صرخة الحرمان تناديكم

مهما يصير
اشكرك حبيبتي على الرد واسأل الله العظيم انه يسخرلك زوجك ويسخرك له ويجعلكم قرة اعين بعضكم ويقر اعينكم بالذرية الصالحة المعافاة وبالتوفيق ,شيكي عالخاص
manal99
اشكرك حبيبتي على اهتمامك
uae_foever
أما انت ياقمر ما اقول الا الله يفرحك ويسعدك مثل ما اسعدتيني وتدرين كل اسئلتي اللي بالخاص لقيت اجوبتها خلاص (فشيله والله) لان لما سئلتك كانت باقي مشاركتي ماطلعت بس الحين فهمت باقي ليش علامة صح عند مشاركتي طبعا الحين فضحت نفسي عندكم ياحلوات بس مايخالف انتوا خواتي .
وثـــــــــــــــــــــــــاب
بصراحة كلامك اثلج صدري وخلاني افكر شوي بوضعي واقول الله لايحرمني الاجر وياليت ماتحرميني من مراسلتك لي عالخاص وتدفعيني للامام لاني احب اسمع مثل كلامك هذا والله يكتبلك الاجر ويفرج همك ياقلبي
انين الروح
الله لايحرمني من ردودك ولا يحرمك من امك وما اوصيك على ماما خليها تدعيلك كل صباح دعوة الام مستجابة وقوليلها تدعي لوحدة مالها لاام ولا اب يدعولها طب كيف بتمشي حياتها ؟؟؟؟؟؟؟؟؟لاتنسين الله يخليك.
..........................................................................
اكملكم يوم كان ابوي عايش كانت حرمة ابوي الله يذكرها بالخير صح انها ماكانت تضربني مثل زوجات الاب لاني انا ماغلط عليها بس كانت تحرش ابوي علينا وياما طرد اخواني عشانها وهاوش خواتي ومنعهم من البيت ويوم مرض وطاح بالفراش كانت تسافر عند اهلها وزهقانه منه صح انه احيانا ماتقصر معاه يمكن تستغربون احيان اذمها واحيان امدحها عشان الله مايعاقبني اني ماذكرت الخير اللي سوته المهم ابوي طاح تقريبا سنتين يوم بالبيت وعشرة بالمستشفى وانا حالتي تشكي للي خلقها حسيت الدنيا انتهت لان ابوي كان كل شي بحياتي يوم يكون بالمستشفى كنت بالثانوي والله يابنات كنت ارجع من المدرسة اغير ثيابي ودروسي واطلع عالمستشفى بدون غدا عشان اتغدى مع ابوي واغديه واقعد معاه للعصر واذا جت الزيارة ارتبه واعطره واروح استراحة النساء اذاكر واذا انتهت الزيارة ارجع لابوي اعشيه واقعد معاه واذا بغى الحمام كنت احط يده على كتفي واساعده عالمشي وما ابين له اني ما اقدر عشان مايحس انه ماعنده احد لان اخواني الله يهديهم ماكانوا يروحون له كثير بس انا ربي راحمني ان عندنا سواق يوديني وعلى زيارة الليل تجي حرمته تشوفه وتاخذني خلاص اكون تعبانه وانام على طول وعلى هالحال لاني ماكنت اتحمل البيت بغيابه لما جا اليوم اللي خلاص الله كتبلي فيه اعيش وحيدة ولله العظيم يابنات يوم جاني خبر ابوي اني صرخت صرخه وقتها حسيت اني بصحراء واقفه لوحدي ماعندي احد وحسيت انه كانه امي توفت بهاللحظة حسيت اني فقدتهم اثنينهم لان ابوي عمره ماحسسني اني فاقده امي حتى اذا مرضت مرض عادي وانا كبيره يعني مااحتاج احد عندي كان ينام معاي بالغرفة واذا حرمته حرشته علي يزعل وقتها بس يرجع يراضيني مثلا بفلوس او يسولف معاي تصدقون اذا ذكرت ابوي ماقول (الله يرحمه) مو عشان شي الا الله ينزل الف رحمة ونور عليه وعلى امي وعلى جميع موتى المسلمين بس لان الجملة ماتنقال الا للموتى وانا مابي احس ان ابوي مو معاي يمكن تقولون تفكير طفلة بس هذا شعوري المهم توفى ابوي وبدت مسيرة الظلم والذل والقهر ودموع الليالي من الاخوان وحريمهم والتنقل بين الخوات ياااااااااااااااااااااه والله شفت المر خلال اربع سنوات كل مااتذكر اتمنى لو اقطع هالمرحلة من شريط حياتي لكن هيهات وراح اكملكم بعدين لان لازم اكون هادية قبل مااكتب عن هالايام الله لايوريها لاحد .
وفي الختام سبحانك اللهم وبحمدك اشهد ان لااله الا انت استغفرك واتوب اليك.