خالة سيف :

حتي بيت الله...رحنا بس للاسف الضيقة ملازمتنا.... الطفش ذابحنا.... صدورنا ضيقة...حياتنا ملل.... لاطلعة توسع صدورنا ولا سفر ولاجمعه.... احيان نفتش عن اللي ناقصنا... ونقول لو نحصل عليه...بتتغير حياتنا اللي مو متزوجه... تقول لو اتزوج بنشغل وماراح القي وقت..... واكيد مافي ملل وطفش بنشغل بزوجي وببيتي واللي ماعندها عيال... نفس الكلام... واللي تبي الوظيفة ....اخ بس لو اتوظف والثانيه.... يووووه لو يخليني اطلع واوسع صدري مع جاراتي واهلي ولو يحصل كل هذا مع كامل الرفاهيه... والتكنولوجيا اللي وجدت لملأ حياتنا وابعاد الملل والطفش تبقي الضيقة داخلنا.... طبعا لو قلت الدين والقرآن ماجبت شي جديد.... هذا شي معروف.... انا بتكلم عن الطريقة.... يضن البعض ان الدين والعباده تحتاج طقوس... وبروتوكولات... عشان اقيم الليل... لازم الظلام والهدوء.... طيب اخاف من الظلمه... او ما احس بخشوع بالظلام.... عشان ادعي... لازم اكون فاضيه وماني مشغولة ولا اسوي شي الا اني قاعده ومستحضرة جميع حواسي ومهياه للدعاء.... طيب سويتها وماش ما تهيات.... كان فكري مشوش وما ادري وش اقول.... اذا بغيت اسبح واهلل.... اذا بغيت اسمع محاضره.... او او او او.... كل هذا محتاج اجواء خاصه.... خلاص اذا توفرت لي هالاجواء... ان شاءالله ابشري بسعدك.... اسمحولي اتكلم عن نفسي.... لو اشغل محاضره واقابلها....جاني النوم ولا فهمت منها شي.... فالمقابل لو كنت اطبخ.... او فالسياره.... (وهذا الشي سبحان الله من صغري) لو بغيتوني اسمعها لكم... سمعتها حرفيا... من شدة التركيز.... احب اقرأ قرآن وبناتي يحلون واجباتهم... واركز فالقرآن اكثر من لو كان هدوء... وانا اشتغل ادعي واسبح واهلل بكل حواسي.... واكون واعيه للشي اللي اقوله.... (واكيد في اوقات احتاج للخلوه والهدوء والضوء الخافت)... الله سبحانه وتعالي....قال (الَّذِينَ يَذْكُرُونَ اللَّهَ قِيَامًا وَقُعُودًا وَعَلَى جُنُوبِهِمْ وَيَتَفَكَّرُونَ فِي خَلْقِ السَّمَوَاتِ وَالأَرْضِ رَبَّنَا مَا خَلَقْتَ هَذَا بَاطِلًا سُبْحَانَكَ فَقِنَا عَذَابَ النَّارِ) [ آل عمران:191] 　 فيه وحده تقربلي... كانت تقول انا ماني نفسكم انا اذا حجيت برجع انسانه ثانيه... كانت جاده بكلامها وتتكلم بمنتهي الصدق الله يسرلها الحج وهي فالاربعين... ورجعت مثل ماعرفناها... يا اخوات مافي شي ينقلب بين يوم وليله... (طبعا الا اذا الله كتب)... كثير يضنون بمجرد مايروحون عمره او حج انهم بيرجعون اشخاص ثانين.... وانا من ضمن هالناس... واكتشفت خطأئي... التغير يبدأ من مكاني من بيتي.... مو لازم اكون ملتزمه...عشان اذكر الله مو لازم اكون ملتزمه.....عشان اقرأ قرآن مو لازم اكون ملتزمه.....عشان اهلل واسبح مو عشاني ماني ملتزمه يوميا بقيام الليل.... او صلاة الضحي....خلاص ما اصليها.... يا اخواتي تراها مو فرض.... طيب وشيمنع اني اصليها اليوم وعقب شهر او ثلاث شهور او سنه.... هي امور اسويها بسيطه قليله...لعل الله ان يرحمني بها يغيرني يقربني منه سبحانه.... وان زليت ونسيت ومرت فيني الايام وانا غافله وان ما بدأت يومي بالاذكار.... ولا قرأت قرآن.... طيب وش يمنع اني استغفر.... او اصلي علي نبينا محمد(صلي الله عليه وسلم) او اقرأ سورة الاخلاص.... فهي تعدل ثلث القرآن.... عن أبي الدرداء عن النبي صلى الله عليه وسلم : ( أيعجز أحدكم أن يقرأ في ليلة ثلث القرآن ؟ . قالوا : وكيف يقرأ ثلث القرآن ؟ قال : ( قل هو الله أحد ) تعدل ثلث القرآن ) رواه مسلم قال رسول الله صلى الله عليه وسلم : ( من قرأ " قل هو الله أحد " حتى يختمها عشر مرات بنى الله له قصرا في الجنة ) [ سلسلة الأحاديث الصحيحة / 589] 　 المهم اني اعود لساني علي اي ذكر.... ما يمر يومي من غير ما اذكر الله... لو بشي بسيط جدا.... وانا علي اي حال راقده قايمه طالعة اشتغل بالشكل والوقت اللي يريحني.... وهذا طبعا يكون اجباري انا اجبر نفسي واروضها... بالتدريج وشوي شوي... بيتعود لساني علي الذكر وبيلين قلبي... وبتدخل السعاده حياتي.... 　 　 لانها نابعة من داخلي... قرات كلام لابن القيم...ولابراهيم بن ادهم... من زمان.... وما زال كلامهم راسخ في ذهني ....وكل ماتضايقت اذكره... ابن القيم يقول... ( إنه لتمر بي ساعات أقول: لو أن أهل الجنة في مثل ما أنا فيه لهم في نعيم مقيم). إبراهيم بن أدهم يقول: 　 (نحن في سعادة لو علمها الملوك، وأبناء الملوك لقاتلونا عليها بالسيوف))). اسال الله لي ولكم السعاده فالدارين وسعت الصدر والخشوع والرضي... 　 اسمحولي حبايبي اذا ماريت لاني بغيب فتره بسيطه ان شاءالله... وماحبيت يقعد هالموضوع حبيس الوورد عندي... تم بحمد الله...

حتي بيت الله...رحنا بس للاسف الضيقة...