صوتي يعذبني و زوجي يخنقني

السلام عليكم ورحمة الله وبركاته
أنا عندي مشكلة وحبيت انكم تساعدوني
تزوجت من سنتين وعمري وقتها 18 وزوجي عمره 31 مشكلتي اني ناعمه جداً ودلوعة وكمان صوتي انثوي لأبعد حد وهنا المشكلة زوجي ما يرضى ان أحد يسمع صوته غيره ولو بيده كتم نفسي
يعني مثلاً أول ما تزوجت قابلت اخوه بالغلط وطبعاً ع طول بعدت يعني ما اتوقع ولا واحد بالميه انه شافني بس هو الله يهديه دخل المجلس وقعد يقول بعذرك يا فلان ما عاد تجينا ولا نشوفك وكذا يعني ع اساس يمزح زوجي عصب ولما رحنا البيت جلس يهاوش ويهاوش وانا ساكته قلت ما ودي بدايتها ارد عليه واذا بغيت سوق لازم يروح معاي يقول ما يصير تروحي لوحدك و انا ما تعودت ع كذا ابدا ماما مدلعتني مره تخليني اسوي اللي ابي سكت وقلت معليش خلي يروح معك عشان ما يزعل صار حتى ما يبيني اتكلم بالسوق يقول امشي وانتي ساكته واذا دخلنا محلات لا تكلمين العمال مره كان زوجي مشغول بجواله وسألت العامل يطلع لي مقاس أصغر فجأه ما حسيت الا بزوجي يسحب البلوزة مني ويرميها ويطلعني من السوق بالهواش المشكلة انه ما يقدر اني أحاول أغير اسلوبي وطريقتي ولما اخوانه يدخلون الصالة يسلمون ع جدته يخليني أطلع أقوله طيب البس جلال كل حريم خوانك يلبسون جلالات ويجلسون يقول لا أخاف يشوفونك شلون يشوفوني والجلال مغطيني من راس الى رجليني لا ويقول بعد والله لو ادخل واشوفك جالسه اذبحك المشكلة اضطريت اني كل ماسمعت انهم بيدخلون اطلع واعتذر بأي شي مره مكالمة ومرة اروح للحمام بس إلى متى؟ وخايفة انهم يلاحظون وانا ماودي
قبل خمس ايام رن التلفون ورديت وقلت غلطان وسكرت وماكنت ادري انه وراي لو اني داريه كان قلت مع السلامة ع أساس اني اكلم صاحبتي بس ما حسيت فيه وراي لما سكرت السماعه قعد يهاوش كالعادة انا هنا خلاص انفجرت وعصبت بجد يعني انا وش دراني انه واحد غلطان ؟ وقعدت اقول كلام ما ادري وشو ما أذكر ولا كلمة هو هنا انصدام ع باله زي دايم بقوله ليش ويسكتني بكلمة أغار عليك ما تفهمين؟ قعد يصارخ بصوت عالي ويقول قال الله تعالى (ولا تخضعن بالقول فيطمع الذي في قلبه مرض) قلت له انا ما قعدت ادلع ع الرجال كل اللي قلته اخوي غلطان وسكرت عصب وسفهني وما صار يكلمني الا اوامر الى الآن مره ضايق صدري مدري وش اسوي معه وودي اراضيه قبل العيد بس ما اعرف كيف :icon33:

اسفة طولت عليكم :kiss2::kiss2: