صــرت اشـوف الشمــاتـه بعيـونـهم .. وصــرت اسمــع الشمــاتـه بسـؤالهم ..؟

ياهلا بغنج الكويت
: )


ياعزيزتي
بالنسبة لكلام الناس
حطي بإذن طين وبإذن عجين
والله الناس مامنهم فكة
حتى لو تزوجتي الحين مابيريحونك
بيتكلمون حملت وإلا لا؟!
واذا حملتي قالوا جابت بنت والا ولد ؟!
واذا جبتي بنت قالوا مسيكينة الله يرزقها بولد !
واذا جبتي ولد قالوا ياعمري الله يرزقها بنت تونسها !

يعني باختصار ..
الناس مايتركون أحد بحاله ..

وبعدين ياعسل
انت لسه صغيره ..
يعني ليه هالكلام ؟؟!
الدنيا لسه قدامك وأنت بأول الطريق

وأهم شي اظهري أمام الناس بكل ثقة
ودائما الابتسامة على وجهك

واذا احد قال لك شي
قولي الحمد لله مرتاحة ومبسوطة


وصدقيني أمك لو شافتك راضية ومرتاحة
هي بعد بترتاح وبتسكت
ومابيضايقها الموضوع ..

لكن هي الآن شايفة ضيقك عشان كذا متأزمة هي من الموضوع بعد !



ماأوصيك عالاستغفار ..
والدعــــــــاء ..



وصدقيني الدنيا فيها أشياء حلوة كثيرة
بدوووون الزواااج
صح هو أساس .. لكن الدنيا تمشي بدونه
وبيدينا نخليها حلوة أو مرة بدونه !


عيشي بسعادة داخليه
ورضا تام وقناعه
وحسن ظن بربي
إنه الفرج قريب
ورزقك مابياخذه غيرك
وربي ماأخرك إلى الآن ولاصار لك اللي صار
إلا لأنه يحبك ..




أهم شي ..
لاتهتمين لكلام النـــــــاس ..






موفــقــــــــهـ ..

الله يفرج همك اختي ويرزقك من حيث لا تحتسبين ..


دامك اقدمتي ع الطلاق بعد استخاره فهو خيرة لك بإذن الله .. ان شاء الله السنة الجديدة تكون سنة خير عليك وتكون أسعد سنوات حياتك ..

انتي لسى صغيرة العمر قدامك ان شاء الله ربي راح يعوضك بس انتي ابذلي الاسباب من دعاء واستغفار .. الجأي الى الله وناجيه بكل مايسكن جواتك ..


اسأل الله لك سعادة لا يعقبها حزن وفرج لا يتلوه شقاء وان يرزقك بزرج صالح فوق كل امالك وتخيلاتك عاجلا غير اجل ..

عادي خليهم يجيون
وين المشكله بكذا
لا تقولين ترخصين بنفسك ولا شي
الموضوع عادي جداا
وخلي عنكالحساسي هالزايده
وش دراك يمكن يطلعالرجال كفو ويعوضك حياتك الماضيه
عيشي حياتك ولا تخلين الشيطان يوسوس لك بشي طبيعي

شــــــوفي غلاتي كل وحده مننا تشوف نفسها هي الصح ..يعني ماكو وحده تقول أنا غلطانه الا نادر وبلحظة صفـــــاء ..

يمكن لو يرد الزمن لورى تتمنين أنك ماتطلقتي لكن هذا اللي حصل ..وامر الله مالنا الا التسليم له ..سواء كان الأمر برضا وأقتناع والا العكس ..

ثاني شيء الطــــــلاق دايم له مردود نفسي عالأنثى فينا ..لأنه موبالسهل تتزوج وتنفصل ..

صحيح ان الأمر صار بأختيارك ..لكم هم يبقى شيء بنفسك تجاه هالحياة والتجربة اللي خضتيها ..

يمكن أنتِ صرتي حساسة أكثر من اللازم عقب هالتجربة ..,تتوقعين أن الناس تتشمت أو تسأل من باب شماته ..

لاتسيئين الظن ياغلاتي باحد ..تذكري يوم كنتي بنت ..أكيد ألف وحده ووحده سألت عنك ..أنخطبت ..تزوجت ..كم مره أنخطبت فلانه ..هالشيء وارد على كل بنت ..

صدقيني ياغلاتي الأمر موشماته ..وأسالي حتى البنات اللي مومتزوجات ..عادي أقاربهم ..يسألون ..أعمامهم ..صديقاتهم ..جيرانهم ...الناس الآن تسأل كذا من الباب للطاقة ..فيه ناس بدافع الفضول ..,فيه ناس لا والله نيتهم سليمة ..

فأنتِ أحسني الظن باللي تسأل عنك ..ولاتتوقعين أنها شمتانه ..ولو شمتت فو الله انك تشفقين عليها لأنه بيدور الزمن وبيصير لها ماصارلك ..

الأمر الثاني ..موقف الوالدة لاتأخذينه بحساسية زايدة ..الأمر عادي ..

أمك ماتقصد تراعي الناس أو تسكتهم بقدر ماودها تتزوجين وتشوفك عروسة ببييتك ..

ويمكن انها موراضية عن طلاقك لها الشي أنتِ متحسسة من رأيها ..

صدقيني ياغلاتي هي ماتقصد ..أنها تتخلص منك ..بقدر ماتتمنى لك السعاده ..

أنا الآن وأنا مااعرفك ماأيدك على تصرفك ..أي ليش تريدن البنت ..خلها تقول للناس عليك ..شو المانع ..لاعيب ولاحرام ..؟؟

وانا لو أنك صديقتي أو اعرفك بدل عليك أي أحد يسالني ..

روقي وتعوذي من الشيطان ..ولاتحملين نفسك فوق طاقتها ..

والله يوفقك ويسعدك ..ويعوضك ..

ألـــق

هــلا فيــك

يكفــي وجــودج ريحيـــني .. وكــلامــج زال همــي ..

الله كريــم

وماقصرتي يالغاليه ..



hope smile:)


جزاج الله خير والله كلامج بسلم ع جرحي .. تسلميـــن ..


قطوه فوشيه

مادري يمكن انا معقدتها شوي و دايم اقارن نفسي بأول ..

حره

فعلا كلامج سليم بس قالت لي وحده من اهل زوجي ترى لاتطلقتي محد بيخطبج ..قلت لها هذا شي بيد ربي
يمكن عشان جذي صرت اشوف اي نظره او كلمه منهم شماته ..


بس شلون اتغير وازيل همي بنفسي .. احس اني بدوامه والله يابنات اني اقوم من النوم الظهر انطر متى يجي الليل عشان انام ويعدي علي اليوم بدون تفكير ولاهم ..

انا خايفه تتطور حالتي لضيقه كبيره ووسوسه لاني صرت افكر بالموت واااجد واتخيل بكل لحظه اني بموت وبس ابجي يعني من شي بسيط
انتكست حالتي .. وخايفه تتطور ..