صرخــــــــــة أم !!

السلام عليكم
اخواتي العزيزات ابي اطرح عليكم مشكلة صديقة عزيزه علي .. وقلت لها اني ابي احط الموضوع عندكم حتى نشوف اذا احد فيكم قد مر بهالتجربه او سمع عن احد مر فيها ولقى لها حل ريحه وريح اللي حوله

اخواتي .. صديقتي رزقها الله بطفل معاق من حوالي 14 سنه او اكثر يعني هو الان حول سن البلوغ الله يعينها ويصبرها .. وهي ماشاء الله عليها صابره ومحتسبه عند الله الاجر .. المهم الطفل كل ماله ويكبر وهمه يكبر معه خصوصا انه ولد!
يمكن البنت اهون بحيث ان الأم تجيب لها خادمه مخصوصه لها وتراعيها هي واياها ..
لكن الولد غير لان الأم ماراح ترتاح انها تحط خادمه انثى عند ولد بهالعمر تتكشف على عورته ولا راح ترتاح انها تجيب خادم ما تقدر تتعاون معه ولا تدري اذا توحد بولدها وش ممكن يكون بينهم ..

المشكله اللي تواجها صديقتي هي عدم معرفتها بالمراكز اللي موفرتها الدوله لرعاية هذي الفئة من ابناء الوطن هذا اذا كان اصلا فيه مراكز لهم ..!
اخواتي اذا احد فيكم قد سمع عن مثل حاله ابن صديقتي ولقى رعايه ممتازه في مركز مرموق ولو كان غالي المهم ان تعاملهم مع الولد يكون باسلوب بعيد عن الضرب اوالقسوه اوالتحرش الغير اخلاقي اللي موجود في بعض المراكز يا ليت تدلنا عليه واكون انا وصديقتي لها من الشاكرين الداعين لها في كل وقت ..

حالة ابن صديقتي
هي انه جسمه يكبر وينمو بشكل طبيعي واطرافه سليمه اي ان اعاقته في الدماغ حيث ان عقله غير ناضج ابداً اي انه لا يفقه ما يدور حوله ولا يتكلم ولا يفهم ولا يميز
فقط يعرف امه واخواته والناس القريبين له..
يحب ان يتعبث في الاجهزه الاكترونيه وخاصه التلفزيون ..

انتظر اجابتكم انا وصديقتي بفارغ الصبر ...