طاح ولدي الله يسعدكم طمنوني

الأمومة والطفل

السلام عليكم
بنات الله يسعدكم طمنوني
انا ولدي بسم الله عليه ١٠ شهور وكنت حاطته حولي يلعب وفجاء طاح على كرسي خشب من جبهته على جنب وصاح وبعدها عادي الولد بس بعدين لاحظت في خشمه دم وخفففت وبما ان زوجي مسافر وانا عند اهلي مامعي اثبات له وديته للطوارى والاهلي اغلبهم ماعندهم اشعه بهالوقت وقالو روحي للحكومي ورحت الطوارى وطلبو الاثبات وقلت ما معي وقالو لازم اثبات ورحت للدكتور على طول بس صار عندهم مشكله وطووولنا والدكتور الله يجزاه خير يوم قلت المشكله تجاوز مشكله الاثبات وقال روحي قسم الاصابات يكشفون عليه ورحت ولقيت الدكتور قسم الاصابات لاهي بهالشباب تعرفون طواري وقسم الاصابات حوادث الله يكفينا الشر ولا يورينا بغالي مكروه ..فخفت صراحه والوضع ماكان مريح دم وصراخ وطقاق شباب وشرطه والساعه ٣ باليل والدكاتر مستنفرين فخفت وهم بنفس غرفه كشف الاصابات واللي راسه واللي يده وملابسهم كلها دم يعني الوضع كان يخوف الله يسلمهم بس وكان فيه شباب يتهاوشون الوضع الله يعين الموظفيين الدكاتره والشرطه .. انا وضع ولدي الحمدلله بس الدم مخووووفني وطلعت ومتحسفه اني طلعت بس ما ارتحت ولدي خاف وانا خفت وتعرفون شباب وتهاوشو وقلنا نطلع ونرجع وقت ثاني .. بس كلمت وزارة الصحه وقالو اذا وقف وخفيف ماعليه شر ان شاءالله وراقبيه بس خاااايفه
طمنوني من عندها خبره الله يسعدكم
يارب اني استودعتك ولدي واولادكم فاحفظهم وانت خير الحافظين وربهم ❤
14
2K

يلزم عليك تسجيل الدخول أولًا لكتابة تعليق.

تسجيل دخول

Malak🌹..
Malak🌹..
طيب روحي لنفس المستشفى الصباح بيوم ثاني.
:أماني:
:أماني:
كيف يسافر زوجك وما يعطيك بطاقه الولد ؟؟!!! هذا اولا اقل شي مامعك جوازه بالبيت
ثانيا اذا الولد بخير ولا رجع وينام كويس وطبيعي وحركاته اوك باذن الله مافيه شي
بس تقدري تاخذي له موعد وتروحي تشيكي عليه مره ثانيه الصبح ماله داعي نص الليل بس لازم يكون عندك اثبات علشان يكون كل شي رسمي
على الاقل زوجك يرسل لك نسخه من بطاقه الولد. وبالحكومي اتوقع بدخوله
ياسمين الفيصل
ياسمين الفيصل
سلامته مايشوف شر 💔
يمكن رضة خفيفه سببت له الدم الي نزل يعني ان شاء الله راسه مافيه شي بس انتي عشان تتطمنين خليهم يسوون له اشعة مقطعية
والاثبات يقبلونه الحكومي حتى لو صورة بالجوال
وطمنينا وش يصير معك
غيوم ☁️
غيوم ☁️
دام مارجع بلحظتها معناته ماعليه ان شاءالله
هو الخطير الترجيع والنوم بعد الطيحه
ام مازن ورند
ام مازن ورند
الله يحفظه ويطمن قلبك وان شاء الله انه بخير دام وضعه طبيعي