أسأل الله العظيم أن يفرج همكم ويهدي ويشفي زوجك. ويرده إلى صوابه. ويثبته ويعوضك خير ويقر عينك بعيالك ويرزقك برهم ويصلحهم ويثبتهم على مايحب ويرضى وإن شاء الله يااارب يرفعون راسك طول عمرك وينسوك كل اللي مريتي فيه ادعي ي قلبي والزمي اﻷستغفار

المشكلة اذا ولدك تاثر من تصرفات ابوه وقلده بالمستقبل
انتبهي من هالنقطه

الله يبلغك بولدك ويرزقك بره ويبارك لك فيه
اذا تقدرين تتطلقين تطلقي
ما انتي مستفيده شيء منه
غير النقص والحسرة والضرر
الحياة الزوجية استقرار راحة امن سكن
وزوجك ما حقق لك ولا 1%منه
وش ترتجين منه
انفذي بجلدك وخلك قوية
الله يهديه ويصلح حالكم

والله ان بعض الموت لبعض العرب رحمه يموت ويموت معه اختازه الله المستعان

يالله دمعت عيني على ولدك ..
بخبرك قصة رجال كان يسكر واحنا صغار ..
قبل 20 سنة كانت فكرة وجود شخص يشرب مرعبة جدا .. وكان لنا جار أشوفه طيب لأن كنت أروح بيتهم ودايما كان لطيف معانا الحق لله لكن كانو الاطفال يقولون انه يشرب خمر ..
ولأنا كانت أخته صديقتي فكان طبيعي أتردد على بيتهم .. وكان يسلم علي ويسألني عن أبوي وأمي بحكم معرفته فيهم .. ويروح ..
ودايما بعد صلاة العشا كان يجي عند جدي ويسولف شوي ويروح وكنت ألاحظ إنه ينادي جدي أبوي ..
هو كان يشتغل في الشرطة وفي ليلة من الليالي كنا سهرانين والساعة 11 بالليل نسمع طلق سلاح وفجأة اصوات ضرب على بابنا واللا خواته يركضون بدون عبايات وينادون ابوي يقولون فلان شايل علينا سلاح بيذبحنا ..
راح ابوي الله يرحمه وجدي وخالي ومسكوه وهدوه
في ذيك الليلة كانت أمي تبكي بحرقة عليه وتبكي على أمه والحمد لله هو ما صوب حد لكن المسألة إنه أرعبنا كلنا ..
وقالت لنا قصته .. هذا الرجال كان يحب أبوه جدا وهو صغير .. وراح أبوه يشتغل بمنطقة بعيدة وهناك توفى .. وظل الولد هذا يقعد على طرف الوادي كل يوم ينتظر ابوه .. وتزوجت أمه واحد ثاني وهذا الثاني ما عامله عدل وكان يجي يقعد مع جدي لأن جدي كان يحميه .. بس كان في داخه كسر كبير .. وأول ما اشتغل وصار عنده فلوس بدا يدخن وبعدها راح للشراب .. ومع انهم زوجوه إلا إنه ظل على نفس الشيء .. لأن في داخله ولد راح عنه ابوه ولا رجع .. وهو في داخله ما كبر عن هاللحظة ظل ينتظرها ..


تعرفين متى تغير هالرجل .. ما بتصدقين .. يوم توفى جدي !
يوم توفى جدي شفته يبكي مثل الطفل الصغير .. واستوعب إن ابوه راح .. واستوعب ان الموت مر .. وبدا يتغير .. وهذا هو الحين رجال راعي صلاة ودين .. وترك هالسم ..


هالقصىة أقولها علشان تعرفين لو في زوجك كسر قديم من شيء .. تعالجينه من هناك .. وعلشان تعرفين إن الله قادر يغير الحال بغمضة عين ,, هذا الرجل في القصة كان عمره 35 يمكن لما تاب ,, ما تدرين متى ربي يكتب تغيير الحال
عززي ثقة ولدج بابوه وحسسيه إن أبوه مبتلى ومريض وإنه ممكن يتشافى .. وقولي له لا تنجرح من كلام الاطفال ..
هذا لو كان زوجج زين بدون الشراب ..
والله يعينج ويسهل لج تربية عيالج ويهديه ويصلحه