ضايق خلقي عشان كذا بفضفض

ضايق خلقي قلت اكتب مع اني ما احب اكتب صراحة ..


اخذت منشط كلوميد الشهر هذا .. وجيتها يوم 11 من الدورة طلعت بويضتين وحده حجمها 15 ونص والثانية 10 ونص ..
المهم قالت لي تعالي بيوم 13 من الدورة اشوفها وعليها اعطيك ابرة تفجيرية ..
جيتها وسويت سونار داخلي قالت لي البويضة خلاص خرجت مافيه بويضات والكيس تبع البويضة فاضي وحجمه 20 ..
طبعا انا كان امس بالليل فيه جماع واللي قبله لا واليوم بعد صار جماع بعد ماجيت من الدكتورة ..
انا ضايق خلقي مادري كنت مهيئه نفسي اني آخذ ابرة تفجيرية ويكون جماع محدد وقته عشان ماتروح علي ..
مدري ليش تضايقت ودموعي ماوقفت والله غصبا عني ..
الفلوس مو بالساهل احصلها .. حرمت نفسي من اشياء عشان المنشطات والمواعيد .. وآخرها مافيه حمل ..
معي تكيسات ..
fsh 6
hl 12
والعام كان تحليلي كذا :
fsh 2
hl 4
تقول لي ان التكيس معاك مو شديد بالعكس خفيف وممكن فيه حمل ..
مع اني نزلت وزني 12 كيلو ولي مواضيع عن تنزيل الوزن .. ومامعي غدة ولا هرمون حليب ودورتي منتظمه ولله الحمد ..
بس تعبت انا ، كل شهر اراقب التبويض واشوف فيه آلام تبويض او لا ..
قالت لي اذا مافيه حمل برضو اعطيك منشطات الشهر الجاي .. وانا رفضت قلت ابي اشعة الصبغة بشوف سلامة الرحم والانابيب ..
قالت خلص اذا ماحملتي الشهر هذا .. جهزي حالك للصبغة الشهر القادم ..
فيني احباط وخوف .. انا السونار الداخلي بالموت سويته كيف الاشعه هذه !!!
وكل ما اتذكر سالفة الفلوس والمراجعات ابكي طول الليل ..
اخاف تبويض الشهر هذا راح علي .. والله الفلوس ماحصلتها بالساهل ..
زوجي فحص وسليم ومبسوط انه سليم ولما اقول له مادام اننا ندفع للمستوصفات ليش مانجمع ونسوي حقن مجهري او انابيب ويرفض ..
ايش يهمه اذا هو سليم .. ممكن بعد كم شهر او بالقريب العاجل يقول بتزوج ..
والله مايصبرون مثل صبرنا ..
وطلبت مني تحليل اجسام مضادة الشهر القادم بعد هذا هم فوق هم اشعة الصبغة ..
بنات الجماع عادي اقوم بعد ساعتين للحمام الله يكرمكم .. والله ماقدر اضل للصبح من غير ما اروح للحمام ..
ضروري يعني ابقى اكثر من ساعتين بالسرير !
اخاف اسوي الصبغة يطلع فيه مشاكل بالانابيب والرحم والله مو ناقصه هموم ورحت للممرخة قالت لي معك سدد وميلان بالرحم ومرختني وعلى كلامها تقول رجعت الرحم لمكانه بس باقي السدد يروح ..
ووقفت المتابعة عندها لانه فيه دمار لماديتنا وقلت ادفع للمستوصفات افضل واضمن ..
وين ما اروح مسكره بوجهي عجزت اعيش طبيعيه مثل هالناس ..
حاليا هالاسبوع هذا وقت الجماع احس جنبي اليمين واليسار يبون ينفجرون مره يوجعني واحس فيهم .. هل هذا معناته تبويض بما اني اخذت كلوميد !
جزاكم الله خير واعتبروها فضفضة ..
اسأل الله ان يرزق كل محروم بالذرية ويعوض صبرهم خير ..