الطريقه دي واحده من افتكاساتي المطبخيه ويارب تعجبكم
واجمل حاجه انها سريعه مووووووووووووت
يعني تنفع لو مزنوقه ومافيش وقت
وهتشوفوا انها مغذيه جداا وطعمها حلو في نفس الوقت
وممكن تعمليها صنف لوحده وجنبها سلطه ومخلل وعيش وبسسسسسسسسس
طيب ندخل علي الوصفه
شوفوا الصوره الاول
المقادير
2 ثمرة بطاطس مسلوقه
معلقتين زبده
ربع كوب حليب
لحمه عصاج ( طبعا علي طول عندي في الفريزر جاهزه )
خضار مشكل ( وياريت يكون نوع حلو من ايل بيستوي بسرعه انا بجيب بسمه حلو اوي
بصله متقطعه صغير اوي
ملح وفلفل وبهارات
جبنه موتزاريللا
الطريقه
ندبل البصله مع معلقتين زيت ونضيف الخضار ونشوحه شويه وبعدين نضيف اللحمه وممكن نزود معلقتين مايه لو الخضار بتاعك مااستواش
وطبعا ملح وبهارات
ولما تنشف مايتها نطفي النار
نهرس البطاطس مع الزبده كويس ونضيف الحليب والملح والفلفل والبهارات
نجيب البيركس ونحط نص مقدار البطاطس وبعدين خلطة الخضار وبعدين النص التاني
وعلي الوش جبنه موتزاريللا
وندخلها فرن سخن بس ربع ساعه
لحد ماالجبنه تسيح وتاخد لون حلو
وبالف عافيه
وماتنسوش تدعولي بتيسير الحال