مشكوره قلبى ام عزيزان طيب يعنى برايك ماكو اسامى لانك وضعتى الاسماء بالترتيب
وفضلا خبريها واذا وافقت خبرينى ياقمررررررررررر فضلا واذا لا نختار اموره ايش رايك ؟

السلام عليكم ورحمة الله وبركاته


ماشاء الله تبارك الرحمن الله يجمعنا وياكم على الخير والنفع يارب

س1..عرفينا عن نفسك وخاصه في الطبخ ؟

ماكو اسامي لست متزوجه-كنت موظفه وبطلت-عندي مشروع كيك وكب كيك - واطمح ان شاء الله لفتح كافيه نسائي يكون فيه مطبخ مفتوح والله كريم

س2..وجبتك المفضله؟

العشاء وافضل ورق عنب بالصبار- والبيتزا والسلطات بكل انواعها والمشاوي واخيرا الباستا اما الرز بالاخير حسب المزاج وايضا المعجنات

س3..طبق تحبين تسوينه كثير؟
الكيك بكل انواعه خصوصا اني ابتكر فيه واخترع نكهات جديده -البرياني والكشري لان لما احد يبعث لنا مواعين يطلبون برياني او كشري

س4..متى تعلمتي الطبخ؟
بعد المرحله الثانويه كنت اقرا وصفات بالمجلات واطبقها وطبعا كانت كلها فاشله لاني اكتشفت انهم غير دقيقين

س5..موقف طريف صار معاك في المطبخ ؟

كثير يصير معاي موقف واحد وهو اسوي الكيكه واروح انام وانساها بالفرن تحترق او الغاز يخلص
غير اني كنت اسوي الرز كثير لين كنت اكبه وانثره يتهوى شوي هههههه عشان ما يلزق

س6..يعتمد عليك في الطبخ او لا؟
الحمدالله رغم وجود طباخه بس في رمضان والعزايم والمناسبات انا اللي ادخل المطبخ لان الوالده الله يشافيها ويشافي كل مريض ما تقدر من سنين

س7..سوي طبخه وصوريها لنا؟

هذي توني اليوم سويتها واخر اختراعي

الذ واترف كيكة تمر ان شاء الله واتحدى فيها بعد








طبعا كلنا نعاني من كيكة التمر اللي تطلع ناشفه شوي ورغم ان عندي وصفات كثيره والحمدالله ناجحه وطيبه بس كنت اجرب كثير الى ان وصلت للطريقه هذي وكل ما اسويها ما اعطيها احد ومن باب حب لاخيك ما تحب لنفسك ما غليها عليكم وصدقوني من مره وحده راح تعتمدينها ما دام فيها تحدي ان شاء الله تبيض الوجه


المقادير

بكت كيك فانيلا الجاهز والنوع اللي مصورته طلع الذ من بتي كوكر واترف وهو المهم

4 بيضات

1/2 كوب زيت

1/2 كوب تمر معجون مذوب في 3/4 كوب ماي حار

كوب طحين

1 علبة زبادي 180 جم

م ش هيل و2 م ش قرفه

فستق وجوز حسب الرغبه

كل المقادير بالخلاط حتى تنعم قبل ما اصبها بالقالب اضيف مكسرات واترك شوي للزينه


الصلصه
3 جبن كيري
1 م ط تمر
نتفه زبده لو تحبين
ربع كوب ماي حار
رشة قرفه
بكت كرمل اللي يجي مع الكريم كرمل او السكر المحروق




















































س8..نصحيه توجهينها لطباخات عالم حواء ؟

لا تنقلين طبق مو مجربته- استخدمي الاكواب والملاعق القياسيه لانها ثابته عالميا وتنجح كل الحلويات لو اعتمدتي عليها-

س 9..هل تستخدمي الميكرو يف؟
نعم وخصوصا اني اتاجر بالحلو اعتمد عليه بتسييح الكاكاو وتسخين الزبده وغيرها بس انصح بالنوع الغالي لان حمايته اكبر

س 10..ما هو رأي أهلك أو زوجك في طبخك ؟

اهلي يحبون طبخي والحمدالله يطلبونه مني طلبه لاني ما اطبخ الا بالمناسبات

س 11..ماهي نوعية الاواني التي تفضلين ان تطبخي بها؟
الستيل لقدور كنت استخدم الالمنيوم والمقالي التيفال ما استغني عنها ما تلصق الحمسات وما تاخذ زيت

س12..ماهي الأكلة التي تحبها عائلتك وأنتي لا تحبيها ؟

مرقوق بالفقع

س13.. اول طبخه طبختيها ؟؟

رز اصفر بالماجي وقاعته بطاط طبعا قبلها البيض بانواعه والبطاط

س14..كم مره احترقت الطبخه معاك ؟؟

كثير خصوصا اني نسايه في مره عزيمه 10 رجال الرز ريحته فاحت حراق بعثت الخادمه لمحل قريب مننا شرت رز ابيض طبعا هندي وكانت تلوع جبدنا منه بس شسوي مالقيت منقذ الا هو ورشيته زعفران وبصل محمر ومكسرات عشان ارقعه طبعا الوالد نقش السالفه خخخخخخخخخ

س15.. اول كتاب طبخ اعتمدتي عليه ؟؟

كتاب اجنبي للكيك والحلويات وترجمته كله بس وبعدها كتب المطاحن الكويتيه وغيرها

س16..مين قدوتك بالمطبخ ؟؟

امي الله يشافيها ويخفف عنها وايضا نهى خلف طباخه شاميه كان لها حلقات بالتلفزيون وايضا اخذت كورسات عند منال العالم والاكثر مجلات طبخ حلويات فقط اجنبيه اتابعها بس الحين من النت

س17.. تحبي احد يساعدك بالطبخه ؟؟
لا ما احب لاني اتوتر

س18.. اذا خربت عليك الطبخه ايش تسوين ؟؟ ترميها ولا تضطري تاكليها؟؟

حسب درجه الخراب لو ما تترقع ارميها بس لو تترقع لا افرفشها وتمشي حالها

س 19.. ما رأيك بــ الفكرة لقاء وحـــوار مــع ضيفة شرف عالم حــــواء؟

فكره خفيفه تكسر الروتين وتحسين قرقه حريم مطابخ هههههههههههه تجمعهم هوايه الطبخ وانا احترم اللي تحب االطبخ مو اللي تطبخ ملزومه

س20 مـــيـــن ترشحى بعدك او ممكن تختاري اللي بعدك ..
ما ادري بس ممكن ام البكراويين لو ما عندها مانع

س 21 من اي دوله انتي ؟؟
الكويت والجذور من الزلفي

س 22 وماهي الاطباق الشعبيه المشهوره في بلدك ؟؟؟
مطبق الزبيدي =الجريش=الهريس=المربين - المموش والمعدس-المحمر-البلاليط

س 23وماهو الطبق الشعبي الذي ما زلتي تطبخينه وتحبينه ؟؟؟
مموش الربيان الناشف وشاركت فيه بمسابقه حواء وبتشوفونه بالكتاب ان شاء الله

س 24 اكتبى لنا طبق مفضل من اختيارك ... او من مواضيعك فضلا ؟

هذا الطبق له قصه والدي كان مريض وقال ما ابي غدا وعلمت الطباخه انه مافي طبخ قام من النوم العصر وقال ما طبختوا ؟ وكان جوعان قلت له ساعه ويكون الاكل خالص رحت فتحت الفريزر وانبش قلت ما يمدي مجبوس عيني طاحت عالباميه طلعتها وقلت للطباخه تسوي رز بشعريه ما ياخذ نص ساعه وانا سويت حمسة بصل وطماط وثوم وزنجبيل وماجي وكزبر وصلصه وطيحت الباميه وخليته يطبخ بقوه قلت مرق بدون لحم ما يصير طبعا فريزرنا ما يخلى من الكفته ابدا سواء كور او اصابع طلعت كور وحمرتها بزبده وحطيت عليها كزبره وكبيتها على الباميه عقب النضج وحطيت لها ليمون وفلفل وخلصت قبل الساعه ما شاء الله ومن يومها وهي مرغوبه بالبيت كثير لاننا اصلا نحب الكفته اكثر من اللحم العادي او الهبره وصار طبق جديد عندنا الطباخه تعلمته لانه سهل وصارت تسويه

المقادير حسب ما تحبين انا اعطيج فكره وانتي وذوقج



نكور كفته ويفضل لكل نص كيلو لحم بصله مبشوره وبقدونس وكزبره حسب رغبتك وفص ثوم وبهاراتك اللي تحبينها وبيضه ونص كوب طحين رز او 3/4 كوب بقسماط

احمرها بمقلاة على نار قويه بس تتحمر وارفعها نفس الزيت احطه بقدر واحمر بصل ناعم وثوم وبهارات وطماطم مفرومه وصلصه وبهارات وشوي كزبره خضره وخليها تتسبك وهي متغطيه افرميها لو قدرتي او ادعكيها عشان تنعم شوي اضيفي مكعب ماجي وماء مغلي وخليها تطبخ شوي واضيفي الباميه وبس تغلي خففي النار وخليها تتسبك ورشيها شوي كزبره خضرا





وخليها قبل لا تستوي ارفعيها واضيفي لها لومي اسود وتقليه مكونه من ملعقة سمنه احمر فيها 3 فصوص ثوم وملعقة كزبره خضره وبس تتشقر اضيفها للباميه واصبها على الكفته بعد ما اكون صفيتها ببايركس فرن و حطيت لها قرن فلفل ورشة بسيطه نعناع اخضر مفروم
اغطيها بقصدير وادخلها الفرن تتسبك نص ساعه انا سويت نوعين نوع عادي ونوع حار بالفلفل الاحمر
اقدمها مع رز بشعريه وتزين ببصل جوانح محمر وكزبره خضراء ويا حلاتها مع ال خبز:)







س 25 متى كان دخولك لعالم حواء وكيف تعرفتي على المنتدى ؟

من 4 سنين وقبلها داخله بسنتين باسم ثاني بس راح اليوزر واضطريت ادخل باسم جديد تعرفت عليه من اعلان كان بالنت عن اطباق حلويات وزرته وسجلت فيه والحمدالله ما شفت فيه الا كل خير ومحبه



ويارب اكون ضيفه خفيفه على قلوبكم

والسموحه على القصور

وماقصرتي ام عزوز على الدعوه الطيبه

ماكو اسامي

ما شاء الله علييييييج فعلا مبدعه بالطبخ وافكارج جديده الله يبارك فيج

انتي تسوين حلو وتبيعينه؟؟ ياليت تعطينا الرقم عالخاص :)

وفعلا اطباق المجلات ماتكون دقيقه

والله يشافي الوالده ويعافيها .... وتفرح بزواجك وبعيالك .... ومشكوره وايد على

تلبية الدعوه ... :26:

بارك الله فيك جميعاًإخواتي وتشرفنا بمعرفتكم
ماكو أسامي مشكورة على الطبق الرائع وذكرتيني والله بنهى خلف والله زمان كنت من المتابعين لها يارب تكون بصحة وعافية ومشكورين جميعاً

ماشاء الله تبارك الله
لقااء اكثر من رائع ماكو اسامي
الله يرزقك كل ما تتمني ويشفـي الوالدهـ
سعيدهـ بالتعرف عليك