدر اساعدها ؟

وشي مهم احب اقوله البنت ترى ماشاء الله تدعي دايم وتستغفر وتقرا المعوذات .

الله يجزاكم خير دايما ماتقصرون معي ومشكورين مقدما .