صراحتي دمرت علاقتي بالناس

السلام عليكم
الله يسعد كل من تدخل موضوعي وتفيدني
انا يابنات متعددة الشخصيات وهالشي بسبب معاملة اللي حولي ونا صغيره اجتماعيه واخذ واعطي سنعه بالعربي وكلامي موزون انا الوحيده بين اخواتي كذا اخواتي كانو حياويين كثير فأنا لما وصلت مرحلة المراهقه كانو اهلي يتريقو على جرأتي فقررت اصير حياويه مثل اخواتي وفعلا تغيرت وراح السنع كله وما صرت اعرف اركب كلمه على كلمه وكنت اجامل في ادق التفاصيل وما اجرح احد بس في المقابل لقيت الناس يجرحوني ويتكلموا فيني قدام وجهي ويعيبوا علي ويأذوني حتى اقرب الناس لي لاني كنت ضعيفه فنظرهم صار الكل يدوس على كرامتي فقررت اتغير واصير جريئه نفس اول مره وتغيرت بس مو على سنع نفس ونا صغيره صرت ما ابالي بأحد واجرح من يجرحني واخذ حقي وما اسمح لأحد يغلط علي وكنت افكر كلامهم دق فيني ويمكن هم مايقصدوا هالشي حتى مزحي صار دفش بس عمري ما تسلطت على احد يعني كنت بس اخذ حقي بقدر ماهم يغلطو فقط والنتيجه خسرت جميع صديقاتي وقريباتي بالعربي صرت دفشه وبقوه مافي اسلوب بالكلام ولا الحوار ولا المزح حتى اخواتي وهم اخواتي يستغربوا كلامي ويناظروني على اني خبله
انا الحين مثل مو واضح بالعنوان صريحه لابعد حد ماعندي مجاملات ولو بسأل عن شي اسأل عيني عينك بدون مقدمات ولو سالتني وحده عن رايي اقوله بصراحه حتى لو كان يزعل ماحب اجامل مع ان اساس استمرار العلاقات بعد حسن الخلق هو المجامله وانا والله يابنات ما اعرف اجامل ولا اعرف كيف احسن اخلاقي مع الناس وما اعرف اضبط اعصابي تعبت من شخصيتي واتعبت اللي حولي
المهم الزبده ابي اتغير بما اني اقدر اغير طبعي ماشاء الله بسهوله 😂


ابيكم تقولوا لي كيف اغير طبعي واكون انسانه رزينه مو ضعيفه ولا دفشه واحترم اللي قدامي حتى لو غلط لاني ماحب اجرح احد بس فنفس الوقت ماحب حد يجرحني او يغلط علي لاني محترمته يفكرني ضعيفه للمعلوميه صوتي عالي من غير ما احس وكلامي مثل الصراخ الكل يقول لي كذا مع ان صوتي صوت طفله واذا حاولت اوطيه ما ادري الا رجع يرتفع ثاني
الشي الحلو فيني اني قلبي طيب يعني وحده تغلط علي وتجرحني بعدين تتكلم معاي عادي اندم اني جرحتها واشوف نفسي صغيره وقليلة ادب اني جرحتها