طاحت رجولي في السوق ادور لبس العيد

السلام عليكم خواتي الغوالي في هذا المنتدى الغالي اللي استفدت منه الشي الكثير كله بفضل الله ثم فضل العضوات المشاركات فيه
ما اطول عليكم خواتي شريتوا للعيد ولا لسه مثلي السنه هاذي شكلي ماني متعيده او بلبس اي لبس في دولابي بصراحه طاحت رجولي ومليت ما لقيت شي زين يستاهل مدري هالسنه احس السوق كله خلاقين ما شفت شي يفتح نفسي مدري انتم مثلي
والقهر كل القهر عيدنا كبير وفيه جمع وعالم ودنيا يعني فشله لازم اكشخ بس مالقيت شي :(
تكفون بنات طالبتكم الي لقت شي حلو تعلمني وين وقولوا لي وش الموضه هالسنه والالوان الدارجه والمحلات الحلوه الي فيها الزين بشرط يكون رسمي شوي وبسيط لاني مليت من المبالغه والفخفخه الزايده واخرتها البسه يوم العيد ولاعاد البسه في الزيارات العاديه اقول ما يناسب ابي شي استفيد منه وليت يكون سعره طبيعي لاني ناويه هالسنه اقتصد حرام والله اسرف في لبس يوم وينتهي وقولي المحلات الزينه
اختكم طراره وتشرط ليتكم تردون علي لو جبر خاطر وما تطنشوني مع اني تعودت على التطنيش منكم احيانا الله يسامحكم والله يجزاها خير الي ترد علي لوبكلمه وينوي لها الي في بالها
وسلامتكم