صينية خضار لذيذة وسريعة والاهم صحية

السلام عليكم
امس كنت بسوي عشاء وماادري وش اسوي عندي خضار ومشتهية صينية خضار بس مالي خلق قلي وريحة وافتح الثلاجة والقى فيها كشة بيتزا مسويتها من كم يوم وباقي منها شوي قلت حلو وبديت اشتغل وماشاء الله النتيجة ماتوقعتها لذيذة كذا لان الخضار مسلوقة مو مقلية
المقادير والطريقة
حطيت موية مغلية في قدر ومعها قطعة ليمونة عشان مايسود القدر وقطعت فاصوليا قطع صغيرة وحطيتها في القدر وجلست 5 دقايق بعدين حطيت الجزر وبعد5دقايق حطيت البطاطس وبعد5دقايق حطيت الكوسة
طبعا هذي الخضار اللي عندي واللي تبي تحط خضار زيادة براحتها وحطيت مكعب ماجي وملح وبهارات وخليتها10دقايق وصفيتها من المويه وحطيت عليها بقدونس مفروم
الكشنة طريقتها
نسخن زيت على النار ونضع عليه ثوم مقطع واذا بدأ يشقر نضع عليه البصل المقطع واذا استوى البصل نضع الصلصة والملح والماجي الابيض والبهارات وزيت الزيتون
نطفي النار ونضع كاتشاب وشطة اندونيسية مرة لذيذة مع الكشنة بعدين نخلط الكشنة مع الخضار ونصفها في الصينية
في الخلاط
ملعقتين قشطة وشوي حليب سايل عشان نقدر نفرد الخلطة على الصينية و3 حبات جبن مثلث وملعقة صغيرة خردل وملعقتين طحينة سايلة ونصف ليمونة معصورة وملح وبعدين نصبها على الخضار ونزينها بالبقدونس المفروم والسماق
وندخلها الفرن من تحت واذا تماسكت الخلطة نحمرها من فوق
تؤكل بالخبز او مع الارز الابيض