أتمنى ممن ترغب في نقل الموضوع بذكر اسم صاحبة الموضوع ... ولكم مني جزيل الشكر
صور ومشاهد من واقع مؤلم نعيشة ....
لكن للأسف لين متى بتستمر هذي المشاهد؟؟؟
وشو الهدف من هذا الزيف كله؟؟؟
تعالوا معاي اقرأوا وابدوا رايكم بكل صراحة....
أكيد مثلي تشوفون مواقف أو تعيشون وسطها....
بس البعض من كثر ما تتكرر عليه ... ممكن ما يلتفت لها .... ولا يحس بحجم مأساتها ....
فحبيت ألفت الأنظار لها .....
لأن إذا قرأتوا بتعرفون إنها كارثة ومصيبة .... لا بد من التكاتف ... علشان نتصدى لها ....
1- مريم عمرها 12 سنة تتكلم مع صديقتها نورة بعد غياب استمر اسبوعين وتقولها: تصدقين يا نورة مشتاقة لج حيل واسمحي لي انقطعت عنج اسبوعين ... بس سافرت فاسبوع سرت ألمانيا والأسبوع الثاني قضيته في اليونان وأمس وصلت .... طبعاً مريم حتى مسافة 50 كيلومتر ما تحركت من البيت ... وتسترسل مريم عن الأماكن إللي شافتها ... وطبعاً الله يخلي النت إللي جمعت منه البيانات .... والأم تسمعها وبعد ماخلصت مريم مكالمتها ... تضحك أمها وتقول الله يقطع سوالفج .... جذي الوحدة تكذب .... وينتهي الموقف ولا كأن صاير شي....
2- علياء عمرها 11 سنة وأمها وأبوها ناس محترمين .... والله أنعم عليها بجمال واختها إللي أصغر عنها معاها في نفس المدرسة بس مب ذاك الزود في الجمال .... وفي نهاية الدوام تقولها اختها الصغيرة .... يالله الماما جاية تاخذنا .... يقولون هذي اختج تقول هيه من الأبو وأمها جاية تاخذنا .... تستعير من اختها .... والأم والأبو عارفين ... بس يتكلمون عنه الموضوع وهم يضحكون.... لأنها تستحي من اختها.... ويقولون لها اختج مب خسفة فليش؟؟؟ أونهم حلو المشكلة
3- حمده عمرها 10 سنين أمها توصي صديقاتها أو الجيران يوم يسافرون أوروبا يجيبون فساتين وبِدل وأدوات مكتبية لبنتها .... علشان البنت ماتكون أقل من صديقاتها وتقدر تقول لهم إنها سافرت وجابت واشترت وتراويهم.... بين ما البنت ما شافت حتى شارع المطار .... يعني الأم تساعد بنتها على الكذب.... فحسبي الله ونعم الوكيل
4- شيخة عمرها 9 سنين حافظة كل إغنية جديدة بس للأسف ما تحفظ شيء من سور القرآن القصيرة و لاتعرف تصلي والا حتى أي جهة القبلة ...... والأم والأبو فرحانين بأن بنتهم تحفظ كل الأغاني .... ولا زعلانين على بنتهم إنها ما تحفظ أي سورة من القرآن .....
5- خالد عمره 13 سنة ويكلم البنات على الماسنجر ويغازل ..... والأبو يفتخر فيه ...... يقول ولدي مخه كبير ... ويعرف يعلق بنات الناس فيه... وإنه لد وما يعيبه شي .... خلوه يتعلم ويجرب.... ناسي إن عنده بنات ... وإن كما تدين تدان.....
6- عبد الله عمره 12 سنة يسوي شعره سبايكي ولابس شورت أونه واحد من عيال الهاي كلاس ... وعلى الموضة ... حسبي الله على الموضة إذا كانت تنسيني الواحد أصله.... والأم تتفاخر فيه جدام صديقاتها والأهل إن ولدها يمشي على الموضة....
7- راشد عمره 11 سنه يأذي جدته وخالاته وعماته ويلعب في أعصابهم كثير .... والأم تشوف وتسمع وساكته.... وما تكلمه حتى بينها وبينه ... تقول تخاف يحس إنه شخص غير محبوب من تصرفاته ... وبعدها يتعقد ... وإذا كلموه خالاته أو عماته ... قالت حرام لا تحرجونه .....
8- ناصر عمره 5 سنين يحب يوقف وراء الباب ويتصنت ويسمع الكبار شو يقولون .... وإذا أمه تكلمت من التلفون رفع السماعة الثانية ... وممكن يدخل في نص الحديث ويشارك.... ويرفع صوته على الأكبر منه ويسب... وإذا عصب على الأم ممكن يقول للأبو طلقها وجيب لنا أم غيرها ... أو العكس إذا الأبو عصب عليه .... والأم والأبو فرحانين فيه .... إن صغير وهذي سوالفه ..... ناسين إن التربية في الصغر كالنقش على الحجر ... والتربية في الكبر ... كالنحت على الترب ...
(غيرت اشوي المثل بس اعذروني ... من حر ما فيي)
فمن وين تجي التربية ؟؟؟
إذا كان رب البيت بالدف ضارب ..... فشيمة أهله الرقص
كيف ممكن يخرجون أجيال صالحة تحمل لواء محمد عليه الصلاة والسلام
وهم يزرعون فيهم كل ما يغضب الله ورسوله ؟؟؟
كيف هذي الأجيال ممكن تغار على دينها وتصدى لكل واحد يحاربهم .... وهم انغرست فيهم هذي الشيم ؟؟؟
فياليت لو بس شوي نلتفت لتربية عيالنا
لأن لو فات الفوت ... ما ينفع الصوت .....
فهالله هالله
التربية ثم التربية ثم التربية
دلوعة & حبوبة @dloaa_amp_hbob
محررة فضية
يلزم عليك تسجيل الدخول أولًا لكتابة تعليق.
الصفحة الأخيرة
بس هو اعتبرها مزح مافيها شي لانه الكل بيعرف ابنه شاطر من صغره....