السلام عليكم جميعآآآآآآآآآآآ و رحمة الله و بركاته
أول شي بحييكن كلكن , من أرض الشام بسورية و بتمنى تقبلوني عضوة جديدة معكن
طبعآ هي أول مشاركة إلي بهالمنتدى , و مشان هيك حبيت نزل أكلة كتير طيبة و مميزة , و طعمتها غير شكل و اللي شجعني إني نزل هالأكلة بالذات إني عملت كتيييير بحث عالنت و ما لقيتها نازلة قبل هلأ , فبعتقد إنه راح تلاقو الأكلة جديدة و يااااااااااارب إنها تعجبكن , و هيي أكلة طيبة و مغذية و مفيدة و مناسبة لرمضان
هالأكلة اتعلمتها من وحدة صديقتي بالشغل و هيي متعلمتها من إمها , و إمها من حلبية من أصل تركي , يعني هالأكلة بالأصل تركية , و نحن منعرف إنه المطبخ الحلبي عنا بسورية غني و متنوع و لذيذ و خاصة إنه متأثر بالمطبخ التركي العريق .
راح نبلش على بركات الله ,
يالله بسم الله
المقادير ,
أربع فخاد دجاج أو ما يعادل نصف فروج كامل
و بقية المقادير مناسبة لكمية الدجاح الموجودة
نصف كوب ليمون معصور
نصف كوب من زيت الزيتون ( لازم زيت زيتون مو أي زيت تاني )
ملعقة صغيرة من مسحوق بزر الكزبرة
جزر مقطع دوائر رقيقة
كمية من البزاليا
طبعآ كمية الجزر و البزاليا على قد صينية الطبخ
ملح
كمون
ورق غار
قرفة
هيل
بهار مشكل ( أي تشكيلة بهار معتمدة عندك للطبخ )
بصلة مقشرة
الطريقة :
نضع أفخاد الدجاج بالطنجرة على النار مع كمية مناسبة من الماء , و نضع البصلة المقشرة
ننتظر قليلآ حتى تظهر الرغوة ثم نقوم بإزالة هذه الرغوة عن وجه الماء
و بعد هيك , نضع ورق الغار و الهيل و القرفة و الكمون و البهار و نتقصد وضع كمية زائدة من القرفة و الكمون و البهار و الملح ( لأنه راح يدخل عنا بعد هيك بقية المقادير)
نقوم بسلق الدجاج لينضج فقط نصف نضوج
الآن نخرج الدجاج من الطنجرة و نقسم كل فخد قسمين بعد تقشيره ( في حال استخدام فروج كامل بدلآ من افخاد الدجاج نقوم بقطع الفروج لقطع أصغر)
نضع القطع بالصينية و نضع الجزر و البزاليا حولها و شوية ملح مشان الخضار
ثم نصفي مرق الدجاج لتغمر مكونات الصينية حتى ثلاثة أرباع قطع الدجاج فقط ( و بأكد مرة تانية فقط حتى حوالي ثلاثة أرباع القطع )
الآن : نضع زيت الزيتون و الليمون و الكزبرة في نفس الوعاء و نخلطها جيدآ
ثم نقوم بصب الخليط بهدوء فوق المرقة في الصينية , بحيث الآن تتغطى مكونات الصينية حتى تنغمر لأعلاها
الآن نضع الصينية بالفرن , و نشعل من فوق و من تحت
هلأ في ملاحظة كتير مهمة : و هيي إنه راح نلاقي مرقة الصينية صارت تتبخر , راح نتركها تتبخر لإنه هون سر هالطبخة , لمن المرقة بتتبخر بتقل كميتها و بتنزل و بالتالي الليمون و الزيت اللي عالوجه راح يمتصهن لحم الدجاح , فاللحم بييكتسب طعمة الليمون و الكزبرة و بيقرمش , و بيطلع الدجاج مقرمش بطعم الليمون مع الكزبرة و هيي نكهة كتييييييييييييير طيبة ( و طبعآ زيت الزيتون هوي الزيت اللي بيقرمش اللحم , و هادا سر خبرتني ياه رفيقتي الله يجزيها الخير )
و طبعآ كل شوي راح نحرك على مهلنا الخضار اللي على وجه الصينية بملعقة طويلة
و ننتظر حتى تجف حوالي ثلاثة أرباع المرقة و هيك بيكون اللحم مو بس استوى كمان صار مقرمش و اكتسب النكهة الطييييييييييبة
هون بالصورة , انقطعت الكهربا فاضطريت طلع الصينية على الغاز و كمل طبخها عليه
و هيك بتكون الطبخة صارت جاهزة للأكل متل ما شايفين
و صدقوني راح تاكلو أصابيعكن وراها
و ألف صحة و هنا
و هادا أول موضوع إلي و بتمنى تشجعوني و لاقي ردود حلوة منكن
و السلام عليكم
الله يعطيك العافيه