فاطمة حمدالله على سلامتك يا حبيبتي
وربنا يبارك فيك يارب وعقبالك إنت وأختك عن قريب إن شاء الله
بالنسبة لموضوع أختك والله يابنتي ده رحمه من ربنا إن لو ربنا كاتب إن الموضوع ميتمش إنه يقف من أولها
بس إنت وهيه قولوا قدر الله وماشاء فعل
وإن شاء الله ربنا يعوضها بإذن الله
بس أنا مش عارفه ليه الدكتور قالها إن المره الجايه هيبقى المعدل أقل من اللي فات
المفروض يغيرلها النظام بتاعه تماما مادام مجبش معاها نتيجه أول مره
بصي يا ستي إسمعي كلامي لتوته وإنت تفهمي قصدي

أما إنت يا توته الله يبارك فيك وعقبال ما أفرح بيكي إنت كمان يارب
بصي يا ستي أنا عملت أطفال الأنابيب ده مرتين قبل كده عند الدكتور أبو الغار وده التالته عند الدكتور حسام
أول مره كانت إستجابتي ضعيفه مع إني كنت قبل العمليه لما باخد الكلوميد بيعمل نتيجة كويس
يعني تقريبا زي أخت فاطمه المهم طلعت تلات بويضات بس والدكتور كانت مستقل عددهم وبيقولي كده قليل قوي
لكن كملنا برده وإتلقحوا التلاته وإتنقلولي التلاته
وقدر الله وماشاء فعل العمليه منجحتش
في تاني مره حصل زي اللي الدكتور بتاع فاطمه هيعمله مع أختها إداني نفس نوع الأدويه لكن بنظام مختلف شويه
وبكميات أكبر وحصل برده إن الإستجابه كانت أضعف وطلعت بويضه واحده بس
قلت مش مشكله ربنا يبرك فيها وعملت العمليه وإتنقلي جنين واحد
وبرده قدر الله وماشاء فعل العمليه منجحتش
تالت مره قررت أغير المركز ورحت للدكتور حسام في مركز جنين
طبعا هو عرف نوع الحقن اللي كنت باخدها وأسلوب العلاج
وإتفق معايا إنه هيعملي حاجات كتير ممكن أكون مش محتجاها لكن ده من باب الأخد بالأسباب
علشان نبقى عملنا اللي علينا كله ومنرجعش نقول يارتنا كنا زودنا كذا
المهم طبعا إبتديت بتحليل الجلطات ده وهو مهم على فكره
أنا الأول إستغربت وبالذات التحليل غالي جدا لكن قلت مش مشكله علشان أعمل اللي عليه قدام ربنا
وفعلا طلع جسمي عنده إستعداد لتكوين جلطات وأخدت كورس علاج ليه بالإضافه لعلاج العمليه
وما زلت باخد حقن تحت الجلد بتعمل سيوله في الدم ودوا تاني كمان علشان لاقدر الله ميحصلش جلطه
لأنها لاقدر الله لو حصلت ممكن تخنق الجنين وبالتالي يتوفى
وممكن ده يكون هو اللي حصل قبل كده والله أعلم
والعلاج ده هفضل أخده لحد الولاده إن شاء الله
المهم وبعد كده طلب مني منظار رحمي مع إن كنت عامله قبل كده منظار بطن
وعملته برده ومن خلاله شاف إذا كان في عيوب في الرحم ولا لأ
وأخدو قياسات الرحم وكمان ححدوا أفضل مكان هيتم وضع الأجنه فيه
المهم في العلاج إستجابتي كانت كويسه بالنسبه للمرات اللي فاتت لكن قليله بالنسبه لبقيت الناس لأني شفت ناس ماشاء الله مطلعه تلتاشر و ثمنتاشر وهكذا
المره ده طلعلي خمس بويضات الدكتور نقلي منهم تلاته في ثالث يوم مع إني كان نفسي ينقلهم خامس يوم لأنها بتعلي نسبة النجاح بس علشان هما قليلين مردناش نخاطر بيهم وقلنا ننقلهم أحسن
والحمد لله ربنا أرادلي إن العمليه نجحت

اللي عايزه أقولهولك يا توته ماشاء الله تبارك الله الدكتور حسام دكتور ممتاز جدا
متقلقيش من أي حاجه يطلبها لأنه هدفه إنك متضطريش تعيدي العمليه تاني
وعلى فكره عجبني فيه قوي إنه وهو بينقلي الأجنه قعد يقرأ عليهم قرآن ويقولي قولي ورايا
خلى أعصابي هديت بعد ما كنت مشدوده زياده عن اللزوم
ربنا يباركله يارب

والله يا فطمه أنا بقول ياريت أختك المره الجايه تجرب معاه وبرده صلي إستخاره قبل أي حاجه
حقيقي هو ممتاز وشاطر في مهنته قوي وكمان بيطلع على كل جديد في العلم

وربنا يوفقكوا كلكم يارب
يارب أكون قدرت أفيدكم وأوصلكم المعلومات

ممكن اعرف منك يا اختى عنوان الدكتور حسام او رقم تليفونة و ربنا يتملك على خيير يا رب و يفرح قلبك و ميحرمش اى محتاج

على فكرة يا جماعة انا اولمرة فى حياتى انضم لاى منتدى و بصراحة كانت صدفة بس لما لقيت المنتدى بتاعكم فرحت اوى و طبعا حاسة بيكم كلكم لانى حسيت معاكم ان فى امل و بصراحة اكتر الواحد لما بيلاقى حد حاسس بيه لانة عنده نفس المشكلة مش علشان صعبانعليه بيكون الاحساس احلى كتيير
مش عايزه اطول عليكو بسبجد انا فرحانه اوى بيكوا و بدعيلكوم كلكم و انا بدعى لربنا
ربنا يرزقنا جميعا يا رب

sorry for my bad writing in arabic

مسلمة ربنا يخليكي يا رب
طمنيتيني وشجعتيني اكتر والله انا مش عارفة اقولك ايه غير اني ادعيلك ان ربنا يكملك بالف خير يا رب
وعلي فكرة انا المركز لسة مكلمني النهاردة وقالولي علي نتيجة التحليل بتاع التجلط انه طلع فيه احتمالية حدوث تجلط علشان كدة طلبو مني اني اشتري فولك اسيد 5 مج اخدة ثلاث مرات في اليوم وجاسبرين اخدة مرة بعد الغداء

وانا عندي البطانة المهاجرة وعندي ميعاد يوم 11 يونيو علشان اخد حقنة اسمها زولادكس علشان بتوفق نشاط البطانة المهاجرة ودي لمدة ثلاث شهور علي الأقل
انا فعلا حسيت ان دكتور حسام فاهم شغلة اوي وكمان لقيتو في وسط الكشف والزحمة صلو كلهم جماعة مع بعض وده عجبني جدا فيه ، يا رب يكون سبب في حملي وحمل كل واحدة عندي يا رب

ويا رب تعمل لكل واحدة الصالح وكل حامل كملها حملها علي خير
واي واحدة مقدمة علي العملية ارزقها الحمل السليم المعافي يا رب