صرت اهوجس كل ماتذكرت اخوي

قبل سنة وشهور
حوالي الساعة ١ بالليل صحيت من نومي على اتصال اختي مدري ليه انقبض قلبي
رديت وكانت تبكي تقولي قومي اخوووكي فلان مات بحادث سيارة
قلت لها وش تقولي انتي
تقولي مات مات والله مات
قفلت الجوال بسرعة بوجهها
مالحقت اقفل الجوال وانا ارجف الا جاني اتصال ثاني من اخوي ويبكي بعد يقولي وينك انتي خلي زوجك يجيبك للبيت عند امك بسرعة
طول وقتي وانا البس عباتي وماشية مع زوجي كنت قاعدة ارررجف مو ابكي كنت شايفته اليوم الصباح كيف صار هذا
طول الطريق ماكنت الا افتح الواتس حقه وكان اخر ظهور له الساعة ٧ الليل قبل مايتوفى بنصف ساعة فقط واشوف صورته هو وابنه
البيت كان كله صياح وانا الوحيدة لي كنت ساكتة مو معقول لي صار الحين بيرجع
يدخل البيت قبل مايطلع شقته كان يسير على امي يبوس يدها وهي نايمة ويكون شاري لها فواكه او حلويات
بس لما طلع صباح ذاك اليوم واخوي مارجع لبيته ساعتها تأكدت فعلا انه مات
ولي اكد لي اكثر اتصل واحد من زملاء اخوي بالعمل على اخوي الثاني يقوله فلان ليه ماجا اليوم للعمل
وقاله اخوي وهو يبكي فلان توفى امس بالليل
كان منظر الشروق يومها كئيب جدا
من ذاك اليوم دخلت بحالة نفسية صامتة ما احد يدري فيها كل ما اتقلب بفراشي بالليل يحضر اخوي قدامي كأنه يقولي نسيتيني يعني
صرت اشوف صوره واقول بنفسي هل هو فعلا كان بهذي الحياة
عشت معاه كل سنين طفولتي
طيب كيف وبلحظة راح من هالحياة وهو بعز شبابه
كيف صار الحادث وايش كان شعوره يوم شاف الموت
معقوله تذكر امه ولا عياله لي اكبرهم عمره ١٢ سنة
دموعي ما نزلت عليه ابدا رغم انه كان احب اخ لي
تجمدت مشاعري بيوم وفاته والى الان دموعي عاصية عن النزول بس قلبي انكسر من يومها عليه
كلامي مو قادر يطلع ابغى افضفض من سنة عن شعوري مو قادرة كل ما جيت اكتب اتذكر ملامح اخوي واغص