كما وعدتكم يا بنات راح أنزل لكم مجموعة ثانية من أفكاري التي أطبقها في بيتي وأحس أنها مريحتني واااااااااااااايد، يمكن يبنات هالأفكار تكون جداً عادية بالنسبة لكم ويمكن تكون مميزة للبعض ولكن أنا غرضي فقط إن الكل يستفيد.
تدرون أنا أحب كل ما يختص بالتنظيم والترتيب وكل مرة أفرفر في رامز ودايسو والمحلات إلي على هالشاكلة، مرة شفت في رامز كبت صغير عجبني مرة وهو مستخدم لتعليق المفاتيح قلت في نفسي ليش ما أستغله لشغله ثانية وفعلاً أخذت هالكبت وعلقت فيه الإكسسوارات الخواتم والتراكي وفعلاً صار مرتب ومريح جداً
والشغلة الثانية تعرفون بعد الطبخ شنو تكون ريحة البيت شئ فظيع وخصوصا ريحة البصل تنتشر في كل بقعة في البيت، جربت طريقة واستغربت شلون اختفت الريحة، سويت فحم وخليت عليه اللبان والله أختفت الريحة بشكل فظيع ولا كأني طابخة، وخليت قدر صغير على النار وخليت فيه حب هيل والله أنتشرت الريحة في المطبخ وأختفت ريحة الطباخ
والشغلة الأخيرة جبت مرشين وخليتهم على تسريحتي واحد عبيته ماء ورد، والثاني عبيته بيبي أويل وقطرات من أي مخلط عود أو عطر، وبعد ما اتروش أرش جسمي منه والله ريحة الجسم تصير جنان وتصير ناااااااااعمة حيل.
هذي يبنات بعض أفكاري وإن شاء الله أعجبتكم ويا ريت كل من يعجبها الموضوع تدعي لي بالذرية الصالحة الطيبة. وإن شاء الله أنزل لكم بعض الأفكار في المرات الجاية
راح اجرب طريقة المرشات