صرت منبوذه بعد ماكنت الكل بالكل

السلام عليكم
هلا بنات كيف حالكم
بدون مقدمات
انا كنت انسانه محبوبه من الكل ومابالغ كانوا حمولتي على حسب ظروفي يقررون جمعتهم
وعند اهلي انا اساس الجمعه
انا انسانه نشيطه متفاعله اعطي الطفل والكبير والشباب حقهم ماحب اسفه احد
وخصوصا الناس اللي محقوره في المجالس اتعمد اني امزح معهم اعطيهم حقهم في المجلس
ام زوجي كانت تحبني لدرجة انها تقول انتي غير حريم العيال انتي اقرب لي من بعض بناتي
اللي حصل انهم هالحين قايلين لولدهم اللي هو زوجي لاعاد تجيبها لنا ماعاد يبوني
لان بنتهم زوجة اخوي وطلقها ويعلم الله ان مالي دخل في اللي حصل بينهم ولا لي علاقه لا من بعيد ولامن قريب اخوي طلقها لامور تخصهم في حياتهم
فقلت معهم حق عشان بنتهم ومايبوني اشوف بنتهم وهي على هالحاله وشوي تهدا الامور وترجع المياه لمجاريها
وهالكلام له ست شهور تقريبا
ولازالوا مايبوني
هذا بالنسبه لحمولتي
اما اهلي والله حصل موقف كبير والغلط على الطرف الاخر مو علي والكل يشهد لي اني ماغلطت
لان الموقف حصل امام الجميع يعني الكل شاف من الغلطان
ومع ذالك قدمت اعتذاري للطرف الاخر وقلت اخوتنا اكبر من اي خلاف
مع العلم اني اسكن في مدينه بعيده عنهم
بعد الاعتذار هدت النفوس شوي بس مارجعت العلاقه مثل قبل
حتى عندي انا احس اني لازلت مجروحه
وانا قررت اني ابعد واجلس في بيتي وماعاد اسافر لهم على الاقل لمدة ست شهور لانو جاني تجريح حتى بعد الصلح وفيه ناس مالهم علاقه بالمشكله بس لاحظت انهم متفرحين علي وفيه ناس توقعت انهم يوقفون معي وخذلوني خذلان
هالكلام له اربع شهور تقريبا
الزبده اني لاحظت معي ضيقه ومعي كسل وعصبيه وتوتر وقلق وحزن وكره للناس
والاحظ اني كارهه زوجي مع ان ماله علاقه في هالمشاكل كلها
وتذكرت في السنه اللي فاتت ناس كثير يتكلمون فيني ويقولون انتي ماشا الله عليك تصنعين السعاده
وانتي انسانه بسيطه ومحبوبه
حتى الاطفال سواء من اهلي او حمولتي يتمنون اني انا امهم
فكنت وبدون مبالغه محبوبه من الجميع
الغريب ان الناس فجأه تركتني وبدون خطأ مني
فانا هالحين اقول مادري هو فيني عين او هو العجب والغرور دخل في نفسي وحاس اموري
او هو ذنب او هو ظلمي لشخص بدون ما اشعر
ووالله اني نفسي ارجع متفائله مثل قبل نفسي ارجع نشيطه ومتفاعله واحب الناس واحب زوجي
بس ماقدرت
مع العلم اني انسانه ولله الحمد محافظه على اذكاري من زمان ومحافظه على النوافل ومااسمع اغاني ولاعندي الا قنوات محافظه
فما ادري وش فيني
بنات ركزوا معي تكفون انا مااقول انها اكيد عين
واللي اقلقني في الموضوع مو مشاكلي فقط معهم
لا اللي اقلقني هو الضيقه والكسل والعصبيه والتوتر والقلق والحزن وكره الناس وكره زوجي
ابي من اهل الخبره يشخصون حالتي هو اكتئاب او عين او مس او هو صدمه
وللعلم انا في مدينه بعيده عن اهلي واهل زوجي فقررت ابتعد لمدة شهور
لاني اشعر اني بحاجه للفلتره واعادة حساباتي
مع العلم امي وابوي متوفين الله يغفر لهم ويرحمهم وجميع المسلمين فما فيه شي يلزمني اروح لهم