ماي كوين @may_koyn

عضوة جديدة

صور بناتي في جــوال الشغــاله .. دخليكم شوروا عليه وش أسوي .. والله إني في هم

( بسم الله الرحمن الرحيم ) خير الكلام أبدا به ..

راح أكتب سافلتي على طول من غير مقدمات .. بس دخيلكم شوري عليه وش أسوي
والله ثم والله واللي رفع السما وثبت الأرض إني في هم مايعلم فيه إلا رب العباد :

السالفة إن الوالده الله يطول بعمرها عندها شغاله إندونسية شاطره بكل شي تبغينه من طبخ وشغل البيت ونظافة وحرص واهتمام ونباهه وذكاء , خلصت مدة إقامتها سنتين وطلبت تسافر لأهلها بس الوالده طلبتها تجلس لو سنة وحده وتزيد راتبها , الشغالة وافقت بشرط وهو يجيبون لها أهلي( جـــــــوال )
وافقوا أهلي وجابوا لها جوال جديد من غير كاميرا , استخدمته 3 شهور بعدها راحت للوالد من غير علم الوالدة وطلبت ( جــوال بكاميرا ) من رواتبها !!!
طبعا الوالد من طيبته الزايده شرى لها الجوال اللي تبغاها من غير علم ومشورة الوالدة ..
بعدها بفتره بشهر جيت لأهلي زياره اسبوعين , أتفاجأ إنه صور بناتي وعيال إخوان في جوالها
تصورهم لما يكون معاها وإحنا لاهيين عنها , واللي اكتشفت الصور وحده من خواتي ,
استغلت شغلها في البيت وقامت تفتش في الاستديوا وشافت صور بناتي وعيال إخواني ..
طبعا أختي مسحتها من جوال الشغالة وخربت إعدادات الوسائط , بس مافي فايده تقوم تسوي الإعدادات وتصور , ومنعتها أختي لا تصور أحد .. لا بناتي ولا غيرهم لكن مافيه فايده !!
المره الأخيره اللي زرت فيها أهلي كمان صورتهم من جديد
مع إن الشغاله عارفه إنه فيه أحد يفتش في جوالها ويمسح الصور ..

عارفه بتقولون غلطة الوالد ( مع إنه ندمان بعد ماعرف سالفة الصور .. بس هو من حسن نيه شرى لها اللي تبغى عشان تجلس سنة زيادة )

والله يابنات إن النوم ما أنام زين من ذي الشغاله وسالفة صور بناتي عندها ..
وإن دموع على خدي كل ماشفت بناتي قدامي خاصة وهم نايمين , خايفة تسوي بصورهم شي إذا سافرت بلدها , أو قد أرسلت لأهلها الصور يحتفظون فيها لغاية ماتسافر لهم بعد ماحست إن الصور تنمسح من جوالها ,

شوروا عليه وش أسوي أنا امي ؟؟
أو ارفعوا موضوعي الله يرفع قدركم ويرزقكم ماتتمنوا ولا يشوف زوج وحده فيكم غيرها في عيونه

دخليكم اهتموا بموضوعي ولو برفعه على الأقل

في إنتظار ردودكم عليه

يلزم عليك تسجيل الدخول أولًا لكتابة تعليق.

تسجيل دخول

محتاره900 • 14 سنة

استودعي بناتك ربي وان شاءالله يحفظهم منها وش كانت نيتها ...

هددوها انكم بتاخذون الجوال اذا لقيتو اي صوره

متجر شمس • 14 سنة

الله يحفظهم لك انا اسمع كثير من الناس اذا كانوا خايفين من شغاله ياخذون من شعرها ويقولون لها اذا سويتي اي شي شعرك عندنا

عذاابي • 14 سنة

عادي يختي يمكن تحب لاطفال
قبل ماتسافر اخذي الجوال منها وعطيها غيره
والله يعطيكم خيرها ويكفيكم شرها
وان كان ارادت بكم سو الله يرد كيدها بنحرها
وعليك بتحصين عيالك

»[ мɪss • qzαℓ ]« • 14 سنة

شوفي عزيزتي
آحنا مانقدر نظلم الشغاله
لآنه يمكن تحب الاطفال وعندها اولآد وتفرح يوم تشوف صورهم
والشيء المهم اذا حصنتي اولادك واستودعتيهم الله
والله ماراح يصيبهم اي شيء لو ايش ماصار
لان الله حآفظهم

دلوعة زوجها وبس • 14 سنة

حصني بناتك... واستودعيهم الله.. واذا جت تسافر امسحي الصور