ضايعة

السلام عليكم
مو عارفة كيف اصيغ كلامي او ابدا
ما بدات اكتب الموضوع دا الا بعد بكى ساعة ونص قعدت اطًلع كل اللي في خاطري وقلبي بالبكاء
احس اني ضايعة مو عارفة راسي من رجولي يا بنات احس الزواج غيرني للاسوء سايرة عصبية وما اتحمل كلمة اهملت فنفسي شعري جسمي كل شي ماعدا اولادي وزوجي وبيتي قايمة فيهم وما بقصر بحقهم ولا في شي واحد حتى الحق الشرعي ببدع فيه والحمدلله مابيشتكي زوجي منه حتى لو اني بموت تعب وارهاق برضيه وبنفس حلوة كمان .
لكن احس اني تعبت او بالاصح ضعت ساير كل يوم صداع. ما يفك مني وبدات اكتئب كل يوم اكتر من اللي قبله ايوا اصلي واقرا اذكاري والقران اصلن شغًال في بيتي ٢٤ ساعة اوقات اقول اروح لطبيب نفسي افضفض واخرج من عندو ولا عاد ارجعله لاني مقدر اتكلم لاحد كل مين حيمسكها عليكي في يوم من الايام حتى لو زانت امورك حيذكروكي بالوضع اللي كنتي ضعيفة فيه ايوا في حاجات جميلة في الزواج بس لا نضحك على بعض الحاجات السيئة اكتر من الجميلة والله جلست قبل شوية اابكي ابكي ابكي بصوت محد فيه في البيت ف اخدت راحتي وطلعت كل اللي جوتي انا لسى دوبي تلاتة سنين متزوجة معقولة كدا حتكون كل السنين ؟ مافي شي حيزين ؟
زوجي مع الناس مرح ويضحك ويمزح ومعايا يقعد كانه عندو حالة نفسية ساكت ولو اتكلمت على شي جلس يكلمني عقلانيا ومدري ايش هوا اكتر واحد اثر في شخصيتي طبعا مع المسؤليات الاخرى
اول كنت بس اضحك ومرحة وامزح واللي يجلس معايا ينبسط روحي جدا حلوة وشخصيتي طيبة وما ازعل كتير بشهادة ناس كتير عاشروني
لكن بعد الزواج سايرة كئيبة ومهمومة احس يا بنات اني كبرت ٣٠ سنة فوق عمري والله اني تعبت
مين مرت بنفس الشي دا وكيف اتخطيتيه انا عجزت الاقي حل غير الصلاة وركعتين تريحني لكن بعدها يرجع كل شي علىً حاله ما يتغير شي
ابا حل لاني لو استمريت كدا يمكن اموت اقسم بالله 😭