ضروري تدخلون ابي حل لمشكلة جارتي مع زوجها

السلام عليكم ورحمة الله وبركاته
الموضوع وما فيه ان جارتي حصل بينها وبين زوجها زعل والمشكله بينهم كبيره
السالفه ومافيها انها في يوم خرجت السوق مع بزرانها واشترت اغراض كثيره وكانت تروح من محل لمحل وتزيد هالاكياس عليها المهم انها في اخر محل دخلته اشترت منه وحاسبت ولملمت اكياسها ورجعت البيت وهي في البيت اكتشفت انها مضيعه واحد من الاكياس وخافت لاتقول لزوجها عشان ماتسمعلها كلمتين منه فسكتت
وثاني يوم العصر زوجها كان نايم وقفلت عليه باب الغرفه من برا وقالت لولدها روح جيب لموزين وراحت هي ولده لنفس المحل الاخير ولقت كيسها ورجعت المشوار كله مااخذ منها نص ساعه
وعلى دخلتها البيت الا وزجها يدق الباب من جوا الغرفه فكت عبايتها ورمت الكيس بغرفة عيالها وراحت تركض تفتح له الباب سالها وينك من اليوم وليش قافله الباب علي قالت كنت في الملحق مع عيالك وقفلته خفت يدخلوا عليك ويزعجوك الا ولدها الصغير يجئ يبكي ويقول ليش تروحي السوق وما تاخذيني معاك بس والله لا يوريكم على اللى سواه زوجها فيها هواش وسب وتهزئ وبالاخير يهددها بالطلاق هو بطبعه غيور وشكاك ومن الرجال اللي مايحب الحرمه تخرج لحالها حتى عندنا جيرانها يقول ماتروحي لهم الابعد ماتقوليلي ما بالكم خرجت السوق ومع لموزين بغير علمه لا وقافله عليه الباب من براء
وهي المسكينه الحين متورطه تقول ماهي عارفه كيف تكلمه وهواصلا مايبغى يسمع منها كلام ولا يبي يشوف وجهها وكل الوقت براء البيت ولارجع سمم بدنها بالكلام اللي ماله داعي
قولولي وش السوات معه وكيف تتواصل معاه وهو مايبي يشوف ولايسمع منها
واعذروني للاطاله بس حبيت تكونوا في الصوره عشان يكون رائيكم على بينه