طاجن الدجاج والرز على طريقة صديقتي (رهيبة)

السلام عليكم

حبيباتي اليوم بحط لكم طريقة صج روعه حق طاجن الدجاج بالفرن بالكريما الحامضة

المقادير بالتحديد والتفصيل الممل:
1 دجاجة كبيره الف غرام مسلوقة ومنسله
مرق الدجاج السائل اللي سلقتي به الدجاجه بس حاسبي اسلقي الدجاج بدون ملح
نص كوب جبن كرفت سائل
كوب كريما حامضة
نص حزمة شبت
2 بصل مفرومين ناعم
3 جزر مبشور
2 كوب ونص رز مغسول
جبن كرفت سائل اضافي + مايونيز = هذولي بتحطينهم في الحشو
بهارات مشكله = كركم + 3مكعب ماجي+ ملح +فلفل اسود + كمون + كزبره ناشفه مطحونه بالخليجي( سنوت وجلجلان) حسب الرغبه لو ماعندج مو شرط بس اهم شي الفلفل والملح
الطريقة :
اخذي مرق الدجاج اللي موجود عندج اللي سلتقي به الدجاجه
حطيه بقدر وسخنيه خليه يغلي زين مع اظافة 2 مكعب ماجي او واحد كيفج انتي
الحين صبي الرز في المرق وحطي شوي شبت مفروم مع جزر مبشور واحتفظي بالباقي
واطبخي الرز بالمرق زي الكبسه يعني وبعد مايجهز خليه على جنب

نجي للحشوه :
اكشني البصل في مقلاه وحطي عليه البهارات والماجي ،، ورشيهم بشوي مرق دجاج بعدين حطي عليهم الدجاج ،، واكشنيهم زين قلبيهم ،، بعدين حطي الشبت مع الجزر وقلبيهم زين ،، اخر شي اخلطي الجبن السائل يعني في مايقارب 4 ملاعق كبيره او 3 ملاعق كبيره مع 3 ملاعق كبيره مايونيز خلطيهم زين وكبيهم فوق خلطة الدجاج بعدين ارفعيها من على النار بسرعه عشان مايحترق الجبن
خليهم على جنب

الحين في بايركس ،،، حطي نص مقدار الرز ورتبيه بالتساوي ،، بعدين حطي الحشوه حقت الدجاج وامسحيها زين على الرز واضغطي بالملعقه زين رتبيها كويس ،، بعدين حطي باقي مقدار الرز ،،،
اخر شي اخذي نص كوب جبن كرفت سائل مع كوب الكريما الحامضة وامسحي على وجه الطاجن زين وبعدين دخليهم الفرن ،،، حمريها من فوق
راح يتوزع المقدار حق الطاجن على 2 بايركس لان ماراح يجي ببايركس واحد لو كان البايركس اللي عندج حجمه عادي بس لو كان كبير مره راح يكفي اكيد

وبالهناء والشفاء

من صج هالاكله جدا عزيزة على قلبي ،،، بس صج دسمه وايد وشغلتها شغله بس صج تهبل
وتنفع للعزايم