اليوم عملت طريقة معروفة لأكلة، لكن أنا استبدلت التوست اللي فيها بعيش صامولي، كان موجود عندي عيش صامولي لو قعد كمان يوم كان نشف وماحد أكله، ويمكن كان خرب كمان.
عشان كدا قلت أستغله وأسوي فيه أكلة، عشان بدل ما ينشف وما نستفيد منه، نقدر نسوي منه طبق لذيذ، حتى اللي أكلوه حسبوه توست ما عرفوا إنه عيش صامولي.
وهذي الصور:
والطبق عبارة عن:
1- عيش صامولي قطعته دوائر متساوية (حلقات)، تقريبا ا سم (واحد سم)، وحطيته على جنب.
2- عملت خلطة: علبة قشطة + ملعقتين مايونيز + ملعقتين جبنة كاسات سايلة، خلطتهم مضبووووط وحطيت عليهم تقريبًا ربع ملعقة صغيرة ملح، ورشة فلفل أسود، وحطيته على جنب.
3- عملت الحشوة:
- صدور دجاج، تقريبًا 6 صدور.
- حبة فلفل رومي مقطع صغير.
- حبتين جزر مبشور
- بصلتين مبشورة.
- 6 فصوص ثوم مدقوق ناااااااااااااعم (أنا أحب الثوم، ممكن انتي تخليها أقل، ممكن فصين أو حتى فص على حسب ما تحبي)
- وثلاث ملاعق إلى أربع ملاعق زيت.
لعمل الحشوة:
نضع الزيت في قدر على النار مع البصل، لغاية ما يحمر شوي، نضع الثوم ونقلب لمدة دقيقة أو دقيقتين، (طبعًا كله نار خفيفة أو هادئة متوسطة) ثم نضع الجزر والفلفل الرومي، ونقلبهم.
نقطع الصدور مربعات صغييييرة، ثم نضعها على خلطة البصل، ونغطي القدر لغاية ما يستوي الدجاج، حطي بهاراتك المفضلة، أنا عن نفسي حطيت ملح وكزبرة فقط لا غير.
نرص حلقات العيش في صينية بايريكس أو أي صينية، ثم نضع تقريبًا ملعقة أو ملعقتين كبيرة من خلطة القشطة، فقط لمسح العيش، ثم نضع نصف مقدار الدجاج، ونوزعه على العيش مضبوط.
ثم نغطي الدجاج بدفعة ثانية من العيش، ثم نأخذ مقدار ملعقتين من خلطة القشطة في زبدية صغيرة ونضيف لها ملعقتين كاتشاب، ونحركها مضبوط، بعدين نمسح فيها وجه العيش الأخير، ثم بقية الدجاج ثم آخر طبقة العيش.
ثم نضع بقية خلطة القشطة كلها، ونبشر فوقها جبنة صفراء تشيدر، ونضعها في الفرن من تحت عشان تتماسك، ومن فوق لغاية ما تحمر... (أنا انحرقت علي شويه)
وطبعًا الحشوة ممكن تسوين اللي تبغيه، يعني ممكن تسويه بالتونا أو بالخضار أو أي حشوة تعرفيها وتحبيها.
والقشطة ممكن لو بقي معاكِ قشطة في الثلاجة تستخدميها، ولو باقي جبنة من فطور تستخدميها.
المقصد لا ترمين أي بواقي أو تتلفيها، أو تقولي مالها فايدة، ممكن يصير أي شي من كل شي.
وبالهناء والعافية وإن شاء الله تعجبكم.
يسلم يدينك و بالعافيه عليكم