ضايقه فيني الوسيعه وجايه افض فض

تزوجت وعمري 18 سنه ولد عمتي من الرضاع رجال طيب وخلوق واجهتني مشاكل معه كثيره بس كنت الزم الصمت وعادي اجلس اسبوع اسبوعين شهر ما اتكلم وهو من النوع اللي ما يراضي الا اذا طاح الحطب من طول المده
وهالشي تقريباً مخلي علاقتنا رسميه مابيننا اسرار مابيننا سوالف كثيره ماقد تكلمنا مع بعض بخصوص العشق والهيام او حتى بموضوع الاطفال مجرد نقاشات خفيفه وتتقفل بسرعه
هو شخصيته كذا وانا احترمتها وعشت معاه بنفس شخصيته والشهاده لله مو مخلي علي قاصر
وانا الحمد لله انسانه راضيه بأي شي يكتبه ربي ولله الحمد علاقتي باذكاري والقران جيده ويمكن هالشي اللي محسسني بقوتي وعدم ضعفي وخلاني ابث التفاؤل بكل مكان اروحه واي وحده اشوفها زي حالتي بالتشجيع وحسن الظن بالله والصبر على البلاء وكانت اسئله الناس تجرح ونظراتهم تقتل بس كنت اقول هذا ربي وهذا اللي كتبه وانا راضيه الحمد لله
مرت اول سنه وماحملت وماكنت معطيه الموضوع اهتمام لصغر سني قالت ام زوجي شوفو وش المشكله والا بزوجه
وبدا مشوار العلاجات وكانت النتايج تقول ان مافيه سبب قوي يمنع الحمل مجرد ارتفاع هرمون الحليب وزوجي شوية ضعف للحركه
ومع مرور السنين سويت صبغه اكثر من مره وقال عندي رحم ذو القرنين واحتمال هو سبب تأخر الحمل
كان يقول لو طلع السبب مني بطلقك تشوفين حياتك وكنت اقول من قالك ابي اطفال انا مابيهم الا منك اذا الله ماكتب آمنا ورضينا باللي كاتبه ربي وبكمل حياتي معك وبدون اطفال
وكنت اقول له ولو طلع مني يقول استحاله اخليك او اطلقك بس بتزوج عليك وكنت انقهر واعصب ونتجادل كثير اقول له وين الوفا شوف موقفك وشوف موقفي
وهو من اول سنه يقول بيتزوج وانا اتضايق واقول الله يستر عليك بس مستحيل اقعد معك
كملنا الحين 13 سنه وصار عمري 31
وعمره 38وكنت اترجاه نسوي اطفال انابيب وكان يرفض قبل 3 اشهر تقريبا و فجاءه قال بنسوي اطفال انابيب الظاهر بيتأكد ان مافيه عيب
طرت من الفرحه وسوينا تلقيح مجهري بس رحمي كان فيه حاجز مو قرنين زي ماقالو لي زمان وشالو الحاجز الرحمي وبعدها سويت التلقيح المجهري وكنت اعد الايام والساعات الين مرت الاسبوعين وطلعت حامل فرحتي وفرحة زوجي ماكانت تنوصف وزادت اكثر بعد شهر من التحليل سويت سونار وكانو تؤام وداني عند اهلي عشان تراعيني امي فترة حملي
ورجع لدوامه بمنطقه ثانيه
واراد الله اني افقد حملي قبل لا اكمل شهرين وانهرت بس قلت الحمد لله الله يعوضني اللهم اجرني في مصيبتي واخلفني خيراً منها
واتصلت من المستشفى اعلمه كان ردت فعله عاديه وما واساني واعتذر ان عنده شغل وقفل انا توقعت انه بعد الموضوع عليه مو سهل لاننا تعلقنا بها الحلم بعد الله بشكل كبير اتخذت له عذر وطلعت من المستشفى وقال انه بيجي يتطمن علي وما امداه الا بعد ثلاثه اسابيع
جا وقال وش قالو سبب الاجهاض قلت ماقالو شي خلنا نروح الرياض ونشوف قال بعدين مو الحين
قلت له ان الدكاتره بعد عملية التنظيف قالو احتماليه حمل طبيعي كبيره ان شا الله بس راجعينا بعد دورتين
الحين كملت بعد الاجهاض 50 يوم بالضبط
ويفاجئني البارح انه من اول ماعرف اني اجهضت وهو بيتزوج ويقول تراني بتزوج شهر12
بكيت وانهرت وماعرفت وش اقول
قلت طلقني قال بوديك لاهلك وشاوريهم قلت مالهم شغل انا اللي بعيش قهر الضره مو اهلي قال مراح اظلمك وبعدل بينكم وانا من البارح مانمت اصيح ع العشره اللي بيننا ماهانت علي
واصيح واصلي وادعي ان الله يبرد على قلبي
من امس اصيح قدامه ماواساني ولا قال هوني ع نفسك مو الحين بتزوج الموعد شهر 12
معاه ع نفس السرير ويسمع صياحي ماهنت عليه وانا من غبائي كنت اوصف له لحظات الاجهاض وكيف اني كنت ابيه جنبي وهذي اول مره اعترف له بضعفي واني مكسوره وحزينه وطلبته يعوضني هالاجازه برحله لاي مكان عشان اجدد نفسيتي وكان يقول ابشري بشهر 12 انقهرت اثاريه يجهز لي هالمفاجئه
قلبي احس فيه نار ولا اقدر اقول لاهلي الا اذا تزوج فعلا
ولا اقدر اكمل معه لاني عارفه نفسي ما اقدر ع الضره ولا لي في المشاكل وعوار الراس مسالمه جدا لدرجه مر ع زواجنا 13 عمري ماشكيته لا لهلي ولا اهله ما احب انها تكبر
ولا اقدر اتطلق واروح لاهلي بحس بإنكسار
ومدري كيف بعيش معه هالشهرين وانا عارفه ان قلبه مو معي مع تجهيزات عرسه والعروسه الجديده
المشكله معلمني بها الشهر الفضيل صلاتي راحت كلها بكا تلاوتي للقران كلها بكا شغلي في البيت سرحان وصياح اللهم اجبر قلبي اسئلك ياحي ياقيوم ان تبرد على قلبي وان ترزقني الرضا بالقضاء وان تعوض صبري خير
مجرد فضفضه وادري اني طولت بس من حر مابقلبي الله يهونها علي