صديقتي منهارة وتبغى الحل .. ارجو الدخول للحكيمات فـــــــقط / قديم

السلام عليكم كيفكم جميعا
بدخل في الموضوع على طول.. هذه مشكلة صديقتي مومشكلتي
بعطيكم نبذة عنها وبعدين بعرض مشكلتها وابغى الحكيمات يردون عليها .. لانها متضايقة ومهمومة مره
هي ياطويلات العمر: حامل ودخلت التاسع وقاعدة تصلح بيتها عشان بتولد
زوجها رجال مديوووووون وثلاث ارباع الراتب يروح
المهم هي عرضت فكرة التصليح عليه وعلى حسابها وهو وافق وكان متحمس مره وجابلها كتلوجات ووداها محلات ورق حائط واختارو وكل شئ وهي تقديرا لظروفه تسلفت 4الاف من امها وبدات تصلح في غرفتين .. غرفة المجلس اللي بتولد فيه وغرفة المعيشه
بس للاسف مابدات تصلح الا في الشهر الثامن
والان بس خلصت غرفة المعيشة وباقي لها المجلس اللي بتستقبل فيه الناس وهي دخلت التاسع ومزنوقة مره تخاف تولد والبيت موجاهز وماتبغى تولد عند امها ..متخيلين معايا الوضع
قبل يومين نزل الراتب وقالت لزوجها يلا روح جيب الرجال يركب الستاير ورق الحائط خلاص مابقي وقت ممكن في اي لحظة اولد و.....
لسه ماكملت كلامها الا زوجها انفجر في وجهها .. انتي منتي مقدرة ومنتي عارفة شئ بس تتكلمين كذا انا مزنوق ووو
انا من وجهة نظري هو تصرف كذا لانه يمكن دوبه الراتب اجى وكله في غمضة عين انصرف و مقهور على وضعه هذا وهي بس همها تكمل البيت وماهي حاسه بظروفه" في نظره" مع العلم انها ماتطلب شئ وماتطلع مع البنات اللي زيها لوجات مناسبة
لانها باعت ذهبها كله لزوجها سوا به مشروع مغسلة وفشل المشروع وطبعا مارجع الذهب لانه غالي موووت والحين هي بدون ذهب حتى خواتم مامعاها
المهم تخاصمو مره وعشان هم ساكنين في ايجار قال لها زوجها على قول ابوي ليش اصلح بيت موبيتي وصديقتي مره انهارت و انفجرت "هي عصبية مره" وقامت كسرت الستاير وقطعتها وخربت الدنيا وسبته وخاصمت على ابوه وزوجها عصبببب مره سبها وقلها سميني جزمة لوصلحتها لك و لوماتسكتين برمي عليك يمين الطلاق
وراح جاب امها وقال شوفي ياعمة بنتك لسانها طويل وانا صابر عليها مره وماهي مهتمة وابسط حقوقي ما اخذها وماتطبخ في البيت وماهي مرتبة ولاشئ
(صديقتي اصلا مريضة بالغدة يعني عصبية مره بسببها وحامل حملها صعب ماتقدر تتحرك كثير رجلها تتعبها وعندها بنت لسه ماكملت سنتين وهي والله انا عارفتها تهتم ببيتها وفاهمة بكل شئ وحلوة وتحب تلبس وتتشيك وتطبخ بس تعباااانة مع الحمل ومافي احد يساعدها من اهلها وفوق هذا قاعدة تاخذ تربوي السنة هذه)
قامت الام قالت لبنتها يلا شيلي اغراضك وتعالي معايا
وروحت صديقتي مع امها
اليوم اللي بعده اتصلت ع زوجها كذا مره مارد وارسلت عالواتس جيب الدوا تعبانة .. جابه ودق عالباب وراح مع العلم اني نفس اليوم رحت اتمشى مع زوجي وشفناه يلف بالسيارة عالبحر
وايضا طلبت منه مفتاح الشقة عشان تروح تاخذ اغراض الدوام وجابلها المفتاح اليوم الصباح فتحتله امها وقال لها خذي المفتاح بدون سلام ولاكلام
مع العلم انه زوجها يحب امها ويحترمها ويقدرها بس مره زعلان
بس انا اتوقع انه زعل لانها قالت لبنتها شيلي اغراضك وتعالي معي على باله عمته بتوقف معاه هو جايبها عشان كذا بس صار العكس
المهم يوم فتحت الباب واعطاها المفتاح بدون مايسلم قالت ياولدي انا ماخذت مرتك من البيت الا عشان اقصر الشر وشفتها قايمة قاعدة وتخاصم خفت يجيها نزيف ولايحصل شئ قال.. عادي احسن لها عندكم
وطلع تقول صديقتي حتى امي متفاجئة منه وقالت لبنتها اقولك روحي بيتك ومره لاتتكلمين معاه
وصديقتي الان منهارة ومتعبانة نفسيتها وشايلة هم تقول مدري اروح البيت ولا اجلس مع العلم انها الغلطانة لانها دايم تغلط ع زوجها وهو صابر عليها وعلى عصبيتها وتقول اخاف ارجع ويشوف نفسه علي ويقول هذه رجعت لحالها ويذلها
وتقول اخاف اجلس ومعد يجي لي ويمكن توصل للطلاق لانه زوجها مره صبر عليها كثير وهي كل مالها تزيد
وامها بتكلمه بس مابتقوله صلح بيتك بس بتقوله صلح وضعك البنت ماتلبس ولاتطلع زي الناس كله بسبب ديونك لانها دايما تاخذ من امها .. وايضا بتقول لاتنقل الكلام لابوك هو كل شئ عند اهله وصديقتي تكره ابوه لانه شايف زوجها مديون وحالته حالة وفوق هذا ياخذ منه ولايستحي يطب عليهم بدون موعد ويدخل غرف البيت بدون مايستاذن مره دخل المطبخ حاط نفسه يدور مناديل وشاف الصحون في المغسلة قالها غسلي
يعني يقهر حركاته زي الحريم
ابغى الحل بالله ولاتفشلوني قدامها .. انا قلتلها بحط مشكلتك في المنتدى وان شاء الله ترتاحين معانا ومشكورين ماقصرتووووووووووا
ارجو الرد بس بدون تجريح لانها بتشوف الردود