صرت اكره النـاس كلهم لهالسبب

الناس يتقسمون اقسام كثيره والبشر انواع
لكن انا بتكلم عن نوعين من البشر
ناس تحب الاخرين واجتماعيين وربي جعل لهم القبول
وناس تحب الاخرين واجتماعيين وربي نزع منهم القبول

والله يااخوات انا تعبت بحياتي تعب مايعلم به الا الله لدرجه لوصلت لمرحلة التبلد ارتاااح واستانس
لكن غصب يرجعلي الاحساس وارجع اتعب
والله ثم والله اني ما ابالغ ولا اضخم الامور ولا شي يعلم الله اني اقول الامور بحجمها الطبيعي
انا ربي نزع مني القبول ودايم غصب عني ,يشهد ربي لا حسد ولا كراهيه بس غصب عني اشوف الناس حولي لهم احباب والناس تتقبلهم , مو شرط حب لكن ابي قبول على الاقل , مره مالي قبول الناس تنفر مني نفور عجيب حتى امي ماتدانيني ونتيجه هالكره ياما ظلمتني وجاتني تعتذر ولا اخواني ولا اخواتي ما سويت لهم شي يشهد ربي والكل يثني على اخلاقي وبوجهي يقولون ونعم الاخلاق لكن مالي قبول منزوع القبول مني تماما

تزوجت واهل زوجي اخلاقهم عاليه بيت عمتي مايخلى من الناس بابها مفتوح واخلاقها يشهد عليها الغريب قبل القريب عاملتهم بأحترام وبأخلاقي لكن سبحان الله ماتبلعني تعابير وجهها تتغير يوم تشوفني انا اشهد انها تحبني فتره وفتره تنفر مني بدون سبب
اخوات زوجي من اول يوم دخلت عليهم مابلعوني

ليه اغلب الناس علاقاتها مجاملات ويتواصلون عشان تمشي حياتهم الاجتماعيه ومع ذلك الناس تتقبلهم ؟ وانا مرات كثيره اقلدهم زيي زي اغلب البشر اروح زياره او اتصل تلفون او ارسل واتساب عشان اسويلي علاقات اجتماعيه مع ذلك الناس غالب الوقت تنفر؟

اختي الكبيره بمجرد مايطلعون الضيوف من بيتنا تحش بهذه وتسب هذه وتلعن هذه لكن سبحان الله هاللي سبتهم وحشتهم ولعنتهم يموتون عليها ماشاءالله ربي يباركلها

والله يا اخوات ادري محبة الناس ما تدخلك الجنه بالله لا تقولون مواعض انا ادري لكن العلاقات الاجتماعيه تمشي لك امورك شئنا ام ابينا

وربي يا اعرف حريم عز المعرفه كل وحده تتمنى الموت للثانيه لكن تشوفينهم بالزوارات والزواجات امورهم سااااااااالكه شلون ؟ والكل يدري انهم يتكارهن

انا تجيني فتره ايأس خلاص وهنا ابدأ اكلم ربي واقوله ليه يارب حرمتني من نعة القبول ليه ؟ انا مو محبه بالناس بس ابي اموري تسلك بس

اذكر وحده زمان امها عرضتها على ام زوجي عشان ياخذها اخو زوجي الصغير وصارت البنت وامها يزورون ام زوجي بأستمرار ,فاللي صار ام زوجي اتعلقت بالبنت وانهبلت عليها وحبتها واخو زوجي رفض لان ماناسبته ولا البنت ماتنعاب جمال المهم الموضوع هذا صارله 12 سنه تخيلوا ام زوجي للان مانست البنت؟ والله ان تشرق بطاريها مع كل طيبتي وحبي لام زوجي من قلبي لكن مانست هالبنت وانا مو هدفي تنسى البنت لا بس اوريكم لأي درجه فيه ناس الحظ يخدمهم سبحان الله ,يحرقني يوم اشوف غيري بدون لايتعب تجيه الدنيا مو حسد والله عالم بالصدور لكن حسره على نفسي حيل والغبنه بتقتلني قبل يومي

زوجي يوم يضحك للاطفال يبوسون يده يعني يتجاوبون معه وانا لما امسك طفل يسبني او يحش فيني

مره رحت زياره لبيت عمي وعمي عنده ابناء اعمارهم 7 و8 يوم نكون بمجلس انا بس اتكلم الكل يقاطعني او مايعلق يشوفوني بدون تعليق وبس يسولف زوجي انواع التجاوب وربي لاحد يقول حساسه ترى كلنا بالغين ونعرف عيوبنا وحسناتنا والله تجيني غبنه ليه وش فيه كلامي؟ وش فيني ماعندي قبول؟

شوفوا يا اخوات رحم الله امرء عرف نفسه مو عدم ثقه بنفسي لا والله لكن كلنا عندنا مرايا ونعرف اشكالنا ونعرف من نشبه عليه انا يا بنات فيني عيوب كثيره بشكلي وجمالي ضعيف جدا جدا جدا ولاتقولون كيف تزوجتي هذا رزق من الله زي الاكل والشرب والمال كذلك الزواج رزق من الله

حتى التجميل ما يخارجني رحت لدكتور انف قالي اسهل عمليات هي عمليات الانف لكن حالتك انتي حتى بالعمليه صعبه لان انفي غريب شين مررره مره ونادر ماشفت مثله ادعولي وجعلكم ماتجيبون ذريه تشبهني

وعندي مشكله ثانيه بوجهي ورحت اسوي عمليه اعترفلي الدكتور قال اسويها لك لكن خطيره مره على حياتك وراح تتعبين هذا غير تكالفها عاليه 40 الف ريال

شفتوا الحظ ؟والكل يسوي عمليات تجميل بكل بساطه وانا لا طبيعتي معتدله وطبيعيه مثل الناس ولا العمليات برتاح فيها والله يا اخوات حتى التجميل مايفيد فيني انا اقول يمكن عشان كذا الناس تكرهني بسبب شكلي

اذكر مره انا وزوجي نتابع تلفزيون جات وحده شكلها قريب من شكلي زوجي نسى نفسه و لا اراديا قالت وووع وسكت بسرعه وربي زوجي مايجرح احد ويوم قال ووع بسسسرعه سكت وتذكر عمره ماالومه وربي عارفه نفسي مالها علاقه بالثقه لامن بعيد ولا من قريب
يعني الثقه راح تسويلك انف حلو؟ الثقه راح تعطيني جمال بوجهي الشين؟

اما الكشخه مو مقصره بنفسي حتى عندي حساب بأنستقرام اسوي دورات تجميل
لكن شكلي مايغطيه لا لبس ولا مكياج ولا كشخه شيني واضح
ولحد يٍسألني عن حسابي بأنستقرام لاني بعد هالموضوع ما ابي احد يعرفني الله يخليكم لاتحرجوني

ليه الناس ماتحبني؟ ليه مايبون يجلسون معي؟
ترى على فكره انا شاغله نفسي بالرسم والانستغرام واطلع مولات عشان انسى واقعي المـر وعشان اهرب من نفسي لكن الا مايجي يوم ابي احس الناس تبيني ليه اكذب على نفسي؟ الانسان بطبعه تزيد ثقته بنفسه لو حس ان له قبول صح ولالا؟ ليه ندعي المثاليه

وين ما اروح مولات او زواجات او زيارات دايم الناس تهتم للي معي ويتركوني منبوذه من وانا صغيره هذه لعنتي

ماشاءالله غيري يتكلم الناس تنصت , يسكت الناس تنجذب له ,يخدمهم بشي بسيط يحبوه
باختصار مايبذلون مجهود عشان الناس تحبهم ومع ذلك الكل يركض وراهم

حبيت افضفض باللي بقلبي خلاص بنفجر