الحمدلله والصلاة والسلام على رسول الله وعلى آله وصحبه أجمعين
حبيباتي اليوم حنزل وصفة سهلة و طيبة كتير ان شاء الله تعجبكم يا رب
نبدا بالمقادير و الطريقة سوا :-
اول شي بنسلق نص كيلو لحمة شقف افضل تكون القطعة كبيرة نوعاً ما (انا هون انصدمت طلع اللحام مقطعها صغيرة كتير تقريبا راس العصفور)
بنحط مع مي السلق بعد ازالة الزفرة بصلة مقطعة ارباع و بهارات حب ( هيل ، قرنفل ، قرفة عيدان ، ورق غار )
على جنب بنفتح كيس بازيلا و جزر مجمد(ممكن تستخدمو كيس البازيلا و الجزر و الفاصوليا و تضيفو كوسا كمان بس جوزي ما بحبهم) عادةً انا قبل ما استخدم الخضار المجمدة بحطها بمصفاية و بدير عليها مي و بغسلهم و بتركهم يتصفو
هلأ بنفرم بصلة فرم نااعم و بندبلها مع شوية زيت وبنحط مكعب ماجي عليها
بعدين بنضيف الخضار و بنحركهم شوي شوي عشان لا ينهرسو (لما احركهم بغطي الطنجرة و بمسك ايديها ببشكير وبقلبهم فهمتو علي كيف
؟؟؟ )
بعدين بنضيف اللحمة و بنبهرهم و بنملحهم ( بهار مشكل ، قرفة ، شوية هيل مطحون ، فلفل ابيض )
بنقلبهم لتاخد اللحمة و الخضار طعم البهارات بعدين بنضيف عليهم من مرقة اللحمة بس لا تكترو عشان اطيب الايدام يكون تقيل شوي مو زي الشوربة
و بنحط عليهم صلصة بندورة ، انا استخدمت معجون السعودية كتير طيب طلع،تقريبا حطيت بكيت كامل
بنحركهم و بنخليهم على نار هادية تقريبا تلت ساعة و اخر شي بنقشر حبتين بطاطا صغار و بنقطعم لمكعبات و بنديرهم فوق الخضار
بنتركهم تقريبا ربع ساعة لتستوي البطاطا بعدين بنقدمهم مع رز أبيض و بنرش على وجه الإيدام فلفل اسود مطحون ( ممكن قبل ما تقدميها تفرمي سنين تلاتة توم و تقليه مع شوية زيت زي تقلية الملوخية و تديريه عالصلصة و تتركيهم شوي عالنار بعدين تقدميهم)
تم بحمد الله
يا رب تعجبكم حبيباتي
دعوااتكم
تسلم الأيادي
بوركتِ